હૈવાનિયત / લાતો મારી, વીજળીના ઝટકા આપ્યા, ચીની સેનાએ કીડનેપ કરેલ ભારતીય યુવક સાથે કર્યું હચમચાવી મૂકે એવું વર્તન

• અરુણાચલમાંથી કિડનેપ કરાયેલા કિશોરના પિતાએ ખુલાસો કર્યો
• ચીનની સેનાએ પોતાના દિકરા પર હૈવાનિયત ગુજારી
• પુરતુ ખાવાનું પણ આપતા નહીં, લાતો મારી, આંખો પર પટ્ટી બાંધી રાખતાં

થોડા દિવસ પહેલા ચીની સેના દ્વારા કિડનેપ કરવામાં આવેલા અરુણાચલ પ્રદેશના કિશોરને લઈને તેના પિતાએ ચોંકાવનારો ખુલાસો કર્યો છે. તેમણે કહ્યું કે, ચીની સેનાએ તેમના દિકરાને વિજળીના ઝટકા આપ્યા હતા. એક અધિકારીએ મંગળવારે કહ્યુ કે, અરુણાચલ પ્રદેશથી ચીની સેના દ્વારા કથિત રીતે અપહરણ કરાયેલા ભારતીય કિશોરને તેના પરિવાર સાથે ફરીથી મિલન કરાવી દીધું છે. ઘરે પાછા આવ્યા બાદ સ્થાનિક પ્રશાસન અને પંચાયત નેતાઓએ તેમનું જોરદાર સ્વાગત કર્યું હતું.

ચીની સેનાએ 27 જાન્યુઆરીએ પાછો સોંપ્યો હતો ભારતીય નાગરિક

17 વર્ષિય મિરામને ચીની સેનાએ 18 જાન્યુઆરીએ કંટ્રોલ રેખા પાસેથી લુંગટા જોર વિસ્તારમાંથી કથિત રીતે કિડનેપ કર્યો હતો. તે પોતાના મિત્ર જોની યેંગની સાથે શિકાર કરવા ગયો હતો. જોની યેંગ ઘટનાસ્થળેથી ભાગવામાં સફળ રહ્યો હતો. આ ઘટનાની જાણ તેમણે અધિકારીઓને આપી. ચીની સેનાએ મિરામને 27 જાન્યુઆરીએ અંજાવ જિલ્લાના કિબિથૂમાં વાચા દમઈ સંપર્ક બિદુ પર ભારતીય સેનાને સોંપ્યો હતો. જ્યાં તેને કોરન્ટાઈન કરવામાં આવ્યો હતો અને કાયદાકીય ઔપચારિકતા પુરી કરવામાં આવી હતી.

ચીને આંખો પર પટ્ટી બાંધી રાખી

એક રિપોર્ટમાં જણાવ્યા અનુસાર મિરામના પિતા ઓપાંગ તોરાને કહ્યું કે, તેમનો દિકરો માનસિક રીતે થાકેલો છે. કારણ કે, આખી ઘટનાથી તે ડરેલો હતો. પિતાએ આરોપ લગાવ્યો છે કે, એક અઠવાડીયાથી તે ચીનની આર્મીના કબ્જામાં રહેલા બાદ તેને બાંધી રાખવામાં આવ્યો હતો અને આંખો પર પટ્ટી બાંધી દેવામાં આવી હતી. તેમણે જણાવ્યું કે, તે હાલમાં પણ આઘાતમાં છે. તેની પીઠ પર લાત મારવામાં આવી હતી અને શરૂઆતમાં હળવા વિજળીના ઝટકા પણ આપવામાં આવ્યા હતા. મોટા ભાગના સમયે તેની આંખો પર પાટા બાંધી રાખવામાં આવતા હતા. કેદ દરમિયાન તેના બંને હાથ બંધાયેલા હતા. જ્યારે ખાવાનું આવતું ત્યારે જ હાથ ખોલવામાં આવતા હતા. પણ તેઓ પુરતુ ભોજન પણ આપતા નહીં.

પહેલા પણ ભારતીય નાગરિકોનું કિડનેપ કરી ચુક્યું છે ચીન

19 જાન્યુઆરીએ ટ્વિટર પર કિશોરના અપહરણની જાણકારી શેર કરનારા અરુણાચલ પૂર્વ નિર્વાચન વિસ્તારમાંથી ભાજપ સાંસદ તપીર ગાઓએ કહ્યું કે, મીરનને જિદોના ગ્રામિણ, અધિકારીઓ અને પંચાયત નેતાઓ દ્વારા ઉષ્માભર્યુ સ્વાગત કરવામાં આવ્યું છે. સપ્ટેમ્બર 2020માં પીએલએે કથિત રીતે અરુણાચલ પ્રદેશના ઉપરી ભાગના સુબનસિરી જિલ્લાના પાંચ છોકરાઓને લગભગ એક અઠવાડીયા બાદ છૂટા કર્યા હતા. તેમને પણ અંજો જિલ્લામાંથી પકડી લેવામાં આવ્યા હતા. અરૂણાચલ પ્રદેશ ચીની સાથે 1080 કિમી સરહદ શેર કરે છે.