પરાજય / Tokyo Olympics : કુશ્તીમાં સેમીફાઇનલ હાર્યા બજરંગ, ભારત માટે બ્રોન્ઝ મેડલની આશા હજુ જીવંત

• અગાઉ ઇરાનના પહેલવાનને હરાવીને પહોંચ્યા હતાં સેમી ફાયનલમાં 
• અજારબૈજાનના હરીફ અલીયેવ  સામે થયો પરાજય 
• 65 કિલોગ્રામ કુશ્તીમાં હવે બ્રોન્ઝ મેડલ માટે રમાશે મેચ 

65 કિલોગ્રામ કુશ્તીમાં બજરંગ પુનિયાનો અજારબૈજાનના હરીફ અલીયેવ  સામેની સેમીફાઇનલમાં પરાજય થયો હતો.

ત્રણ વખતનો વર્લ્ડ ચેમ્પિયન છે હરીફ 

અલીયેવ ત્રણ વાર વર્લ્ડ ચેમ્પિયન રહી ચૂક્યો છે અને રિયો ઓલિમ્પિકમાં કાંસ્ય પદક જીતી ચૂક્યો છે. અગાઉ પુનિયા સામે તેની મેચ પ્રો કુશ્તી લીગમાં થઈ હતી જેમાં પુનિયાનો વિજય થયો હતો. 

12-5 થી પરાજય

સેમી ફાયનલમાં પુનિયાનો 12-5 થી પરાજય થયો હતો. અલીયેવ પહેલેથી જ પુનિયા પર હાવી રહ્યો હતો. એક સમયે મોટી સરસાઈ હાંસલ કરતાં અલીયેવ 8-1 થી આગળ થઈ ગયો હતો. પરંતુ ફરી બજરંગ પુનિયાએ વાપસી કરતાં આશા જગાડી હતી. પુનિયાએ થોડા ડબલ પોઈન્ટ મેળવી લેતા સ્કોર 9-5 થઈ ગયો હતો. પરંતુ બીજા રાઉન્ડમાં તો અલીયેવ વધારે હાવી થઈ જતાં બજરંગ પુનિયાને હારનો સામનો કરવો પડ્યો હતો. 

આજનો દિવસ ઓલિમ્પિકમાં નિરાશાજનક 

આજે સવારે ભારતીય મહિલા હોકી ટીમનો બ્રિટન સામે ભારે રસાકસી બાદ પરાજય થયો હતો. ત્યાર બાદ 50 કિલો કેટેગરીમાં રેસલર સીમા બીસલાનો 3-1 થી પરાજય થયો હતો. ટ્યુનિશિયન રેસલર સારા હમદી સામે સીધી મેચમાં સીમાનો પરાજય થતો મેડલ જીતવાનું સ્વપ્ન પણ અધૂરું રહ્યું હતું. અને હવે ખૂબ આશા જગાડનાર રેસલર બજરંગ પુનિયા પણ ગોલ્ડની રેસમાંથી પછડાટ ખાઈને બહાર નીકળી ગયા હતાં. જો કે હજુ બજરંગ પાસેથી શનિવારે બ્રોન્ઝ મેડલ જીતવાની આશા રાખવામાં આવી રહી છે.