ક્રિકેટ / શું મેચ રમવા માટે પાકિસ્તાન જશે ટીમ ઈન્ડિયા? જાણો BCCI નો શું છે પ્લાન

• ભારતીય ક્રિકેટ ટીમ આવતા વર્ષે જઈ શકે છે પાકિસ્તાન
• સુત્રો અનુસાર એશિયા કપ પાકિસ્તાનમાં યોજાશે
• ભારતીય ટીમ દ્વિપક્ષીય શ્રેણી પણ રમી શકે છે

ભારતીય ક્રિકેટ ટીમે લાંબા સમયથી પાકિસ્તાનનો પ્રવાસ ખેડયો નથી. સારા રાજકીય સંબંધોના અભાવે ભારત અને પાકિસ્તાન દ્વિપક્ષિય શ્રેણી રમતા નથી. ક્રિકેટ ચાહકોને આ બંને કટ્ટર હરીફ ટીમોની ટક્કર માત્ર અને માત્ર વર્લ્ડ કપ કે એશિયા કપ જેવી મોટી ટુર્નામેન્ટમાં જ જોવા મળે છે. પરંતુ હવે એક સમાચાર સામે આવી રહ્યા છે, હકીકતમાં મીડિયા રિપોર્ટ્સ અનુસાર, ભારત આવતા વર્ષે પાકિસ્તાનની મુલાકાત લઈ શકે છે.

એશિયા કપ 2023 પાકિસ્તાનમાં 
રિપોર્ટ અનુસાર ભારતીય ટીમ આવતા વર્ષે યોજાનારા એશિયા કપ માટે પાકિસ્તાનનો પ્રવાસ ખેડી શકે છે. વર્ષ 2023માં પાડોશી દેશ પાકિસ્તાન એશિયા કપની યજમાની કરશે એટલે આ ટુર્નામેન્ટ પાકિસ્તાનમાં જ રમાય તેવી શક્યતા છે. આ જ કારણ છે કે ભારતીય ટીમને પાકિસ્તાનનો પ્રવાસ પણ કરવો પડી શકે છે, પરંતુ આ બધું હોવા છતાં આ પ્રવાસ પર અંતિમ નિર્ણય ભારત સરકારની મંજૂરી પર નિર્ભર રહેશે. મીડિયા રિપોર્ટ જણાવે છે કે, હાલમાં તેને બીસીસીઆઇના એજન્ડામાં સામેલ કરવામાં આવ્યો છે.

2023 માં ચાર મોટી ટુર્નામેન્ટ
જણાવી દઈએ કે વર્ષ 2023માં ચાર મોટી ટૂર્નામેન્ટ થવા જઈ રહી છે. આવતા વર્ષે આઇસીસી વિમેન્સ વર્લ્ડ કપ (સાઉથ આફ્રિકા), આઇસીસી વિમેન્સ અંડર-19 વર્લ્ડ કપ (સાઉથ આફ્રિકા), એશિયા કપ (પાકિસ્તાન) અને આઇસીસી ક્રિકેટ વર્લ્ડ કપ (ભારત) વચ્ચે મુકાબલો ખેલાશે. એશિયા કપનું આયોજન 50 ઓવરના ફોર્મેટમાં થશે. આ ટૂર્નામેન્ટની યજમાની પાકિસ્તાન કરશે.

આ વર્ષે બે ક્રિકેટ ટીમે પાકિસ્તાનનો પ્રવાસ કર્યો
નોંધપાત્ર છે કે, મોટાભાગની ટીમો લાંબા સમયથી પાકિસ્તાનનો પ્રવાસ ખેડી શકી નહતી, પણ ભૂતકાળમાં પરિસ્થિતિ બદલાઈ ચૂકી છે અને કેટલીક ટીમો આગળ આવીને પાકિસ્તાનનો પ્રવાસ ખેડી ચૂકી છે. તાજેતરમાં જ ઈંગ્લેન્ડ અને શ્રીલંકાએ પાડોશી દેશનો પ્રવાસ ખેડ્યો હતો. જોકે આ બધુ હોવા છતાં ક્રિકેટ ચાહકોએ એ પણ યાદ રાખવું પડશે કે એશિયા કપ ટુર્નામેન્ટ માટે યુએઈ હંમેશા વિકલ્પ તરીકે ઓપ્શનમાં રહે છે.