જો તમે પણ ટ્રેનની મુસાફરી કરી રહ્યાં છો અને બેઠક માટે પરેશાન છો તો હવે તમારે બિલકુલ પણ ચિંતા કરવાની જરૂર નથી. ભારતીય રેલવેએ ખાસ મહિલાઓ માટે મોટો નિર્ણય કર્યો છે. મહત્વનું છે કે, ટ્રેનમાં હવે મહિલાઓને બેઠક માટે પરેશાન થવાની જરૂર નહીં પડે એટલેકે હવેથી બસ અને મેટ્રોની જેમ રેલવે પણ મહિલાઓની સીટ આરક્ષિત રાખશે.
મહિલાઓ માટે ખુશખબર!
ટ્રેનમાં હવે મહિલાઓને સીટ માટે પરેશાન થવાની જરૂર નહીં પડે
બસ અને મેટ્રોની જેમ રેલવે પણ મહિલાઓની સીટ આરક્ષિત રાખશે
મહિલાઓને મળશે ઘણાં ફાયદા
રેલવેના આ નિર્ણયથી મહિલાઓને પ્રવાસ દરમ્યાન બેઠક માટે પરેશાન થવાની જરૂર નહીં પડે. ભારતીય રેલવેએ લાંબા પ્રવાસ માટે મહિલાઓ માટે સીટ અનામત કરી છે. કેન્દ્રીય રેલવે મંત્રી અશ્વિની વૈષ્ણવે આ અંગે માહિતી આપી છે. તેમણે જણાવ્યું કે લાંબા અંતરવાળી ટ્રેનોમાં મહિલાઓની સુવિધા અને સુરક્ષાને ધ્યાનમાં રાખીને આ પગલું ઉપાડવામાં આવ્યું છે. આ સિવાય પણ ઘણી અન્ય સુવિધાઓનો ફાયદો મહિલાઓને મળશે.
ઘણી ટ્રેનોમાં અનામત સીટ
કેન્દ્રીય મંત્રીએ માહિતી આપતા જણાવ્યું કે લાંબા અંતરવાળી મેલ અને એક્સપ્રેસ ટ્રેનોમાં સ્લીપર ક્લાસમાં છ સીટ અનામત રાખવામાં આવશે. ઉલ્લેખનીય છે કે, આ યાદીમાં રાજધાની, ગરીબ રથ, દુરંતો સહિત ઘણી એક્સપ્રેસ ટ્રેનો સામેલ છે. આ ટ્રેનોના થર્ડ એસી કોચમાં મહિલાઓ માટે સીટ આરક્ષિત કરી છે.
કયા ક્લાસમાં કેટલી સીટ છે આરક્ષિત?
જો સ્લીપર ક્લાસની વાત કરીએ તો તેમાં લગભગ 7 સીટને આરક્ષિત કરવામાં આવી છે. આ સિવાય થર્ડ એસીમાં 4 થી 5 સીટ અને એર કન્ડિશનર 2 એસીમાં 3 થી 4 બેઠક સિનિયર સિટીઝન અને મહિલાઓ માટે આરક્ષિત કરવામાં આવી છે.