શેરમાર્કેટ / વૈશ્વિક મંદીના એંધાણ વચ્ચે પણ ભારતીય શેરબજાર તેજીના તબક્કામાં, આ અઠવાડિયામાં ત્રણ શેરના રોકાણકારોએ કરી અઢળક કમાણી

• ભારતીય શેરબજાર તેજીના તબક્કામાં છે
• સેન્સેક્સની ટોચની 10 કંપનીઓમાંથી આઠની માર્કેટ કેપ રૂ. 42,173.42 કરોડ વધી
• આ કંપનીઓના રોકાણકારોએ ગયા અઠવાડિયામાં સૌથી વધુ કમાણી કરી

હાલ જ્યાં વૈશ્વિક મંદીના એંધાણ હતા એવામાં ભારતીય શેરબજાર તેજીના તબક્કામાં છે. છેલ્લા કેટલાક મહિનાના ગ્રાફ જોઈને ખબર પડશે તો બજાર તેજી અને મંદી વચ્ચે ઉપર જઈ રહ્યું છે અને સેન્સેક્સ અને નિફ્ટી નવા રેકોર્ડ હાઈ પર પહોંચી ગયા છે. બજારમાં આવી તેજીને કારણે રોકાણકારો પણ આડેધડ કમાણી કરી રહ્યા છે. એવામાં જો આપણે ગયા અઠવાડિયાના આંકડાઓ પર નજર કરીએ તો સેન્સેક્સની ટોચની 10 કંપનીઓમાંથી આઠની માર્કેટ કેપ રૂ. 42,173.42 કરોડ વધી છે. જેમાં સૌથી વધુ લાભમાં ICICI બેન્ક, ઇન્ફોસિસ અને ટાટા કન્સલ્ટન્સી સર્વિસિસ (TCS) ટોપ ગેઇનર હતા.એટલે કે આ ત્રણેય કંપનીઓના રોકાણકારોએ ગયા અઠવાડિયામાં સૌથી વધુ કમાણી કરી છે. 

રિલાયન્સ અને હિન્દુસ્તાન યુનિલિવરને થયું નુકસાન 
સેન્સેક્સની ટોચની 10 કંપનીઓમાંથી રિલાયન્સ ઇન્ડસ્ટ્રીઝ અને હિન્દુસ્તાન યુનિલિવર (HUL)ને બાદ કરતાં બાકીની આઠ કંપનીઓની માર્કેટ કેપ સમીક્ષા આ અઠવાડિયામાં વધી છે. જેમાં HDFC બેંક, સ્ટેટ બેંક ઓફ ઇન્ડિયા (SBI) અને HDFC બેંકનો સમાવેશ થાય છે. જો કે 30 શેરો ધરાવતો BSE સેન્સેક્સ સપ્તાહના અંતે 131.56 પોઈન્ટ અથવા 0.21 ટકાના ઘટાડા સાથે બંધ થયો હતો. આ અઠવાડિયા દરમિયાન ICICI બેન્કની માર્કેટ મૂડી રૂ. 9,706.86 કરોડ વધીને રૂ. 6,41,898.91 કરોડ થઈ હતી. ઈન્ફોસિસનું માર્કેટ વેલ્યુએશન રૂ. 9,614.89 કરોડ વધીને રૂ. 6,70,264.99 કરોડ થયું હતું. TCSનું માર્કેટ કેપિટલાઇઝેશન રૂ. 9,403.76 કરોડ વધીને રૂ. 12,22,781.79 કરોડ થયું હતું. ભારતી એરટેલનું માર્કેટકેપ રૂ. 5,869.21 કરોડ વધીને રૂ. 4,65,642.49 કરોડ અને HDFCનું માર્કેટકેપ રૂ. 3,415.33 કરોડ વધીને રૂ. 4,85,234.16 કરોડ થયું હતું. 

SBIનું મૂલ્યાંકન રૂ. 1,383 કરોડ વધ્યું 
જણાવી દઈએ કે HDFC બેન્કનું માર્કેટ વેલ્યુએશન રૂ. 1,508.95 કરોડ વધીને રૂ. 8,99,489.20 કરોડ થયું હતું. આ સાથે જ SBIનું મૂલ્યાંકન રૂ. 1,383.32 કરોડ વધીને રૂ. 5,37,841.73 કરોડ થયું છે. ઉપરાંત અદાણી એન્ટરપ્રાઇઝિસનું માર્કેટ કેપિટલાઇઝેશન રૂ. 1,271.1 કરોડ વધીને રૂ. 4,58,263.35 કરોડ થયું છે. જો કે આ વલણથી વિપરીત રિલાયન્સ ઇન્ડસ્ટ્રીઝનું માર્કેટ કેપ રૂ. 22,866.5 કરોડ ઘટીને રૂ. 17,57,339.72 કરોડ થયું હતું અને આ સાથે હિન્દુસ્તાન યુનિલિવરનું મૂલ્યાંકન રૂ. 4,757.92 કરોડ ઘટીને રૂ. 5,83,462.25 કરોડ થયું હતું.

ટોપ 10માં રિલાયન્સે પહેલું સ્થાન જાળવી રાખ્યું 
આ છતાં પણ ટોપ 10 કંપનીઓની યાદીમાં રિલાયન્સ ઇન્ડસ્ટ્રીઝે પોતાનું પહેલું સ્થાન જાળવી રાખ્યું છે અને આ લિસ્ટમાં તે પછી અનુક્રમે TCS, HDFC બેન્ક, Infosys, ICICI બેન્ક, હિન્દુસ્તાન યુનિલિવર, SBI, HDFC, ભારતી એરટેલ અને અદાણી એન્ટરપ્રાઇઝનો સમાવેશ થાય છે.