સંશોધન / અનેક સમસ્યાઓનો નિચોડ એટલે બ્લેક ગોલ્ડ, ભારતીય વૈજ્ઞાનિકોનું અદભૂત સંશોધન

ભારતીયોને સોનાનો કેટલો ક્રેઝ છે તે બધા જાણે છે. ભારતીયો સોનાના સૌથી મોટા ખરીદદાર છે. જવેલરીમાં વ્હાઇટ ગોલ્ડનું પણ ચલણ છે. પણ તમે બ્લેક ગોલ્ડનું નામ સાંભળ્યું છે? ભારતીય વિજ્ઞાનીઓએ મટિરીયલ ટેકનોલોજી અને કેમીસ્ટ્રીનો ઉપયોગ કરીને ખરેખર બ્લેક ગોલ્ડ એટલે કે કાળુ સોનુ બનાવ્યું છે. મુંબઇની ટાટા ઇન્સ્ટીટયુટ ઓફ ફન્ડામેન્ટલ રિસર્ચના વિજ્ઞાનીઓએ બ્લેક ગોલ્ડમાં કોઇપણ ધાતુ કે તત્વો ઉમેર્યા વિના બ્લેક ગોલ્ડ બનાવ્યું છે.

તેમણે સોનાના નેનો પાર્ટિકલ્સની ગોઠવણીમાં ફેરફાર કરીને સોનાને કાળું બનાવી દીધુ છે. આ સોનાની વિશેષતા એ છે કે તે પ્રકાશ અને કાર્બન ડાયોકસાઇડને શોષી શકે છે. તેથી વિજ્ઞાનીઓ તેને ન્યુ મટિરીયલ એટલે કે નવી જ ધાતુ હોવાનું કહે છે. રોયલ સોસાયટી ઓફ કેમીસ્ટ્રીના કેમિકલ સાયન્સ જર્નલમાં આ સંશોધન પ્રકાશિત થયું છે. બ્લેક ગોલ્ડ એક કેટલિસ્ટ તરીકે કામ કરે છે. તે સુર્ય ઉર્જાનો ઉપયોગ કરીને કાર્બન ડાયોકસાઇડને મિથેનમાં ફેરવી શકે છે. 

વિજ્ઞાનીઓ કહે છે કે જો આપણે બ્લેક ગોલ્ડના પાંદડાવાળા કૃત્રિમ ઝાડ બનાવીએ તો તે વાતાવરણના કાર્બનને શોષીને તેને ફયુલ (બળતણ)માં ફેરવી શકે છે. જોકે તેની માત્રા ઘણી ઓછી હોય છે. પરંતુ ભવિષ્યમાં વધુ સંશોધન કરીને વધુ અસરકારક બનાવી શકાશે. બ્લેક ગોલ્ડનો ઉપયોગ દરિયાના પાણીને પીવા લાયક બનાવી શકે તેવા નેનો હીટર બનાવવામાં ઉપયોગ થઇ શકશે. 

બ્લેક ગોલ્ડમાં સોની મુળભુત લાક્ષણિકતામાં એવા ફેરફાર થયા છે જેનો ભવિષ્યમાં અનેક રીતે ઉપયોગ થઇ શકશે. અત્યારે વિજ્ઞાનીઓ વાતાવરણમાંથી કાર્બન ડાયોકસાઇડને ખેંચીને તેનો બળતણ તરીકે ઉપયોગ કરવા અંગેના અનેક સંશોધનો થઇ રહ્યા છે. બ્લેક ગોલ્ડ પણ તે દિશામાં વધુ એક શોધ છે.