ક્રિકેટ / ભારતીય ટીમની આવનારી મેચોના ટાઇમ ટેબલની જાહેરાત, જાણો કોની સાથે ક્યારે રમશે મેચ

• ICC દ્વારા આગામી તબક્કાનો સંપૂર્ણ કાર્યક્રમ જાહેર કરવામાં આવ્યો
• વિશ્વની ટોચની 12 ટીમો કુલ મળીને 777 આંતરરાષ્ટ્રીય મેચો રમશે
• ભારત આ વર્ષે કુલ 23 આંતરરાષ્ટ્રીય મેચ રમશે

ICC દ્વારા આજે એટલે કે બુધવારે આગામી (2023-27)તબક્કાનો સંપૂર્ણ કાર્યક્રમ જાહેર કરવામાં આવ્યો છે. આ પ્રમાણે વિશ્વની ટોચની 12 ટીમો કુલ મળીને 777 આંતરરાષ્ટ્રીય મેચો રમશે. આ ઉપરાંત આઇસીસીની ચાર મેજર ટુર્નામેન્ટ પણ રમાશે. આઇસીસી દ્વારા નવી FTP(ફ્યૂચર ટૂર પ્રોગ્રામ) રજૂ થવાની સાથે જ ભારતીય ટીમના આગામી કાર્યક્રમનો પણ ખુલાસો થઇ ગયો છે. હાલ અમે તમને આ વર્ષે ટીમ ઇન્ડિયાની મેચો વિશે જણાવી રહ્યા છીએ...

ભારતીય ટીમ 23 આંતરરાષ્ટ્રીય મેચ રમશે.
ભારત આ વર્ષે કુલ 23 આંતરરાષ્ટ્રીય મેચ રમશે. આમાં તેને 12 વનડે, 9 ટી20 અને બે ટેસ્ટ મેચ રમવાની છે. ભારતને કુલ પાંચ દ્વિપક્ષિય શ્રેણી રમવાની છે. તેઓ ઓસ્ટ્રેલિયા, ઝિમ્બાબ્વે, સાઉથ આફ્રિકા, ન્યૂઝીલેન્ડ અને બાંગ્લાદેશ સામે ટકરાશે. એટલું જ નહીં ભારત આઈસીસીની બે મોટી ટૂર્નામેન્ટ ટી-20 વર્લ્ડ કપ અને એશિયા કપમાં પણ ભાગ લેશે.

ઓસ્ટ્રેલિયા અને દક્ષિણ આફ્રિકા ભારત પ્રવાસે
ભારતની દ્વિપક્ષીય શ્રેણીની વાત કરીએ તો તેઓ હાલ ઝિમ્બાબ્વેમાં છે અને આવતીકાલ એટલે કે 18 ઓગસ્ટથી ત્રણ વન ડેની શ્રેણી રમશે. આ સિરીઝ 22 ઓગસ્ટ સુધી હરારેમાં રમાશે. આ પછી ઓસ્ટ્રેલિયાની ટીમ ભારત આવીને 20-25 સપ્ટેમ્બર દરમિયાન ત્રણ ટી-20 મેચની શ્રેણી રમશે. ઓસ્ટ્રેલિયા બાદ સાઉથ આફ્રિકા ભારત પ્રવાસે આવશે અને તારીખ 28મી સપ્ટેમ્બરથી 11મી ઓક્ટોબર દરમિયાન ત્રણ ટી-20 અને ત્રણ વન ડે રમશે.

ન્યુઝીલેન્ડ અને બાંગ્લાદેશ આ વર્ષના અંતમાં પ્રવાસ કરશે
ટીમ ઈન્ડિયા નવેમ્બરથી વિદેશ પ્રવાસે જશે અને નવેમ્બરમાં સૌપ્રથમ ન્યૂઝીલેન્ડનો પ્રવાસ ખેડશે. અહીં તેઓ ત્રણ ટી-20 અને તેટલી જ વન ડે પણ રમશે. આ પછી ભારતીય ટીમ ચાલુ વર્ષના અંતભાગમાં ડિસેમ્બરમાં બાંગ્લાદેશ જશે અને વર્લ્ડ ટેસ્ટ ચેમ્પિયનશીપ અંતર્ગત બે ટેસ્ટ રમશે અને ત્યાર બાદ ત્રણ વન ડેની શ્રેણી સાથે પ્રવાસનો અંત આણશે.

આ વર્ષે આઈસીસીની બે મોટી ટૂર્નામેન્ટ થશે
ભારતીય ટીમ આ વર્ષે આઈસીસીની બે મોટી ટૂર્નામેન્ટમાં પણ ભાગ લેશે. આવામાં આ મહિનાની 27 તારીખથી તેઓ એશિયા કપમાં પોતાનું ટાઇટલ ડિફેન્ડ કરશે, જ્યાં તેમની પ્રથમ મેચ 28 ઓગસ્ટે પાકિસ્તાન સામે થશે. આ ટૂર્નામેન્ટ 11 સપ્ટેમ્બર સુધી યુએઈમાં રમાશે. આ પછી ટીમ ઈન્ડિયા 16 ઓક્ટોબરથી 13 નવેમ્બર દરમિયાન ઓસ્ટ્રેલિયામાં યોજાનારા ટી-20 વર્લ્ડ કપમાં સામેલ થઈ જશે.

દ્વિપક્ષીય શ્રેણી
ભારતનો ઝિમ્બાબ્વે પ્રવાસ : ત્રણ વન-ડે (17-22 ઓગસ્ટ 2022)
ઓસ્ટ્રેલિયાનો ભારત પ્રવાસઃ ત્રણ ટી-20 (સપ્ટેમ્બર-ઓક્ટોબર)
દક્ષિણ આફ્રિકાનો ભારત પ્રવાસ : ત્રણ ટી-20 અને ત્રણ વન-ડે (સપ્ટેમ્બર-ઓક્ટોબર)
ભારતનો ન્યૂઝીલેન્ડ પ્રવાસ : ત્રણ ટી-20 અને ત્રણ વન-ડે (નવેમ્બર)
ભારતનો બાંગ્લાદેશ પ્રવાસ : બે ટેસ્ટ અને ત્રણ વન-ડે (ડિસેમ્બર)

ICC ટુર્નામેન્ટ્સ:
એશિયા કપ: ટી-20 ટૂર્નામેન્ટ (27 ઓગસ્ટથી 11 સપ્ટેમ્બર, 2022)
ટી-20 વર્લ્ડ કપ, ઓસ્ટ્રેલિયા: (16 ઓક્ટોબર- 13 નવેમ્બર 2022)