ભારતમાં કોરોના વાયરસ મહામારી વિશ્વના તમામ દેશોની સરખામણીમાં સૌથી વધુ ઝડપથી ફેલાઈ રહી છે. છેલ્લા એક જ અઠવાડિયામાં કેસમાં 20%ના ઉછાળા સાથે દેશમાં 14 લાખથી વધારે પોઝિટિવ કેસીસ સામે આવ્યા છે.
1.3 અબજથી વધુની વસ્તી ધરાવતા ભારતમાં 14.3 લાખથી વધારે કેસ ઉપરાંત 32,771 લોકોના મોત થયા છે જે અહેવાલ આરોગ્ય મંત્રાલયે આપ્યો છે. સોમવારે વિક્રમજનક 50,000 નવા કેસ નોંધાયા હતા. ભારત હવે સૌથી વધુ કુલ કેસમાં અમેરિકા અને બ્રાઝીલથી પાછળ ત્રીજા ક્રમે છે જયારે ભારતમાં કેસની વૃદ્ધિ વિશ્વમાં સૌથી ઝડપી છે.
મહારાષ્ટ્ર, તામિલનાડુ, આંધ્રપ્રદેશ અને કર્ણાટક એવા રાજ્યો છે જ્યાં સૌથી વધારે દૈનિક કેસ નોંધાય છે. જો કે આ સાથે જ ICMRએ અહેવાલ આપ્યો છે કે દેશમાં ગયા રવિવારે 5,15,472 સેમ્પલ ટેસ્ટ કરાયા છે જે અત્યાર સુધીના સૌથી વધારે છે. આમ દેશમાં ટેસ્ટિંગની ઝડપ વધારવામાં આવી છે.
ભારત અને બ્રાઝીલમાં વિશ્વના પ્રતિ 1000 વ્યક્તિ સૌથી ઓછા ટેસ્ટિંગ થઇ રહ્યા છે. ભારતમાં પ્રતિ 1000 વ્યક્તિ 11.8 ટેસ્ટ અને બ્રાઝીલમાં 11.93 ટેસ્ટ કરવામાં આવે છે. જેની સરખામણીમાં અમેરિકામાં પ્રતિ 1000 વ્યક્તિ 152.98 ટેસ્ટ થાય છે જયારે રશિયામાં 184.34 ટેસ્ટ થાય છે. આ ડેટા યુનિવર્સીટી ઓફ ઓક્સફર્ડ UK દ્વારા કલેક્ટ કરવામાં આવ્યો છે.