રાજ્યમાં દુષ્કર્મ અને હત્યાના બનાવો જાણે કતારબંધ લાગતા હોય તેવી સ્થિતિનું નિર્માણ થયું છે. નવસારીની યુવતી સાથે વડોદરામાં જે કઈ થયું અને ત્યાર પછીનો સીલસીલાબંધ ઘટનાક્રમ આખું ગુજરાત જાણે છે. ઘટનાને બરાબર એક મહિનો થયો છતાં પોલીસના હાથ હજુ પણ ખાલી છે. મામલો પેચીદો છે અને રેલવે પોલીસ, વડોદરા પોલીસ બાદ હવે સ્પેશિયલ ઇન્વેસ્ટીગેટીવ ટીમ (SIT)નાં હાથમાં કેસ આવ્યો છે. આ વચ્ચે જ નવસારીના ખેરગામમાં એક વિધર્મી યુવકે સગીરા સાથે દુષ્કર્મ આચરાયાની ઘટનાથી ખળભળાટ મચી ગયો છે. જો કે આરોપી પોલીસના હાથમાં ઝડપાઈ ગયો છે.
ઝડપાયો વિધર્મી;પોક્સો હેઠળ કાર્યવાહી
રાજ્યમાં લવ-જેહાદને નાથવા રૂપાણી સરકારે કડક કાયદો અમલી બનાવ્યો હતો. અને આવી ઘટનાઓને રોકવા કાયદામાં કેટલાક ફેરફાર અને સજાની જોગવાઈ પણ કરાઈ હતી. નવસારીના ખેરગામમાં માત્ર 14 વર્ષીય સગીરા સાથે મિત્રતા કેળવતા યુવકે,પોતાની ઓળખ છૂપાવી હતી મિત્રતાની આડમાં વિધર્મી યુવકે સગીરાને પ્રેમજાળમાં ફસાવીને દુષ્કર્મ આચર્યું હતું. વિધર્મી યુવકે હિન્દુ નામ જણાવી સગીરાને પોતાની પ્રેમજાળમાં ફસાવી હતી.પરંતુ સોશિયલ મીડિયા દ્વારા સગીરાને યુવકનું સાચું નામ ખબર પડતાં પ્રેમસંબંધ રાખવાની ના પાડી હતી. આથી વિધર્મી યુવકે યુવતીને ડરાવીને તેની સાથે દુષ્કર્મ આચર્યું હતુ.સગીરાના પરિવારજનોએ સમગ્ર મામલે ખેરગામ પોલીસ સ્ટેશનમાં ફરિયાદ નોંધાવી હતી. પીડિત પરિવારની ફરિયાદના આધારે ખેરગામ પોલીસે વિધર્મી યુવકની ધરપકડ કરી છે અને યુવક સામે પોક્સો એક્ટ હેઠળ ગુનો નોંધી કાયદેસરની કાર્યવાહી હાથ ધરી છે