ઘેલછા / હજુ પણ આ રીતે લોકો ડાઉનલોડ કરી રહ્યાં છે TikTok, જો જો આવું કરવું ભારે પડી જશે

ટિકટોક પર પ્રતિબંધ મૂકાયો હોવાથી લોકો તેનો ઉપયોગ કરવા માટે જુદા જુદા કીમિયા શોધી રહ્યા છે. કોઈ તેને APK ફાઇલ દ્વારા ડાઉનલોડ કરી રહ્યું છે, તો કોઈ VPN દ્વારા એપ્લિકેશનનો એક્સેસ મેળવવાનો પ્રયાસ કરી રહ્યું છે, પરંતુ મોટાભાગની કોઈ પદ્ધતિ સફળ જઈ રહી નથી.

વોટ્સએપ પર એક APK ફાઇલની લિંક ઝડપથી વાયરલ થઈ રહી છે

આ દરમિયાન વોટ્સએપ પર એક APK ફાઇલની લિંક ઝડપથી વાયરલ થઈ રહી છે, જેના લીધે લોકોના ફોનમાં ટિકટોક ડાઉનલોડ થઈ શકે છે. જેવા યુઝર્સ આ લિંક પર ક્લિક કરે છે, તેમનો ફોન અજાણી એપ્લિકેશન ઇન્સ્ટોલ કરવાની પરવાનગી માંગે છે. હવે જ્યારે યુઝર્સ સેટિંગ્સમાં જઈને પરમિશન ON કરે છે, ત્યારે તેમને ઇન્સ્ટોલ કરવાનો ઓપશન મળે છે, અને એપ્લિકેશન ફોનમાં સરળતાથી કામ કરવા લાગે છે.

તમારા ફોન માટે ખતરો

જે લોકો આ પદ્ધતિનો ઉપયોગ કરીને ટિકટોકનો ઉપયોગ કરી રહ્યાં છે તેઓને ખબર નથી કે તેઓ કેટલું મોટું જોખમ લઇ રહ્યા છે. સૌ પ્રથમ તમને જણાવી દઈએ કે જ્યારે પણ કોઈ ફાઇલ ઓફિશ્યલી ઉપલબ્ધ હોતી નથી અને તમે તેની APK ફાઇલનો ઉપયોગ કરી રહ્યાં છો, ત્યારે તમે તે એપમાં કયા ફેરફાર કરવામાં આવ્યા છે તે જાણી શકતા નથી. આનો અર્થ એ છે કે તે સરળતાથી તમારા ફોનમાં માલવેર, સ્પાયવેર દાખલ કરી શકે છે, જેના પછી તમારો ખાનગી ડેટા APK ફાઇલ ડેવલપરને ટ્રાન્સફર કરી શકાય છે.

એટલું જ નહીં, તમે એ પણ જોયું જ હશે કે જ્યારે પણ આપણે નવી એપ્લિકેશન ડાઉનલોડ કરીએ છીએ, ત્યારે એપ્લિકેશન કેમેરા, ઓડિઓ, ગેલેરી, કોન્ટેક્ટ્સ, લોકેશન જેવા ઓપશન્સ સહિત ઘણી વસ્તુઓની પરવાનગી માંગે છે. તેથી જો તમે આ પરવાનગીની મંજૂરી આપો છો, તો ડેવલપર જાણી શકે છે કે તમે ક્યાં જઇ રહ્યા છો, તમે કોની સાથે વાત કરી રહ્યા છો. એટલે કે ડેવલપરને ફોનનો સંપૂર્ણ એક્સેસ મળી જાય છે.

ભૂલથી પણ ઇન્સ્ટોલ ન કરશો 

હકીકતમાં આ APK ફાઇલ એક અનઓફિશ્યલ વર્ઝન છે. કદાચ એવું બની શકે કે તે ઇન્ટરનેટ સર્વિસ પ્રોવાઇડરને બાયપાસ કરીને તમને ટિકટોકનો એક્સેસ આપે. આ એપ્લિકેશન જોવા અને વાપરવા માટે મૂળ  ટિકટોક જેવી જ લાગે છે, પરંતુ તેનો ઉપયોગ ભૂલથી પણ કરશો નહીં, કારણ કે આનાથી તમારા ડેટાને ખતરો રહે છે.