અમેરિકન વિઝાની એપોઇન્ટમેન્ટ માટે ભારતીયોએ મહિનાઓમાં નહીં, પરંતુ વર્ષો સુધી રાહ જોવી પડશે. ભારતીયોને યુએસ વિઝા - B1 (બિઝનેસ) અને B2 (ટૂરિસ્ટ) માટે લાંબા સમય સુધી રાહ જોવી પડશે
અમેરિકાના બિઝનેસ અને ટૂરિસ્ટ વિઝાને લઈ મોટા સમાચાર
વિઝા માટે ભારતીયોએ 3 વર્ષ સુધી રાહ જોવી પડશે
ભારતીય અરજદારો માટે રાહ જોવાનો સમય 1000 દિવસની નજીક
જો તમે બિઝનેસ અને ટૂરિસ્ટ વિઝા મેળવ્યા બાદ અમેરિકા જવાનું વિચારી રહ્યા છો, તો તમારા માટે ખરાબ સમાચાર છે. કારણ કે અમેરિકન વિઝાની એપોઇન્ટમેન્ટ માટે ભારતીયોએ મહિનાઓમાં નહીં, પરંતુ વર્ષો સુધી રાહ જોવી પડશે. ભારતીયોને યુએસ વિઝા - B1 (બિઝનેસ) અને B2 (ટૂરિસ્ટ) માટે લાંબા સમય સુધી એટલે કે ત્રણ વર્ષ સુધી રાહ જોવી પડશે. સત્તાવાર આંકડાઓ અનુસાર યુએસ વિઝા માટે જોઈ રહેલા ભારતીય અરજદારો માટે રાહ જોવાનો સમય 1000 દિવસની નજીક છે.
યુએસ સ્ટેટ ડિપાર્ટમેન્ટની વેબસાઈટ પર સર્ચ કરવાથી જાણવા મળે છે કે, આજથી એટલે કે 23 નવેમ્બર સુધી B1/B2 વિઝા ઈન્ટરવ્યુ માટે રાહ જોવાનો સમય 961 દિવસ છે. તમને જણાવી દઈએ કે, ભારત અમેરિકાની સામે અમેરિકન વિઝા માટે લાંબા સમય સુધી રાહ જોવાનો મુદ્દો ઉઠાવી રહ્યું છે. જવાબમાં અમેરિકાએ કહ્યું છે કે, અમેરિકા માટે ભારત (વિઝા આપવાના સંદર્ભમાં) નંબર વન પ્રાથમિકતા છે.
જાણો કેટલા સમય સુધી રાહ જોવી પડશે ?
યુએસ સ્ટેટ ડિપાર્ટમેન્ટની વેબસાઇટ અનુસાર મુંબઈમાં રહેતા અરજદારો માટે રાહ જોવાનો સમય 999 દિવસ છે. હૈદરાબાદના અરજદારો માટે હ જોવાનો સમય 994 દિવસ છે. ચેન્નાઈવાસીઓએ યુએસ વિઝા માટે એપોઈન્ટમેન્ટ માટે 948 દિવસ રાહ જોવી પડશે, જ્યારે કેરળવાસીઓ માટે રાહ જોવાનો સમય 904 દિવસ છે. જોકે સ્પષ્ટપણે જણાવવામાં આવ્યું છે કે, આ એક અંદાજ છે કારણ કે કર્મચારીઓની સંખ્યા અને વર્કલોડના આધારે રાહ જોવાનો સમય બદલાઈ શકે છે.
ભારતના વિદેશ મંત્રીએ અમેરિકી વિદેશમંત્રી સાથે કરી હતી મુલાકાત
મહત્વનું છે કે, સપ્ટેમ્બરમાં વિદેશ મંત્રી એસ જયશંકરે યુએસની મુલાકાત લીધી હતી અને તે દરમિયાન તેમણે યુએસ સેક્રેટરી ઓફ સ્ટેટ એન્ટની બ્લિંકન સાથે વિઝા અરજીઓના બેકલોગનો મુદ્દો ઉઠાવ્યો હતો. આ મુદ્દા પર એક ટોચના અમેરિકન રાજદ્વારીએ કહ્યું કે, તેઓ આ મુદ્દા પર ખૂબ જ સંવેદનશીલ છે અને તેઓ વિશ્વભરમાં સમાન પરિસ્થિતિનો સામનો કરી રહ્યા છે, જે કોવિડના કારણે ઊભો થયેલ એક પડકાર છે.
શું કહ્યું અમેરિકી દૂતાવાસના વરિષ્ઠ અધિકારીએ ?
અમેરિકી દૂતાવાસના એક વરિષ્ઠ અધિકારીના જણાવ્યા અનુસાર 2023ના ઉનાળા સુધીમાં યુએસ વિઝા જાહેર કરવાની રાહ જોવાની અવધિમાં ઘટાડો થવાની સંભાવના છે અને વિઝા અરજીઓની સંખ્યા લગભગ 12 લાખ સુધી પહોંચવાની આશા છે. અધિકારીએ કહ્યું કે, ભારત યુએસ (વિઝા જાહેર કરવાના સંદર્ભમાં) માટે પ્રથમ નંબરની પ્રાથમિકતા છે. અમારો ઉદ્દેશ્ય આગામી વર્ષના મધ્ય સુધીમાં પરિસ્થિતિને કોવિડ-19 પહેલાના સ્તરે લાવવાનો છે.
ભારત એવા કેટલાક દેશોમાંનો એક છે જ્યાં કોરોનાવાયરસ સંબંધિત મુસાફરી પ્રતિબંધો હટાવ્યા પછી યુએસ વિઝા માટેની અરજીઓમાં નોંધપાત્ર ઉછાળો જોવા મળ્યો છે. અધિકારીએ જણાવ્યું હતું કે, વિઝા આપવા માટે લાંબા સમય સુધી રાહ જોવાના સમયને ધ્યાનમાં રાખીને યુએસ વધુ કર્મચારીઓની ભરતી અને 'ડ્રોપ બોક્સ' સુવિધાઓ વધારવા સહિત અનેક પહેલ કરી રહ્યું છે. તેમણે કહ્યું કે, દર મહિને લગભગ એક લાખ વિઝા આપવાની યોજના છે. અમેરિકાએ છેલ્લા એક વર્ષમાં લગભગ 82,000 વિઝા જાહેર કર્યા છે.