ક્રિકેટ / સુર્યકુમારે સર કર્યો ટી-20 ક્રિકેટનો કિલ્લો, બન્યો 2022ના વર્ષનો સર્વશ્રેષ્ઠ ક્રિકેટર, મોટા ખેલાડીઓ હાંફી ગયા

• ટીમ ઈન્ડીયાના સ્ટાર ખેલાડી સુર્યકુમાર યાદવ જીત્યો મોટો એવોર્ડ
• બન્યો 2022ના વર્ષનો સર્વશ્રેષ્ઠ ટી20 ક્રિકેટર
• 2022માં ટી-20 ફોર્મેટમાં મચાવી હતી ધૂમ 

ભારતીય ક્રિકેટ ટીમના સ્ટાર બેટ્સમેન સૂર્યકુમાર યાદવે ફરી એકવાર વિશ્વ ક્રિકેટમાં પોતાનો જાદુ પાથર્યો છે. ટીમ ઈન્ડિયાના આ દમદાર બેટ્સમેનને 2022ના સર્વશ્રેષ્ઠ પુરુષ ટી-20 બેટ્સમેન જાહેર કરવામાં આવ્યો છે. આંતરરાષ્ટ્રીય ક્રિકેટ કાઉન્સીલે સુર્યકુમારને મળેલા આ વિશેષ સન્માનની જાહેરાત બુધવારે તેના વાર્ષિક એવોર્ડથી કરી હતી. સૂર્યકુમાર યાદવે આ રેસમાં ઈંગ્લેન્ડના સેમ કરન, ઝિમ્બાબ્વેના સિકંદર રઝા અને પાકિસ્તાનના મોહમ્મદ રિઝવાનને હરાવ્યા હતા. સૂર્યકુમાર યાદવ ટી-20 ફોર્મેટમાં નંબર-1 બેટ્સમેન પણ છે, સાથે જ હવે તે ટી-20 ફોર્મેટમાં ક્રિકેટર ઓફ ધ યર પણ બની ગયો છે.

India's Suryakumar Yadav named ICC Men's T20I Cricketer of the Year for 2022 #ICCAwards

— Press Trust of India (@PTI_News) January 25, 2023

2022નું આખું વર્ષ સુર્યકુમાર યાદવને નામે રહ્યું 
2022માં સૂર્યકુમાર યાદવે 31 મેચોમાં 1164 રન બનાવ્યા હતા, જે લગભગ 47ની એવરેજથી આવ્યા હતા. આ દરમિયાન સૂર્યકુમારનો સ્ટ્રાઇક રેટ 187.43 રહ્યો હતો જે કોઈ પણ ખેલાડી કરતા સૌથી વધારે હતો. સુર્યકુમાર યાદવ કોઈ પણ એક કેલેન્ડર વર્ષમાં ટી-20 ક્રિકેટમાં 1000 કે તેથી વધુ રન ફટકારનારો સૌપ્રથમ ભારતીય ખેલાડી બન્યો હતો. 2022માં તેણે 68 છગ્ગા ફટકાર્યા હતા. સૂર્યાએ એકલા હાથે ઘણી મેચોમાં ટીમ ઈન્ડિયા માટે આખી રમતને ફેરવી નાખી હતી.

સૂર્યકુમાર યાદવનો આંતરરાષ્ટ્રીય ટી-20નો રેકોર્ડ
45 મેચ, 43 ઇનિંગ્સ
1578 રન, 46.41 એવરેજ
180.34 સ્ટ્રાઇક રેટ, 3 સદી
142 ચોગ્ગા, 92 છગ્ગા

ટી-20માં સૂર્યકુમાર યાદવનો શ્રેષ્ઠ સ્કોર

• 117 ઇંગ્લેન્ડ વિરુદ્ધ, 2022
• 112*  શ્રીલંકા વિરુદ્ધ, 2023
• 111* ન્યુઝીલેન્ડ વિરુદ્ધ, 2022

ટી-20 ફોર્મેટમાં ભારતીયોનો દબદબો
આઇસીસીએ તાજેતરમાં જ ટી-20 ટીમ ઓફ ધ યરની પણ જાહેરાત કરી હતી, જેમાં ભારતના ત્રણ ખેલાડીઓનો સમાવેશ થાય છે. ભારત તરફથી સૂર્યકુમાર યાદવ, વિરાટ કોહલી અને હાર્દિક પંડ્યાને સ્થાન અપાયું હતું. ટીમ ઈન્ડિયા હાલમાં આઈસીસી રેન્કિંગમાં નંબર-1 ટીમ છે. ગઈકાલે ન્યૂઝીલેન્ડને વન-ડે શ્રેણીમાં 3-0થી હરાવ્યા બાદ ભારત વન-ડે રેન્કિંગમાં પણ નંબર-1 બની ગયું છે.