નવો રેકોર્ડ / દુનિયામાં ફરી જોવા મળ્યો ભારતનો દબદબો, પ્રાપ્ત કરી એવી સિદ્ધિ કે જાણીને થશે ગર્વ

• નિકાસના મોરચે ભારતે હાંસલ કરી મોટી સિદ્ધિ
• 417.81 બિલિયન ડૉલરની નિકાસ કરવામાં મેળવી સફળતા
• આયાતમાં પણ તેજી આવી

નિકાસના મોરચે ભારતે નાણાકીય વર્ષ 2021-22માં મોટી સિદ્ધિ હાંસલ કરી છે. અત્યાર સુધીનાં તમામ રેકોર્ડ તોડીને ભારતે આ સમયગાળા દરમિયાન 417.81 બિલિયન ડૉલરની નિકાસ કરવામાં સફળતા મેળવી છે. સરકારી સૂત્રોએ શુક્રવારે આ અંગેની જાણકારી આપી હતી.

મોદી સરકારે 2021-22માં 400 બિલિયન ડૉલરની નિકાસ કરવાનો લક્ષ્‍યાંક રાખ્યો હતો, જે નાણાકીય વર્ષના અંતના 10 દિવસ પહેલાં હાંસલ કરવામાં આવ્યો હતો. એ માટે નાણામંત્રી નિર્મલા સીતારમણે શુક્રવારે ઉદ્યોગપતિઓનો આભાર માન્યો હતો અને તેઓને અભિનંદન પાઠવ્યા હતાં.

માર્ચમાં પણ રેકોર્ડ નિકાસ

સૂત્રોએ જણાવ્યું કે, માર્ચ 2021-22 નાં છેલ્લાં મહિનામાં પણ નિકાસ રેકોર્ડ સ્તરે રહી હતી. આ દરમિયાન દેશમાંથી 40.38 બિલિયન ડૉલરના માલની નિકાસ કરવામાં આવી હતી. હાલમાં સરકારે નિકાસના સત્તાવાર આંકડા જાહેર કર્યા નથી. આ એક કામચલાઉ આંકડા છે. અંતિમ આંકડામાં હજુ વધુ વધારો થવાની શક્યતા નકારી ના શકાય.

આયાતમાં પણ તેજી આવી

દેશમાંથી નિકાસ વધવાની સાથે-સાથે 2021-22 માં વિદેશમાંથી આયાત પણ વધી છે. તેનું મુખ્ય કારણ ક્રૂડ ઓઈલ, સોનું અને અન્ય કોમોડિટીના આંતરરાષ્ટ્રીય ભાવમાં વધારો છે. જેના કારણે ભારતના આયાત બિલમાં વધારો નોંધાયો છે. 2021-22 માં ભારતની આયાત વધીને 610.22 બિલિયન ડૉલર થઈ ગઈ છે. જે છેલ્લાં 9 વર્ષમાં સૌથી વધારે છે. માર્ચ 2022માં ભારતે વિદેશમાંથી 59.07 બિલિયન ડૉલરના માલની આયાત કરી છે. તેનું કારણ માર્ચમાં વેપાર ખાધ પણ વધીને 18.69 બિલિયન ડૉલર થઈ ગઈ.