કોમનવેલ્થ અને એશિયન ગેમ્સમાં ગોલ્ડ તથા વર્લ્ડ ચેમ્પિયનશિપમાં સિલ્વર મેડલ જીતનાર ભારતના રેસલર બજરંગ પૂનિયા પુરુષ વિભાગની 65 કિગ્રા વર્ગની જાહેર થયેલી રેન્કિંગમાં નંબર વન રેસલર બન્યા છે. રેસલિંગની વૈશ્વિક સંસ્થા યુનાઇટેડ વર્લ્ડ રેસલિંગે રેસલરોનું રેન્કિંગ જાહેર કર્યું હતું.
જેમાં બજરંગે પોતાના વર્ગમાં બે સ્થાનનો જમ્પ મારીને પ્રથમ સ્થાન મેળવી લીધું છે. આ વર્ષે જોરદાર પ્રદર્શન કરી રહેલા બજરંગના હવે 96 પોઇન્ટ થઈ ગયા છે. બીજા સ્થાને રહેલા ક્યૂબાના રેસલર એલેઝાન્દ્રો એનિક કરતાં 30 પોઇન્ટ વધુ છે.
એનિકના 66 પોઇન્ટ છે. રશિયાનો રેસલર અખમદ ચેકોવ 62 પોઇન્ટ સાથે ત્રીજા ક્રમે છે. બજરંગ દેશનો એક માત્ર પરુષ રેસલર છે જેને રેન્કિંગમાં ટોપ-10માં સ્થાન મળ્યું છે. જ્યારે ભારતની પાંચ મહિલા રેસલર પોતાના વર્ગમાં ટોપ-10માં સ્થાન મેળવવામાં સફળ રહી છે.