કોવિડ 19 / આ પાંચ કોરોના વેક્સિન પર નિર્ભર કરે છે ભારતની આશા, જાણો આ રસીની સંપૂર્ણ વિગત

• ભારતમા આવી શકે છે આ વેક્સિન 
• હાલ ભારત પાસે 5 વેક્સિનના વિકલ્પ ઉપલબ્ધ 
• ભારતની સ્વદેશી કોવેક્સિન પણ સામેલ 

આ પાંચ વેક્સિનના વિકલ્પો પર ભારતની નજર ટકેલી છે. 

ઓક્સફોર્ડ - એસ્ટ્રાઝેનેકાની કોવિશીલ્ડ વેક્સિન 

આ વેક્સિન બ્રિટિશ યુનિવર્સિટી ઓક્સફોર્ડ અને એસ્ટ્રાઝેનેકા ફાર્મા કંપનીની બનાવેલી છે, ભારતમાં સૌથી વધુ આ વેક્સિનની રાહ જોવાઈ રહી છે, કેમ કે ભારતીય કંપની સીરમ ઇન્સ્ટિટ્યૂટ ઓફ ઈન્ડિયા SII તેનું ઉત્પાદન કરી રહી છે, હાલમાં ભારતમાં તેના અંતિમ તબક્કાના ટ્રાયલ્સ ચાલી રહ્યા છે, આ વેક્સિન ના અત્યાર સુધીના પરિણામોના આધારે કહી શકે કે વાયરસ પર 62 થી 90 ટકા જેટલી અસરકારક છે. 

જો કે બે સ્ટેજના સંયુક્ત પરિણામોને આધારે કહી શકાય કે તેની એવરેજ અસરકારકતા 70 ટકાની આસપાસ છે, આ રસી ઓછામાં ઓછા છ મહિના સુધી બે થી આઠ ડિગ્રી સેલ્શિયસ તાપમાને સંગ્રહિત કરી શકાય છે, અને ભારતમાં તેની કિંમત 500 થી 600 રૂપિયાની આસપાસ હોય શકે છે. આ રસીને પૂર્ણ રીતે મંજૂરી મળતા 3 જેટલા મહિના લાગી શકે છે. 

અમેરિકન કંપની મોડર્નાની વેક્સિન 

આ વેક્સિન અમેરિકી કંપની બનાવી રહી છે, તાજેતરની તેની ઘોષણા પ્રમાણે તેના ત્રણેય સ્ટેજના ટ્રાયલ્સ થઈ ચૂક્યા છે અથવા અંતિમ ચરણમાં છે, આ રસી હાલ તેના એપ્રૂવલ સ્ટેજમાં હોવાનું મનાઈ રહ્યું છે, તેના પરિણામોના આધારે કંપનીએ કહ્યું હતું કે આ રસી સૌથી વધુ 94.5 ટકા જેટલી અકસીર છે અને સુરક્ષા પૂરી પાડે છે, હાલમાં આ રસીના 20 કરોડ ડોજ બનાવી શકાય છે, તેને 2 થી 8 ડિગ્રી તાપમાન પર 1 મહિના અને માઇનસ 20 ડિગ્રી તાપમાન પર 6 મહિના સુધી સ્ટોર કરી શકાય છે. 

આ રસી ભારત માટે મોંઘી છે પરંતુ તે અમેરિકી સરકારની મંજૂરી બાદ વહેલી ઉપલબ્ધ થઈ શકે છે, આ રસીના બે ડોજ લેવા પડી શકે છે જેની પ્રત્યેકની કિમત 25 થી 37 ડોલર અર્થાત 1800 થી 2800 રૂપિયા વચ્ચે હશે, બે ડોજની કુલ કિમત 50 થી 70 ડોલર બની શકે છે. 

ફાઇઝરની કોરોના રસી

 યુએસ સ્થિત ફાર્માસ્યુટિકલ કંપની ફાઇઝર અને તેની જર્મન ભાગીદાર બાયોએન્ટેક દ્વારા ઉત્પાદિત કોરોના રસી માટે પરવાનગી માટે શુક્રવારે ફૂડ એન્ડ ડ્રગ એડમિનિસ્ટ્રેશન (એફડીએ) પાસે અરજી કરવામાં આવી હતી. આ માટે 10 મી ડિસેમ્બરે બેઠક યોજાવાની છે. 

ઇમ્યુનાઇઝેશન પ્રોગ્રામના વડા ડોક્ટર મોંસેફ સ્લુએ જણાવ્યું હતું કે રસીકરણ પ્રોગ્રામ સાઇટ્સ પર મંજૂરીના 24 કલાકમાં રસી આપવામાં આવશે અને રસીકરણનો કાર્યક્રમ 11 કે 12 ડિસેમ્બરથી શરૂ થશે. તે જ સમયે, ફાઇઝર કંપનીના રસીકરણમાં 21 દિવસના તફાવત પર રસીના બે ડોઝ ઇન્જેક્ટ કરવામાં આવશે. આ રસીને જો કે સ્ટોર કરવામાં કઠણાઇ ઊભી થશે, તેને માઇનસ 20 થી 70 જેટલું તાપમાન જોઈએ છે 

આ રસીની અસરકારકતા 90 થી 95 ટકા સુધીની માપવામાં આવી છે. આ રસી પણ ભારત માટે મોંધી બની શકે છે, જો કે તે પણ એપ્રૂવલ સ્ટેજમાં છે.  આ રસીની કિમત પ્રતિ ડોજ 1400 રૂપિયા જેટલી છે એટલે કે 19.50 ડોલર અર્થાત બંને ડોજની કિંમત 39 ડોલર જેટલી છે. 

સ્પુટનીક 5 કોરોના વેક્સિન 

આ વેક્સિન રશિયન વેક્સિન છે અને ભારતમાં તેના ઉત્પાદન માટે ડો. રેડ્ડીજ લેબોરેટરી કંપની સાથે કરવામાં આવ્યો છે. આ રસીના બીજા અને ત્રીજા સ્ટેજના ટ્રાયલ માટે મંજૂરી અપાઈ છે. કાનપુરમાં તેના ટ્રાયલ માટેની પ્રક્રિયા પણ શરૂ થઈ ગઈ છે, આ રસી માટેની કિંમત જો કે હજુ જાણી શકાઈ નથી. 
 
કોવેક્સિન - ભારતની વેક્સિન 

ભારતની સ્વદેશી કોવેક્સિનના હજુ ત્રીજા ચરણના ટ્રાયલ્સ ચાલી રહ્યા છે, તેના અગાઉના પરિક્ષણોને આધારે બનાવનારી કંપની ભારત બાયોટેકે કહ્યું છે કે તેના પરિણામો ઉત્સાહ વધારનારા અને સારા છે, કંપનીના એક નિવેદનના આધારે એવું મનાઈ રહ્યું છે કે આ રસીની હાલની અસરકારકતા 60 ટકા જેટલી આવી શકે છે, જો કે ફાઇનલ પરિણામોને હજુ વાર છે. જો કે લેટેસ્ટ અહેવાલ પ્રમાણે આ રસીનો જથ્થો ટ્રાયલ માટે અમદાવાદની સોલા સિવિલ હોસ્પિટલમાં આવી ગયો છે.