ચીનની એપ ટિકટોકની લોકપ્રિયતા ભારતમાં સતત વધતી જઈ રહી છે.યુવાનોથી લઈને વૃદ્ધો અને બાળકો પણ આ એપનો ઉપયોગ કરીને પોતાનો ટેલેન્ટ દુનિયાની સામે લાવી રહ્યાં છે. ત્યારે કોરોના મહામારી અનેહાલમાં જ એસિડ એટેક જેવા કન્ટેન્ટને લઈને એપને ચીનની આ એપ ફરી એકવાર બેન કરવાની માંગ કરવામાં આવી છે. આ દરમિયાન ટિકટોકને ટક્કર આપવા માટે ભારતીય એપ મિત્રોં (Mitron) ખૂબ જ લોકપ્રિય થઈ રહી છે.
ટિકટોક પર છવાયા સંકટના વાદળો
ચીનની આ એપને ટક્કર આપશે સ્વદેશી એપ મિત્રોં
ખૂબ જ ઓછાં સમયમાં લોકપ્રિય થઈ રહી છે આ એપ
બહુ જ ઓછાં સમયમાં મિત્રોં એપ ખૂબ જ લોકપ્રિય થઈ ગઈ છે અને હાલ પ્લે સ્ટોર મુજબ તે ભારતની પોપ્યુલર એપ્સમાંથી એક બની ચૂકી છે. તેનું એક કારણ આ એપનું નામ પણ છે, કારણ કે આપણાં દેશના વડા પ્રધાન નરેન્દ્ર મોદી ઘણીવાર તેમના ભાષણમાં મિત્રોં શબ્દનો ઉપયોગ કરતા જોવા મળે છે. ઉલ્લેખનીય છે કે, આ એપ એક મહિના પહેલાં જ લોન્ચ કરવામાં આવી હતી. ત્યારે મહિનાની અંદર 5 મિલિયન એટલે કે 50 લાખથી વધુ લોકો એપને ડાઉનલોડ કરી ચૂક્યા છે. મિત્રોંની શરૂઆતની ડાઉનલોડ સ્પીડને જોઈએ તો તે ટિકટોકને ટક્કર આપતી જોવા મળી રહી છે.
ટિકટોક પર સંકટના વાદળો, આ છે કારણ
મિત્રોં એપ એવા સમયે આવી છે જ્યારે લોકો ટિકટોકને બેન કરવાની માંગ કરી રહ્યાં છે અને આ એપની રેટિંગ પણ સતત ઓછી થઈ રહી છે. હવે હાલત એવી છે કે ટિકટોકની રેટિંગ 1.5 સુધી પહોંચી ગઈ છે. જોકે, હાલ ભારતમાં ટિકટોકના લગભગ 600 મિલિયન સબસ્ક્રાઈબર્સ છે. પણ મિત્રોં એપનું ફોર્મેટ ટિકટોક જેવું જ હોવાથી તે ટિકટોકને ટક્કર આપી શકે છે.
ટિકટોક ભારતમાં ખૂબ જ લોકપ્રિય છે પરંતુ તેના વિવાદાસ્પદ કન્ટેન્ટને કારણે આ એપ ઘણીવાર વિવાદોમાં ફસાઈ જાય છે. વિવાદિત વીડિયો અને ચાઈલ્ડ પોર્નોગ્રાફી સંબંધ વિવાદોને કારણે ભારત સરકાર ટિકટોકને નોટિસ પણ મોકલી ચૂકી છે. બીજો વિવાદ એ પણ છે કે, કંપની યુઝર્સનો ડેટા સ્ટોર કરે છે.
આ એપમાં બનાવી શકો છો ઈનોવેટિવ વીડિયો
મિત્રોં એપના મેકર્સે પ્લે સ્ટોર પર તેના વિશે લખ્યું છે કે, મિત્રોં એપમાં લોકો શોર્ટ
વીડિયો ઈનોવેટિવ આઈડિયા અને હ્યૂમર સાથે રજૂ કરવા માટે ડિઝાઈન કરવામાં આવી છે. જેનાથી યુઝર્સને વીડિયો બનાવવા, એડિટ અને શેર કરવામાં સરળતા રહેશે. આ સાથે જ તેના વીડિયોને સમગ્ર દુનિયાની ટોપ વીડિયો લાઈબ્રેરી દ્વારા બ્રાઉઝ પણ કરી શકાય છે. એવું માનવામાં આવી રહ્યું છે કે જલ્દી આ સ્વદેશી ‘મિત્રો’ એપ ભારતમાં ટિકટોકને જબરદસ્ત ટક્કર આપશે, કારણે કે આના ફીચર્સ પણ મોટાભાગે ટિકટોકની જેમ જ કામ કરે છે.