156 આવાસમાંથી 40 આવાસના લાભાર્થીના નામ બદલી નાખ્યા હતા, સિટી એન્જિનિયર શૈલેષ મિસ્ત્રીએ પાલિકા કાર્યપાલક ઇજનેર અને એક્સપર્ટ સામે નવાપુરા પોલીસ સ્ટેશનમાં ફરિયાદ નોંધાવી હતી . જે બાદ કાર્યપાલક ઇજનેર પ્રમોદ વસાવા અને એક્સપર્ટ નિશિથ પીઠવા સામે ફરિયાદ નોંધી સસ્પેન્ડ પણ કરી દેવાયા હતા જે બાદ ગઈકાલે કોર્ટે તેમના રિમાન્ડ મંજૂર કર્યા છે.પૂછપરછમાં મોટા માથાના નામ ખૂલવાની પૂરેપૂરી શક્યતાઓ છે.
કૌભાંડમાં ભાજપના કોર્પોરેટર મનોજ પટેલનું નામ ચર્ચામાં
છેલ્લા 4 દિવસથી કૌભાંડઆવતાની સાથે જ આવાસ સગેવગે કરવામાં કોઈ મોટી માછલી સંડોવણી હોય તેવું ચર્ચાઇ રહ્યું છે. સમગ્ર કૌભાંડ મામલે ભાજપના કોર્પોરેટર મનોજ પટેલનું નામ સૌ પ્રથમ ચર્ચાઇ રહ્યું છે. કૌભાંડમાં એ તો નક્કી છે કે આરોપી અધિકારીઓ કોઈના ઈશારે અને કોઈ નેતાની મિલીભગતથી માનીતાઓને ફ્લેટ બારોબાર આપી રહ્યા હતા. ત્યારે સમગ્ર મામલે ભાજપના કોર્પોરેટર મનોજ પટેલનું નામ ચર્ચામાં આવી રહ્યું છે. પણ હજુ આરોપી અધિકારીઓ દ્વારા આ અંગે કોઈ ખુલાસા કરવામાં આવ્યા નથી. પણ કૌભાંડમાં નામ ચર્ચામાં આવતાની સાથે જ ભાજપના કોર્પોરેટર મનોજ પટેલે ખુલાસા આપતા કહ્યું છે કે પ્રકાશ નગર સ્કીમમાં આવાસ ન મળતા સ્થાઈ સમિતિ અને કાર્યપાલક ઈજનેરને મે રજૂઆત કરી હતી, સવા બે લાખ ભરનારને મકાન ન મળતા ડ્રો થયા પહેલા મે રજૂઆત કરી હતી, નવા ડ્રોમાં મકાન મળે તે માટે રજૂઆત કરવામાં આવી હતી જૂના આવાસ માટે કોઈ પણ રજૂઆત તેમના દ્વારા કરવામાં આવી નથી, રાજકીય કિન્નખોરી રાખી પોતાનું નામ જાહેરમાં ચર્ચાઈ રહ્યું છે વધુમાં તેમને જણાવ્યું હતુ કે તે પણ આવાસ સગેવગેના થતાં 42 નામ શોધી રહ્યા છે કે ક્યાં નામ બદલાયેલા છે
કોર્પોરેટર કલ્પેશ પટેલનું નામ ચર્ચામાં
વડોદરામાં આવાસ યોજના કૌભાંડમાં હવે કોર્પોરેટર મનોજ પટેલ બાદ કલ્પેશ પટેલનું નામ પણ ચર્ચામાં આવ્યું છે...આ અંગે મનોજ પટેલ બાદ કોર્પોરેટર કલ્પેશે પણ ખુલાસા કર્યા છે, આવાસ મામલે ભલામણ કરવાનો સમય નથી...મારૂ નામ વિધ્નસંતોષીઓ ચર્ચામાં લાવ્યા છે...રાજકીય કારકિર્દીને લાંછન લગાડવાનો પ્રયાસ કરી રહ્યાં છે...સમગ્ર મામલો ભાજપના નગરસેવકો જ બહાર લાવ્યા છે...અધિકારીઓને કોંગ્રેસના રાજમાં ભ્રષ્ટાચારની આદત પડી છે...પાંચ-છ અધિકારીઓ સસ્પેન્ડ ન થાય ત્યાં સુધી ભ્રષ્ટાચાર અટકશે નહીં...પોલીસ નિષ્પક્ષ તપાસ કરે અને જવાબદારો સામે પગલાં લે...
