દાહોદ જિલ્લાના ધાનપુર તાલુકાની એક યુવતીને તાલિબાની સજા આપવાની ઘટના સામે આવતાં ખભળાટ મચી ગયો, પતિ અને દિયર દ્વારા જ સ્ત્રીને ગામલોકો વચ્ચે જ નિર્વસ્ત્ર પણ કરી દેવાઇ
પરીણિતાને મરાયો માર
પ્રેમી સાથે કઢાયો વરઘોડો
પોલીસે 14 આરોપીને ઝડપ્યા
દાહોદ જિલ્લાના ધાનપુર તાલુકાના ખજૂરી ગામનો એક વીડિયો વાયરલ થયો છે. જેમાં એક પરિણીતા પર પ્રેમ સંબંધની શંકાએ માર મારવામાં આવ્યો હતો. પરિણીતાને માર મારી પ્રેમી સાથે તેનો વરઘોડો કઢાયો હતો. અને ગામ લોકોએ મળી ખુબ જ માર માર્યો હતો. અને તમામની હાજરીમાં તેને નિવસ્ત્ર પણ કરી હતી. આ વીડિયો સોશિયલ મીડિયા પર વાયરલ થતાં પોલીસ એક્શનમાં આવી ગઈ હતી. અને પોલીસે તાબડતોડ કાર્યવાહી કરતા સાસરી પક્ષના 19 લોકો સામે ગુનો નોંધી કાયદેસરની કાર્યવાહી હાથ ધરી છે. 3 જુવેનાઈલ મળી 14 આરોપીને ઝડપી પાડ્યા છે. જ્યારે 5 આરોપીની શોધખોળ શરૂ કરી છે.
ધાનપુરના એક ગામની 23 વર્ષીય પરીણિત પીડિતા લગ્ન આશરે 5 વર્ષ અગાઉ નજીકના ગામના દિનેશ સાથે થયા હતાં. પીડિતાને દોઢ વર્ષની એક દીકરી પણ છે. પીડિતાના તેના પિતા સેનાભાઇ, માતા કાશીબેન અને પતિ દિનેશ સાથે રાજકોટના લતીપુર ગામે ખેતીકામ કરવા માટે ગયા હતાં. તે પૂર્વે ત્રણેક માસ પહેલાં બોડેલી પાસે ઇંટના ભઠ્ઠા ઉપર મજૂરી કામ કરતી વખતે પીડિતાની આંખ ધાનપુર તાલુકાના જ વાંકોટા ગામના કમજી સાથે મળી ગઇ હતી. બંને મોબાઇલ ઉપર વાત કરતાં હતા અને કોઇક વખત મળતા પણ હતાં.
પીડિતા તેનો મોબાઇલ પતિથી સંતાડીને રાખતી હતી. લતીપુર ગયા બાદ પ્રેમી કમજી પણ ઘ્રોલ નજીક આવેલા વાંકીયા ગામે જઇને વાડીમાં કામ કરતો હતો. અહીં પણ બંને કોઇક વખત મળતા હતાં. 5 જુલાઇના રોજ પીડિતાનો મોબાઇલ પતિના હાથ લાગી ગયો હતો. મારની બીકથી પીડિતા ભાગીને પ્રેમી પાસે વાંકીયા ગામે જતી રહી હતી. પિયર અને સાસરી પક્ષના લોકોએ પીડિતા અને કમજીને પકડીને ધાનપુર સ્થિત સાસરીમાં લઇ 6 તારીખની પરોઢે લઇ આવ્યા હતાં. પ્રેમી કમજીને એક ઘરમાં પુરી દીધા બાદ સવારના સમયે અરસામાં ભેગા થયેલા સાસરી પક્ષના લોકોએ પોત પ્રકાશ્યુ હતું.