નવરાત્રીના તહેવારો પૂર્ણ થતા જ દીપાવલીના પર્વની રોનક ધીમે-ધીમે બજારમાં આવી રહી છે ત્યારે ગૃહીણીના ગેસમાં તેલના ભાવ વધારારુપી ઝાળ લાગી છે. મોંધવારીનો આ માર હવે સહન કર્યે જ છૂટકો જેવી સ્થિતિ નાના અને મધ્યમ વર્ગના પરિવાર પર આવી પડી છે.સરકારે આયાત ડ્યૂટી ઘટાડતા સટ્ટા બજારને કારણે ભાવોમાં ઉછાળો આવતા તહેવારોમાં બજેટ વિખરાઈ ગયા છે. કપાસિયા અને આયાતી તેલના ભાવમાં 30 રૂપિયાનો વધારો થયો છે.તો પામ તેલ, સનફ્લાવર સહિતના તેલમાં 30 રૂપિયાનો વધારો ઝીંકાયો છે
ઘરની થાળી પણ બની દોહ્યલી
એક તરફ,પેટ્રોલ-ડીઝલના ભાવ સદી ફટકારીને સતત અણનમ આગળ વધી રહ્યા છે.તો ગેસના ભાવમાં પણ છેલ્લા 15-20 દિવસમાં સરેરાશ 50થી 75 રૂપિયા વધી ગયા છે.શાક-ભાજી ,કઠોળ,ગરીબોની કસ્તૂરી ગણાતી ડૂંગળી સુદ્ધા પેટ્રોલ-ડીઝલની હરીફાઈમાં ઉતરી છે ત્યારે, ઘરની થાળી જ જો દોહ્યલી થઇ હોય તો હોટેલ-રેસટોરન્ટની તો વાત જ ક્યા પૂછવી ? ગુજરાતમાં વારંવાર ડુંગળી અને પેટ્રોલના ભાવની સરખામણી થતી હતી. આ વખતે ડુંગળી કરતા પેટ્રોલના ભાવ ખૂબ આગળ નીકળી ગયા છે. હવે ખોરાકનું તેલ પણ મોંધુ થતા,ફરસાણના ભાવ દિવાળીમાં રડાવે તો નવાઈ નહિ.
તેલની ચીકાશ,ફરસાણને પણ લપટાવશે
દીપાવલીના તહેવારોમાં ફરસાણનું ખુબ મહત્વ છે ત્યારે, સિંગતેલ અને કપાસિયા તેલના ફરી એક સરખા ભાવ થયા છે.સિંગતેલના ડબ્બે 2450 થી 2510 રૂપિયા સુધીના ભાવ છે તો ક્યાંક કેટલીક કંપનીઓના કપાસિયા તેલ કરતા સિંગતેલના ભાવો ઓછા જણાયા છે. દીપાવલીમાં ઘરેલું ફરસાણ તો મોંધુ પડશે જ પણ બહારનું ફરસાણ પણ વધારે મોંધુ પડશે. જે રીતે તમામ ક્ષેત્રે ભાવ વધુ રહ્યા છે તે જોતા લાગે છે કે, ભાવ વધારો જનતાને કોઠે પડી ગયો છે.સરકારે પણ ભાવ વધારા મુદ્દાની સંવેદાનશિલતા ગુમાવી દીધી હોય તેમ,આટલો વિરોધ અને જનાક્રોશ છતાં દિન-પ્રતિદિન ભાવ વધતા જ ચાલ્યા છે. બજારમાં એક પણ ચીજ કે વસ્તુ એવી નથી કે જેનો ભાવ સ્થિર હોય અથવા વાજબી હોય.સરવાળે, તો કોઈ ચમત્કાર જ આ મોંઘવારીમાં ઉગારી શકે તેવી સ્થિતિનું નિર્માણ થયું છે.