કોર્પોરેટર અને સ્ટેન્ડિંગ કમિટી સભ્ય અજીત દધિચનું નિવેદન
વડોદરામાં પાલિકાના આવાસના ડ્રોની યાદી કૌભાંડનો મામલે ભાજપ કોર્પોરેટર્સના નામ ખૂલતાની સાથે જ રાજકીય ગરમાવો આવી ગયો છે. સમગ્ર મુદ્દે કોર્પોરેટર અને સ્ટેન્ડિંગ કમિટી સભ્ય અજીત દધિચે નિવેદન આપતા કહ્યું કે
એક લાભાર્થી મારી પાસે ફરિયાદ લઈને આવ્યા હતા,લાભાર્થીની ફરિયાદના આધારે સિટી એન્જિનિયરને જાણ કરી,પોલીસ હાલમાં તપાસ કરી રહી છે ને તપાસ હાલમાં પ્રમાણિક રીતે ચાલે છે, કૌભાંડ સામે લાવનાર ભાજપ કોર્પોરેટર જ હોવાનો મોટો ખુલાસો પણ તેમના દ્વારા કરવામાં આવ્યો હતો.
કૌભાંડી બંને આરોપી 3 દિવસનાં પોલીસ રિમાન્ડ પર
સમગ્ર કૌભાંડ બહાર આવતા ફરિયાદી અને આરોપી એક બીજા પર આરોપ પ્રત્યારોપ કરી રહ્યા છે. સમગ્ર મામલે મેયરે પણ ગંભીરતા દાખવી કડક કાર્યવાહીના આદેશ કર્યા છે તો સામે ક્રાઇમ બ્રાન્ચ પણ 7 દિવસ માટે કોર્ટમાં આરોપીના રિમાન્ડની માગણી કરી હતી જે બાદ કોર્ટે કાર્યપાલક ઇજનેર પ્રમોદ વસાવા , MIS ઓપરેટર નિશિથ પીઠવા બંને આરોપીઓના 3 દિવસના રિમાન્ડ સોમવાર સવાર 11 વાગ્યા સુધીનાં મંજુર કર્યા છે.
કેવી રીતે આચર્યું આવાસ યોજના કૌભાંડ?
ગરીબો માટે બનાવવામાં આવી રહેલા અને પ્રધાનમંત્રી નરેન્દ્ર મોદીના સ્વપ્ન સમાન પ્રોજેક્ટમાં જ વડોદરાના અધિકારીઓ દ્વારા કૌભાંડ આચરાતા સમગ્ર ગુજરાતમાં ખળભળાટ મચ્યો છે. સમગ્ર મામલો સિટી એન્જિનિયર શૈલેષ મિસ્ત્રીએ ફરિયાદ કરતાં બહાર આવ્યો હતો.ફરિયાદી દ્વારા પ્રધાનમંત્રી આવાસ યોજનામાં ડ્રો થયેલા નામો બાદ લાભાર્થીને બદલાયા હોવાની ફરિયાદ કરવામાં આવી હતી. જે બાદ સમગ્ર મામલે તપાસ થતાં મોટા પર્દાફાશ થયા છે.સમગ્ર કૌભાંડની જો વાત કરવામાં આવે તો પ્રધાનમંત્રી આવાસ યોજનાના માટે થયેલા ડ્રોમાં ગોલમાલ કરવામાં આવી હતી. ડ્રોમાં ખુલેલા નામો ડ્રો થયા બાદ અધિકારી કાર્યપાલક ઈજનેર પ્રમોદ વસાવા અને એક્સપર્ટ નિશિત પીઠવા દ્વારા બદલી નાખવાં આવ્યા હતા. 156 મકાનો માટે થયેલી ડ્રો માંથી 40 જેટલા મકાનોના લાભાર્થી બદલી મકાનો સગેવગે કરવામાં આવ્યા હતા. જે બાદ ડ્રો અને VMCની વેબસાઈટમાં લાભાર્થીઓના નામો અલગ બતાવાયા તપાસ થતાં વિગતો અને નામો અલગ અલગ દર્શાવાતા આરોપીનો ભાંડો ફૂટ્યો હતો. સમગ્ર મામલે કાર્યપાલક ઈજનેર પ્રમોદ વસાવા અને એક્સપર્ટ નિશિત પીઠવા સામે ફરિયાદ થઈ છે. પોલીસે બંને અધિકારીઓને પૂછપરછ માટે બોલાવયા છે તો સામે કૌભાંડમાં નામો બહાર આવતાની સાથે બંને અધિકારીને સસ્પેન્ડ કરી દેવાયા છે. અને કોર્ટ તરફથી તેમના રિમાન્ડ પણ મંજૂર કરી દેવાયા છે. અને ભાજપ કોર્પોરેટર્સની મિલીભગતના સંકેત પણ દેખાઈ રહ્યા છે. અનેક મોટા નામોનો ખુલાસો થવાની શકયાતાઓ સેવાઇ રહી છે.