દેશની પ્રથમ રેલવે યુનિવર્સિટી વડોદરામાં બનશે. રેલવે યુનિવર્સિટી માટે રેલવે વિભાગ દ્વારા વડોદરાના પીપળીયા ખાતે જમીન માંગવામાં આવી હતી. પીપળીયામાં 31 હેક્ટર જમીન 50 ટકાના ભાવે આપવાના નિર્ણયને કેબિનેટમાં મંજૂરી મળી હતી. હવે આ જમીન પર રેલવે વિભાગ દ્વારા રેલવે યુનિવર્સિટીનું નિર્માણકાર્ય શરૂ કરશે.
નાયબ મુખ્યમંત્રી નીતિન પટેલે પત્રકાર પરિષદ યોજી હતી. જેમાં તેમણે ભારત સરકારના રેલવે વિભાગ દ્વારા રેલવે યુનિ. બનાવવાની જાહેરાત કરી હતી. જેને લઈને મુખ્યમંત્રીની અધ્યક્ષતામાં મળેલી કેબિનેટની બેઠકમાં રેલવે યુનિ.ને જમીન ફાળવવાનો નિર્ણય કરવામાં આવ્યો હોવાની વાત કરી હતી. અડધી કિંમતે આ જમીનની ફાળવણી કરવામાં આવી છે.
નાયબ મુખ્યમંત્રી નીતિન પટેલે જણાવ્યું કે, ભારત સરકાર દ્વારા વડોદરા નજીક 30 હેક્ટર જમીનની માંગણી કરવામાં આવી હતી. પરંતુ રાજ્ય સરકારે 31 હેક્ટર જમીનની ફાળવણી કરવાનો નિર્ણય કર્યો છે. ત્યારે કલેક્ટર દ્વારા જમીનની ફાળવણી કરાશે અને ત્યારબાદ રેલવે યુનિ.નું નિર્માણ કાર્ય શરૂ કરાશે.
વધુમાં DyCM નીતિન પટેલે જણાવ્યું હતું કે, રેલવેના નેટવર્ક માટે આ યુનિવર્સીટી મહત્વની ભૂમિકા ભજવશે. તો આ રેલવે યુનિવર્સિટીનો ગુજરાતને પણ લાભ મળશે.
અત્રે ઉલ્લેખનીય છે કે, જાપાનના વડાપ્રધાન શિંજો આબેએ ગુજરાતની મુલાકાત લીધી હતી તે સમયે હાઇસ્પીડ ટ્રેનના નેટવર્ક સહિતના ભારતીય રેલવેને સુધારો કરી સુવિધા વધારવા માટે કરારો થયા હતા. આ માટે વડોદરામાં ઉભી થનારી રેલવે યુનિવર્સિટીમાં હાઇસ્પીડ રેલવે નેટવર્ક માટેના તજજ્ઞો પણ જાપાનના ટેક્નોક્રેટ્સની મદદથી તૈયારી કરવામાં આવશે. ત્યારે હવે નાયબ મુખ્યમંત્રી નીતિન પટેલે પ્રેસ કોન્ફરન્સ કરીને આ અંગે માહિતી આપી હતી.