ટીમ ઇન્ડિયાને લાગ્યો ઝટકો ફિલ્ડીંગ દરમિયાન આ ખેલાડી થયો ઇજાગ્રસ્ત

ઓસ્ટ્રેલિયા વિરુધ્ધ 6 ડિસેમ્બરથી શરૂ થઇ રહેલી ચાર ટેસ્ટ મેચની શ્રેણી પહેલા ભારત માટે ખરાબ સમાચાર છે. સિડની મેદાન પર ક્રિકેટ ઓસ્ટ્રેલિયા XI વિરુધ્ધના અભ્યાસ મેચમાં ત્રીજા દિવસે ઓપનિંગ બેટસમેન પૃથ્વી શો ઇજાગ્રસ્ત થયો છે.

ઉલ્લેખનીય છે કે ઓસ્ટ્રેલિયા XI સામેની અભ્યાસ મેચમાં પૃથ્વી શોએ શાનદાર બેટિંગનું પ્રદર્શન કર્યું હતું. જેમાં તેણે 66 રન બનાવ્યાં હતા. પરંતુ આ અભ્યાસ મેચમાં ફિલ્ડીંગના સમયે ડીપ મિડવિકેટ બાઉન્ડ્રી પર કેચ કરવાના પ્રયત્ન સમયે તેને આ ઇજા થઇ છે.

તેની ડાબી એડીમાં ઇજા થઇ છે. ઓસ્ટ્રેલિયાના બેટસમેન મેક્સ બ્રાયન્ટે એક ઊંચો શોટ માર્યો હતો. જે કેચ પકડવા જતા પૃથ્વી શોએ મહેનત કરી હતી. આ કેચ પકડતા સમયે પૃથ્વી ઇજાગ્રસ્ત થયો.

ત્યાર બાદ ટીમ ઇન્ડિયાના ફીઝિયો પેટ્રિક ફરહાર્ટ અને એક અન્યની મદદથી તેને મેદાનની બહાર લઇ જવામાં આવ્યો. ત્યારબાદ તેની ઇજા અંગેની જાણકારી મેળવવા તેને સ્કેન માટે હોસ્પિટલ લઇ જવામાં આવ્યો.

બીસીસીઆઇ દ્વારા પુષ્ટી કર્યા બાદ જણાવવામાં આવ્યું કે હાલમાં મેડિકલ ટીમ પૃથ્વી શોની ઇજા પર નજર રાખી રહી છે.