આવતીકાલે ભારત અને પાકિસ્તાન વચ્ચે ઓસ્ટ્રેલિયામાં ટી-20 વર્લ્ડ કપમાં પહેલી મેચ રમાઈ રહી છે પરંતુ તેમાં ભારતની જીતની પ્રબળ સંભાવના છે.
આવતીકાલે ભારત અને પાકિસ્તાન વચ્ચે ટી20માં મહામુકાબલો
મોટી ટૂર્નોમેન્ટમાં ભારત હંમેશા જીતતું આવ્યું છે
પાકિસ્તાન ઓસ્ટ્રેલિયામાં એક પણ ટી20 મેચ જીતી શક્યું નથી
એટલે ભારતની જીતની પ્રબળ સંભાવના
ભારત અને પાકિસ્તાન ની ટીમો 23 ઓક્ટોબર એટલે કે કાલે ટી20 વર્લ્ડકપમાં આમને-સામને ટકરાશે. મેલબોર્ન ક્રિકેટ ગ્રાઉન્ડ (એમસીજી) ખાતે ભારતીય સમયાનુસાર બપોરે 1.30 વાગ્યાથી મેચનો પ્રારંભ થશે. દિવાળીના એક દિવસ પહેલા જ રમાનારી આ મેચમાં ભારતીય ચાહકોને તેમના ખેલાડીઓ પાસેથી જીતની ભેટની આશા છે. મોટી ટૂર્નામેન્ટમાં ભારતીય ટીમે હંમેશા પાકિસ્તાન પર પ્રભુત્વ જમાવ્યું છે. આવી સ્થિતિમાં ભારતીય ચાહકોની આ આશા નકામી જાય તેવી શક્યતા નહિવત્ છે. ત્યારે આ વખતે મેચ ઓસ્ટ્રેલિયામાં થઇ રહી છે, જ્યાં એક આંકડો એવો છે જે ભારતની જીતની પુષ્ટિ કરતો દેખાઇ રહ્યો છે.
પાકિસ્તાન ઓસ્ટ્રેલિયામાં એક પણ ટી20 મેચ જીતી શક્યું નથી
ઓસ્ટ્રેલિયામાં પાકિસ્તાનની ટીમના ટી-20 રેકોર્ડ ખૂબ ખરાબ રહ્યો છે. વાસ્તવમાં આજ સુધી પાકિસ્તાનની ટીમ ઓસ્ટ્રેલિયામાં એકપણ ટી-20 મેચ જીતી શકી નથી. પાકિસ્તાનની ટીમ ઓસ્ટ્રેલિયામાં અત્યાર સુધી ચાર મેચ રમી ચૂકી છે, જેમાંથી ત્રણમાં તેને હારનો સામનો કરવો પડ્યો છે, જ્યારે એક મેચ અનિર્ણિત રહી છે. 2010માં પાકિસ્તાનની ટીમ પહેલી વાર ઓસ્ટ્રેલિયામાં મેચ રમી હતી. અહીં તેણે મજબૂત બોલિંગના આધારે ઓસ્ટ્રેલિયાને 127 રનમાં રોક્યું હતું પરંતુ તેમ છતાં તે લક્ષ્ય હાંસલ કરી શક્યો નહતો. પાકિસ્તાનની ટીમ આ મેચમાં માત્ર 125 રન જ બનાવી શકી હતી. આ પછી પાકિસ્તાને વર્ષ 2019માં ઓસ્ટ્રેલિયામાં ત્રણ ટી-20 રમી હતી. પ્રથમ મેચ અનિર્ણિત રહી હતી. બીજી મેચમાં ઓસ્ટ્રેલિયાએ એક તરફી રીતે 7 વિકેટે વિજય મેળવ્યો હતો અને ત્રીજી મેચમાં ઓસ્ટ્રેલિયાએ પાકિસ્તાનને માત્ર 106 રનમાં જ અટકાવી દીધું હતું અને 12મી ઓવરમાં જ ટાર્ગેટ હાંસલ કરી લીધો હતો.
ભારત ઓસ્ટ્રેલિયામાં 12 ટી20માંથી 7 જીતી છે
ભારતીય ટીમ ઓસ્ટ્રેલિયામાં અત્યાર સુધી 12 ટી-20 મેચ રમી ચૂકી છે. અહીં ભારતે 7 મેચ જીતી છે અને 4 મેચમાં હારનો સામનો કરવો પડ્યો છે. એક મેચ અનિર્ણિત રહી છે. 2012 અને 2018માં ભારત અને ઓસ્ટ્રેલિયા વચ્ચેની શ્રેણી 1-1થી ડ્રો રહી હતી. તે જ સમયે, 2016 અને 2020માં, ભારતે ઓસ્ટ્રેલિયાને તેની જ ધરતી પર હરાવ્યું હતું. ઓસ્ટ્રેલિયામાં ભારતનો આ મજબૂત રેકોર્ડ પાકિસ્તાન માટે બેવડા માથાના દુખાવાથી ઓછો નથી.