ભારત અને ઓસ્ટ્રેલિયા વચ્ચે રમાનારી બહુચર્ચિત ટેસ્ટ શ્રેણીની મેચ માટે સ્થળ નક્કી કરી લેવામાં આવ્યું છે. ક્રિકેટ ઓસ્ટ્રેલિયાએ ચાર ટેસ્ટની બોર્ડર-ગાવસ્કર શ્રેણીના મુકાબલા માટે બ્રિસબેન, એડિલેડ, મેલબર્ન અને સિડની શહેરની પસંદગી કરી છે. એડિલેડ ખાતે રમાનારી ડે-નાઇટ ટેસ્ટ મૅચ હશે. મળતા અહેવાલ અનુસાર ક્રિકેટ ઓસ્ટ્રેલિયાના મુખ્ય કાર્યકારી અધિકારી કેવિન રોબર્ટ્સ આવતીકાલે એટલે કે શુક્રવારે આ અંગેની સત્તાવાર જાહેરાત કરશે.
ભારતીય ટીમ આ વર્ષે ઓક્ટોબરમાં ઓસ્ટ્રેલિયાનો પ્રવાસ કરશે. જ્યાં ટીમ ઇન્ડિયા આઇસીસી ટી-૨૦ વિશ્વકપ (જો રમાય તો) બાદ ટેસ્ટ અને વન ડે શ્રેણી યજમાન ઓસ્ટ્રેલિયા સામે રમશે. તા.૩ ડિસેમ્બરથી ટેસ્ટ શ્રેણીની શરૂઆત થશે. જ્યારે પ્રવાસનો અંત જાન્યુઆરીમાં વન-ડે શ્રેણી સાથે થશે. આ પ્રવાસ દરમિયાન ભારત ચાર ટેસ્ટ મેચ અને ત્રણ વન-ડે મેચની શ્રેણી રમશે.
ભારત જશે ઓસ્ટ્રેલિયા
ઘણા સમય પછી રમાશે ક્રિકેટ
ભારત-ઓસ્ટ્રેલિયા વચ્ચે શ્રેણીની પ્રથમ ટેસ્ટ બ્રિસબેનના ગાબામાં તા. ૩થી ૭ ડિસેમ્બર દરમિયાન રમાશે. બીજી ટેસ્ટ મેચ ૧૧થી ૧૫ ડિસેમ્બર દરમિયાન એડિલેડ ઓવલમાં રમાશે. આ મેચ પિન્ક બોલથી રમાશે. બંને દેશ વચ્ચે રમાનારી આ પ્રથમ ડે-નાઇટ ટેસ્ટ હશે. તારિખ 26 થી 30 ડિસેમ્બર દરમિયાન ભારત-ઓસ્ટ્રેલિયા વચ્ચે બોક્સિંગ ડે-ટેસ્ટ મેચ રમાશે. આ મેચ મેલબર્નમાં રમાશે. શ્રેણીની ચોથી અને અંતિમ ટેસ્ટ માટે સિડનીની પસંદગી કરવામાં આવી છે.
ભારતીય ટીમ પોતાના ટેસ્ટ ક્રિકેટના ઇતિહાસમાં બીજી વાર ડે-નાઇટ ટેસ્ટ રમશે. આ પહેલાં ભારતીય ટીમે બાંગ્લાદેશ વિરુદ્ધ પિન્ક બોલ ટેસ્ટ કોલકાતામાં રમી હતી. જ્યારે ઓસ્ટ્રેલિયાની ટીમ અત્યાર સુધીમાં કુલ આઠ ડે-નાઇટ ટેસ્ટ રમી ચૂકી છે, જેમાંથી સાત મૅટમાં જીત સાંપડી છે. તેમજ એક ટેસ્ટ ડ્રો રહી છે.
ટીમ ઇન્ડિયાના ખેલાડીઓ પણ ઓસ્ટ્રેલિયા સામેની ટેસ્ટ શ્રેણી રમવા ઉત્સુક છે. થોડા સમય પહેલાં રોહિત શર્માએ ઓસી. સામે ટેસ્ટ શ્રેણી અંગે વાત કરતાં કહ્યું હતું કે, ''આ વખતે વોર્નર અને સ્ટીવ સ્મિથની હાજરીમાં ઓસ્ટ્રેલિયા સામેની ટેસ્ટ શ્રેણી આસાન નહીં હોય.''
ટીમ ઇન્ડિયાએ ૨૦૧૮માં ઓસ્ટ્રેલિયાના પ્રવાસ દરમિયાન ટેસ્ટ શ્રેણીમાં 2-1થી ઐતિહાસ જીત હાંસલ કરી હતી. એવું પહેલી વાર બન્યું હતું, જ્યારે ભારતે ઓસ્ટ્રેલિયાની ધરતી પર રમતા ટેસ્ટ શ્રેણી જીતી હતી. વિરાટ કોહલી આવું કરનારો પ્રથમ ભારતીય કેપ્ટન બન્યો હતો.