BIG NEWS / પેંગોંગ સરોવર પર બીજો પુલ બનાવવાની ચીનની ચાલાકી પર ભારતે આપ્યો વળતો જવાબ, કહ્યું અમારું બધે જ ધ્યાન છે

• ચીન અને ભારત માટે પેંગોંગ તળાવની મહત્વપૂર્ણ ભૂમિકા  
• સેટેલાઈટ તસવીરોમાં જોવા મળ્યું બીજા પુલનું બાંધકામ 
• પૂર્વી લદ્દાખમાં બન્ને દેશના 50,000થી વધુ સૈનિકો તૈનાત  

પેંગોંગ તળાવ ઉપર બની રહ્યો છે બીજો પુલ
પૂર્વી લદ્દાખમાં મહત્વપૂર્ણ પેંગોંગ તળાવની નજીક ચીન પોતાના કબજા હેઠળના વિસ્તારમાં બીજો પુલ બનાવી રહ્યું છે. આ અંગે વિદેશ મંત્રાલયના પ્રવક્તા અરિંદમ બાગચીએ ગુરુવારે કહ્યું હતું કે અમને આ અંગેના સમાચારની જાણ છે. જે વિસ્તારનો ઉલ્લેખ કરવામાં આવી રહ્યો છે, અમને લાગે છે કે આ વિસ્તાર કબજે કરવામાં આવ્યો હતો. અમે આ ઘટનાક્રમ ઉપર નજર રાખી રહ્યા છીએ. અમે રાજનીતિક અને લશ્કરી બંને સ્તરે આ સંદર્ભે ચીની પક્ષ સાથે વાતચીત કરી રહ્યા છીએ. સેટેલાઇટ તસવીરોમાં બતાવવામાં આવ્યું છે કે ચીન પેંગોંગ તળાવની આસપાસ તેના કબજા હેઠળના વિસ્તારમાં બીજો પુલ બનાવી રહ્યું છે જે ચીની સેના માટે ઝડપથી તેના સૈનિકોને આ ક્ષેત્રમાં પરિવહન કરવામાં મદદરૂપ થઈ શકે છે. બે વર્ષથી પૂર્વી લદ્દાખમાં અનેક જગ્યાઓ પર ભારત અને ચીની સેનાઓ વચ્ચે ચાલી રહેલા તણાવો વચ્ચે આ પુલનું નિર્માણ કરવામાં આવી રહ્યું છે.

#WATCH | We have seen reports on this bridge or a second bridge... we are monitoring the situation. Of course, we always felt it was occupied...Talks on with the Chinese side: MEA spox Arindam Bagchi on reports of another bridge at Pangong Lake pic.twitter.com/h3LcE0astU

— ANI (@ANI) May 19, 2022

પેંગોંગ તળાવ વિસ્તારમાં બંને દેશો વચ્ચે પહેલાથી જ તણાવ રહ્યો છે
ઓગસ્ટ 2020 માં ચીની સૈનિકોએ આ વિસ્તારમાં ભારતીય સૈનિકોને પાછળ ધકેલવાનો પ્રયાસ કર્યો હતો જેનો વળતો જવાબ ભારતીય સેન્ય તરફથી મળ્યો હતો અને પેંગોંગ તળાવના દક્ષિણ કાંઠે અનેક મહત્વના શિખરો પર કબજો કર્યો હતો. ત્યાર બાદથી જ ચીન પોતાના સૈન્યના માળખાને મજબૂત કરવા પર ધ્યાન આપી રહ્યું છે. ભારત સૈન્ય પણ પણ સામે ટકી શકે તેના સંપૂર્ણ પ્રયત્નોના ભાગરૂપે સરહદી વિસ્તારોમાં પુલો, રસ્તાઓ અને ટનલનું નિર્માણ પણ કરી રહ્યું છે. ચીને તાજેતરમાં જ આ વિસ્તારમાં પ્રથમ પુલનું નિર્માણ કાર્ય પૂર્ણ કર્યું છે. નવો પુલ વાસ્તવિક નિયંત્રણ રેખા (LAC)થી 20 કિમી વિસ્તારમાં બનાવવામાં આવી રહ્યો છે.

સેટેલાઇટ ફોટામાં જોવા મળ્યું પુલનું નિર્માણ
એલએસી પર ચીનની ગતિવિધિઓ પર નજર રાખતા ભૂ-સ્થાનિક ગુપ્તચર સંશોધક ડેમિયન સાઈમન ટ્વિટર પર નવા બાંધકામની સેટેલાઇટ-લીધેલી તસવીરો પોસ્ટ કરી હતી. સાઈમને ટ્વિટર પર જણાવ્યું હતું કે પ્રથમ પુલની સમાંતર એક મોટો પુલ બનાવવામાં આવી રહ્યો છે, આ નિર્માણનું લક્ષ્ય કદાચ તળાવ પર સેન્યની ભારે અવર જવર  કરવામાં મદદ કરવાનું છે. સાઈમન દ્વારા પોસ્ટ કરવામાં આવેલી સેટેલાઇટ તસવીરો બતાવે છે કે પુલને બંને બાજુથી બનાવવામાં આવી રહ્યો છે.

LAC પર બંને દેશના 50,000 થી 60,000 સૈનિકો તૈનાત
ભારત સતત એ પ્રયાસ કરી રહ્યું છે કે દ્વિપક્ષીય સંબંધોના વિકાસ માટે એલએસી પર શાંતિ કાયમ રહે. હાલમાં સંવેદનશીલ વિસ્તારમાં વાસ્તવિક નિયંત્રણ રેખા પર બંને તરફથી લગભગ 50,000 થી 60,000 સૈનિકો છે. પૂર્વી લદ્દાખના પ્રશ્નોને દૂર કરવા માટે ભારત અને ચીન વચ્ચે અત્યાર સુધીમા અનેક વાર સૈન્ય મંત્રણા થઈ ચૂકી છે. વાતચીતના પરિણામે સ્વરૂપે બંને પક્ષોએ પેંગોંગ તળાવના ઉત્તરીય અને દક્ષિણ કાંઠેથી અને ગોગરા વિસ્તારમાંથી સૈનિકોને પાછા ખેંચવાની કામગીરી પૂર્ણ કરી હતી.