ક્રિકેટ / IND vs SL: મેચ બાદ ભારતીય કપ્તાન ગબ્બરે કર્યું એવું કામ કે ટીમના પરાજય છતાં લોકો ખુશ થઈ ગયા, આપી શાબાશી

ભારત અને શ્રીલંકા વચ્ચે રમાયેલી ત્રીજી ટી-ટ્વેન્ટી શ્રેણીમાં ભારતીય ટીમનો પરાજય થયો હતો. શ્રીલંકાએ ઘરઆંગણે રમાયેલી શ્રેણી 2-1 થી જીતી લીધી હતી. શ્રેણીની આખરી મેચમાં શ્રીલંકા 7 વિકેટથી જીત મેળવી હતી. આ સાથે વન-ડે શ્રેણીમાં પરાજય બાદ શ્રીલંકાએ જોરદાર વાપસી કરી હતી.  

ખેલાડીઓ વચ્ચે મૈત્રી 
આ બંનેમાં ટીમના ખેલાડીઓ વચ્ચે બંને શ્રેણી દરમિયાન મૈત્રીસભર વાતાવરણ જોવા મળ્યુ હતું. આ અગાઉ બંને ટીમના ખેલાડીઓ  મેદાનમાં અને મેદાન બહાર તેમજ પ્રેક્ટિસ દરમિયાન એકબીજા સાથે વાતચીત કરતાં જોવા મળ્યા હતાં. 

હાર્દિક પંડયાએ ચમીકાને બેટ ભેટમાં આપ્યું 
ચમીક કરુણારત્ને ભારતીય ખેલાડી હાર્દિક પંડયાને પોતાનો રોલ મોડલ માને છે. કારણ કે કરુણારત્ને પણ ફાસ્ટ બોલર કમ ઓલરાઉન્ડર છે. તેને પોતાની ડેબ્યૂ મેચમાં જ પોતાના રોલ મોડલ પાસેથી એક બેટ ગિફ્ટ મળ્યું હતું. આ વાતની જાણકારી ખુદ ચમીકાએ પોતાના ઇન્સ્ટાગ્રામ હેન્ડલ પરથી આપી હતી. 

કેપ્ટન ધવને આપી ટિપ્સ 
ટ્વેન્ટી ટ્વેન્ટી સિરીઝની આખરી મેચ બાદ પણ આવું જ કઇંક જોવા મળ્યું હતું. ભારતીય કેપ્ટન શિખર ધવને શ્રીલંકન ખેલાડીઓ સાથે વાતચીત કરી હતી. ધવનને વર્ષોથી આંતરરાષ્ટ્રીય ક્રિકેટ રમવાનો અનુભવ હોવાથી શ્રીલંકન ખેલાડીઓને પણ આ અનુભવનો લાભ મળ્યો હતો. મેચ બાદ આખી શ્રીલંકન ક્રિકેટ ટીમ ભારતીય કેપ્ટન શિખર ધવનને ઘેરીને ઊભી રહેલી જોવા મળી હતી. 

Thank You India 🇮🇳
Spirit of Cricket @OfficialSLC @BCCI 👌
Love❤️from Sri Lanka 🇱🇰 !@SDhawan25 @hardikpandya7 #LKA #SriLanka #India #Cricket #INDvSL #SLvIND pic.twitter.com/8nWljHU2fF

— Sri Lanka Tweet 🇱🇰 (@SriLankaTweet) July 29, 2021

સોશ્યલ મીડિયા પર લોકોએ કર્યા વખાણ 
ટ્વેન્ટી ટ્વેન્ટી સિરીઝમાં ભારતનો પરાજય થવા છતાં ભારતીય કેપ્ટન શિખર ધવનને ટ્રોલ કરવામાં ન્હોતો આવ્યો. ઊલટું કેટલાક લોકોએ તેના ભરપેટ વખાણ કર્યા હતાં. આનું કારણ હતું ધવનની સ્પોર્ટસમેન સ્પિરિટ. ધવને મેચ પુરી થયા બાદ ખેલદિલીથી હારજીતને રમતનો એક ભાગ સમજીને શ્રીલંકન ખેલાડીઓ સાથે વાતચીત કરી હતી. યુવા ટીમના ખેલાડીઓને કેટલીક ટિપ્સ પણ આપી હતી. 

Great to see Indian skipper @SDhawan25 talking to the young Sri Lankan team sharing his experience. 🏏🇱🇰🇮🇳 pic.twitter.com/oIhNFZe36k

— Azzam Ameen (@AzzamAmeen) July 29, 2021

ભારતનો શરમજનક પરાજય
શ્રીલંકા સામે રમાઈ રહેલા મેચમાં T-20નાં ઈતિહાસનો સૌથી શરમજનક રેકોર્ડ સર્જાયો છે. સ્કોર બોર્ડ પર જ્યારે 10 ઓવર પૂર્ણ થયા ત્યારે સ્કોરબોર્ડ પર માત્ર 39 રન હતા અને 5 વીકેટ ભારતે ગુમાવી દીધેલ હતી. ભારતનાં ક્રિકેટ ઈતિહાસમાં T 20નો અત્યાર સુધીનો સૌથી ઓછો સ્કોર છે. ટીમનાં પાંચ શરૂઆતનાં બેટ્સમેન આઉટ થઈ ગયા. શ્રીલંકન સ્પિનર અને જબરદસ્ત કેચની સામે ભારતના બેટ્સમેનોએ જાણે ઘૂંટણિયા ટેકવી દીધા. ટીમનો એક પણ ખેલાડી ટકી ન શક્યો. શ્રીલંકન સ્પિનર હસરંગાએ પોતાના જન્મદિવસે રેકોર્ડ બનાવ્યો અને 9 રન આપીને ચાર ચાર વિકેટ ખેરવી લીધી.