રેલ્વે મુસાફરીને વધુ સુવિધાજનક બનાવવા માટે ભારતીય રેલ્વે વિભાગ સતત નવી સેવાઓ અને સુવિધાઓ રજૂ કરી રહ્યું છે. આ જ ક્રમમાં હવે રેલ્વેએ એક અનોખી હ્યૂમન ઈન્ટરેક્ટિવ ઈન્ટરફેસ સિસ્ટમ દ્વારા ફ્રી મોબાઈલ અને વાઈફાઈ કોલિંગ અને અન્ય કેટલીક સુવિધાઓ રજૂ કરી છે. રેલ્વે પ્રધાન પીયુષ ગોયલે ટ્વિટ કરીને આ સેવાની શરૂઆત અંગે માહિતી આપી છે.
રેલ્વેના મુસાફરો માટે સારાં સમાચાર
રેલ્વેએ એક અનોખી હ્યૂમન ઈન્ટરેક્ટિવ ઈન્ટરફેસ સિસ્ટમ શરૂ કરી
હાલ આ સેવા વિશાખાપટ્ટનમ રેલ્વે સ્ટેશન પર શરૂ કરવામાં આવી છે
રેલ્વે પ્રધાનના જણાવ્યા અનુસાર, આ સેવા વિશાખાપટ્ટનમ રેલ્વે સ્ટેશન પર શરૂ કરવામાં આવી છે. જેમાં મુસાફરોને ઘણી અનોખી સેવાઓ આપવામાં આવી રહી છે. રેલ્વે પ્રધાને આ સુવિધાઓની માહિતી આપવા માટે એક વીડિયો પણ શેર કર્યો છે. વીડિયોમાં આપવામાં આવેલી માહિતી મુજબ, રેલ્વે મંત્રાલયે મેક ઈન ઈન્ડિયા અભિયાન અંતર્ગત વિશાખાપટ્ટનમ રેલ્વે સ્ટેશન પર પ્રથમ હ્યૂમન ઈન્ટરેક્ટિવ ઈન્ટરફેસ સિસ્ટમ સ્થાપિત કરી છે. તે ડિજિટલ કીયોસ્ક અને ડિજિટલ બિલ બોર્ડ વચ્ચેનું એક અનોખું જોડાણ છે.
એક મશીન, ઘણી સુવિધાઓ
આ એક મશીનથી ઘણાં કામ થઈ શકે છે. આ ડિજિટલ કિયોસ્કની મદદથી રેલ્વે મુસાફરો ફ્રીમાં મોબાઈલ અને વીડિયો કોલિંગ કરી શકે છે.મોબાઇલ અને લેપટોપની સાથે મુસાફરી કરતાં મુસાફરોની સુવિધા માટે ફાસ્ટ ચાર્જિંગ પોર્ટ્સ પણ લગાવ્યા છે. આ ઉપરાંત 24 કલાક મોનિટરિંગ માટે આ કિયોસ્કમાં સીસીટીવી કેમેરા પણ લગાવવામાં આવ્યા છે.
ઇન્ટરેક્ટિવ સ્ક્રીન પર હવામાન અને ટ્રેનો સંબંધિત માહિતી પણ જોઈ શકે છે
વીડિયોમાં આપવામાં આવેલી માહિતી મુજબ, મુસાફરો ડિજિટલ કિયોસ્કમાં આપેલાં ઇન્ટરેક્ટિવ સ્ક્રીન પર હવામાન અને ટ્રેનો સંબંધિત માહિતી પણ જોઈ શકે છે. આ સિવાય ગૂગલ મેપ, સિટી મેપ અને લોકલ પ્લેસની માહિતી પણ અહીં જાણવા મળશે. જો રેલ્વે મુસાફરો આ સેવામાં રસ દાખવે છે, તો ટૂંક સમયમાં અન્ય સ્ટેશનો પર પણ આ સિસ્ટમ શરૂ થઈ શકે છે.
એકીકૃત થઈ 139 હેલ્પલાઈન
હાલમાં નવા વર્ષ નિમિત્તે રેલ્વે પ્રધાને બીજી મોટી જાહેરાત કરી હતી. ભારતીય રેલ્વે દ્વારા હેલ્પલાઈન નંબર 139ને એકીકૃત કરવામાં આવ્યું છે. એટલે કે હવે રેલ્વે સંબંધિત વિવિધ સેવાઓ માટે માત્ર એક જ નંબર પર કોલ કરીને માહિતી મેળવી શકાશે. રેલ્વે પ્રધાન દ્વારા આપવામાં આવેલી માહિતી અનુસાર, આ નંબર ઇન્ટરેક્ટિવ વોઇસ રિસ્પોન્સ પર આધારિત છે. હવે જો મુસાફરો કોઈ મદદ જોઈએ તો જુદા-જુદા નંબરોની જગ્યાએ માત્ર એક જ હેલ્પલાઇન નંબર 139 યાદ રાખવો પડશે.