ભૂમિકા એક આદર્શ રૂપમાં નિભાવશે તો સ્વતઃ મહિલાનાં જીવન સ્તરમાં સુધારા સાથે તેમનો વિકાસ તીવ્ર ગતિથી થશે
ભારતની દીકરીઓનાં અદમ્ય સાહસને આખો દેશ આજે નમન કરી રહ્યો છે. ઓલમ્પિક રમતોમાં ભારતની પુત્રીઓએ દેશનું નામ રોશન કરીને મેડલ મેળવ્યા છે. ભલે તે પી.વી.સિંધુ હોય, મીરાંબાઇ ચાનુ કે પછી મહિલા હોકી ટીમ. મેરી કોમના દેશ માટેનાં યોગદાનને પણ ભૂલી ન જ શકાય. આ વાત તો થઇ રમત ગમતની, બીજી તરફ રાજકારણમાં મહિલાઓએ દેશના મહત્ત્વપૂર્ણ વિભાગો સંભાળ્યા છે. જેની પરથી સ્પષ્ટ થાય છે કે મહિલાઓ પરિવારની સાથે સાથે દેશ પણ સંભાળી શકે છે.
ભારત ભૂમિની કલ્પના એક નારી સ્વરૂપે કરાય છે
પ્રાચીન સમયથી જ ભારત ભૂમિની કલ્પના જ એક નારી અથાર્ત ભારત માતાનાં રૂપમાં કરાય છે, જે આજે પણ ભારત માતાનાં રૂપે ઓળખાય છે. તેની પૂજા પણ કરાય છે. એવું રાષ્ટ્ર અને સમાજ, જ્યાં પ્રાચીન કાળથી જ નારીની દેવીનાં રૂપમાં પૂજા થાય છે. ત્યાં જેમ જેમ સમયનું પૈડું ફર્યું તેમ તેમ દેવી રૂપી મહિલાઓને હાંસિયામાં લાવીને રાખી દીધી. મહિલાઓ વિરુદ્ધના અત્યાચાર, ક્રાઇમ ગણો કે દહેજ માટે શોષણ, આ બધી ધારણાઓથી સમાજમાં મહિલા સશક્તીકરણનો અવાજ બુલંદ થયો છે.
પુરુષોએ ભજવવાની છે મહત્ત્વની ભૂમિકા
સૌથી વિશેષ તો એ છે કે સશક્તીકરણ તો મહિલાઓનું થવાનું છે, પરંતુ તેમાં સૌથી મહત્ત્વની ભૂમિકા તો પુરુષોએ ભજવવાની છે. એક પિતા, પુત્ર, ભાઇ, પતિ અને મિત્રનાં રૂપમાં. જો પુરુષ આ ભૂમિકા એક આદર્શ રૂપમાં કરશે તો સ્વતઃ મહિલાનાં જીવન સ્તરમાં સુધારો અને તેમનો વિકાસ તીવ્ર ગતિથી થશે.
ગામ હોય કે શહેર, મહિલા સશક્તીકરણની ચર્ચાઓ થાય છે, પરંતુ જે ગતિથી સુધારાની પરિકલ્પના થાય છે તે ગતિથી તેમાં સુધારો જોવા મળતો નથી. આજે દરેક ક્ષેત્રમાં મહિલાઓ, પુરુષોના ખભાથી ખભો મિલાવીને ચાલી રહી છે, પરંતુ હંમેશાં એવું જોવા મળે છે કે સમાજ તેને નજરઅંદાજ કરે છે.
દેશમાં ૪૮.૧ ટકા મહિલાઓની વસ્તી
૨૦૧૧ની વસ્તી ગણતરી અનુસાર દેશની અડધી વસ્તી ૪૮.૧ ટકા મહિલાઓની છે. જ્યારે દેશની અડધી વસ્તી સંકટમાં હોય ત્યારે અડધી રહેલી વસ્તીનું કર્તવ્ય છે કે તે ચૂપચાપ ન બેસીને તેમનાં ઉત્થાન અને વિકાસમાં પોતાનું યોગદાન આપે. રાજા રામમોહનરાય, દયાનંદ સરસ્વતી, મહાત્મા ગાંધી, સ્વામી વિવેકાનંદ અને ગુરુ નાનક દેવ વગેરેએ મહિલા ઉત્થાન માટે કાર્ય કર્યું. તેમણે મહિલા સમાનતા જેવા વિષયોને સમાજની સમક્ષ ઉજાગર કર્યું અને મહિલા તેમજ પુરુષને એક સમાન અધિકારો આપવાની વાતો કરી.
મહિલા સશક્તીકરણની વાત તો થાય છે, પરંતુ તેની સાથે એ વાત પણ આવે છે કે દેશની મહિલાઓ દેશમાં કેટલી સુરક્ષિત છે. સરકાર દ્વારા મહિલાઓ માટે કેટલીક યોજનાઓ શરૂ કરાઇ છે. તેમાં મહિલાઓમાં ખુશી, એક નવી આશા અને સુરક્ષાની ભાવના પણ જોવા મળે છે. મહિલાઓના જીવન સ્તરમાં પહેલા કરતાં આવેલા બદલાવો પણ તેને જ આભારી છે. વર્તમાન સમયમાં મહિલાઓ દરેક ક્ષેત્રમાં પોતાનું યોગદાન આપી રહી છે. પછી તે સેના હોય કે પ્રશાસનિક સેવા, ગ્રામીણ વિકાસ, શિક્ષણ કે રાજનીતિક ક્ષેત્ર, દરેક જગ્યાએ મહિલાઓ પોતાના પરચમ લહેરાવી રહી છે. આજે એવુ કોઇ ક્ષેત્ર જ નથી જ્યાં મહિલાઓ કામ ન કરતી હોય.
ભારતીય નારી અબળા નહીં, સશક્ત છે
સોય બનાવવાના કામથી લઇને પ્લેન બનાવવાના કામ સુધી મહિલાઓની ભાગીદારી છે. આજની મહિલાઓ તો પ્લેન પણ ઉડાવી રહી છે. તેમ છતાં પણ તેમને કમજોર સમજવામાં આવે છે, તેમને નજરઅંદાજ કરાય છે. માત્ર આઠ માર્ચના રોજ મહિલા દિવસ આયોજિત કરીને નારીનો સર્વાંગી વિકાસ ન થઇ શકે. એક શિક્ષિત મહિલા આખા પરિવારને, સમગ્ર સમાજને શિક્ષિત કરે છે, પરંતુ કેટલીયે જગ્યાઓએ આજે મહિલાઓનું જે શોષણ થઇ રહ્યું છે તે દુર્ભાગ્યની વાત છે. જેને રોકવું માત્ર આપણી નહી, સમગ્ર સમાજની નૈતિક જવાબદારી છે.
આજની ભારતીય નારી અબળા નહીં, સશક્ત છે. તે દરેક પરિસ્થિતિમાં લડવાનું જાણે છે. આજે મહિલાઓએ સમાજ અને રાષ્ટ્રના વિકાસ અને પુનનિર્માણની બાગડોર પોતાના હાથથી પકડી છે. સમાજ અને રાષ્ટ્રના પ્રત્યેક વ્યક્તિનું એ કર્તવ્ય છે મહિલાઓના ઉત્થાનમાં પોતાનું દરેક શક્ય યોગદાન આપે, તો અને તોજ ભારત સમાજ અને રાષ્ટ્રના વિકાસની એક નવી ગાથા લખી શકશે.