ભારતીય રેલ્વેએ સ્પેશ્યલ લોકલ ટ્રેન 04727/04728 શરૂ કરી. તેનું ભાડું 5 રૂપિયાથી વધારીને 45 રૂપિયા એટલે કે 9 ગણું કરાયું છે.
કોરોના વાયરસ બાદ ભારતીય રેલ્વેની નવી શરૂઆત
ભારતીય રેલ્વેની કોરોના સ્પેશ્યલ ટ્રેન થઈ શરૂ
ભાડામાં થયો 9 ગણો વધારો, દરેક સ્ટેશન પર રોકાશે ટ્રેન
કોરોના વાયરસના કારણે અનેક ટ્રેન સેવાઓ રોકાઈ ચૂકી છે. ભારતીય રેલ્વે હવે ફરી ટ્રેન સેવાઓને સામાન્ય કરવાની પ્રક્રિયામાં જોડાઈ છે. આ આધારે અનેક અલગ અલગ રૂટ પર સ્પેશ્યલ ટ્રેનનું પરિચાલન ક્રમબદ્ધ રીતે શરૂ કરાશે. દેશની રાજધાનીથી દિલ્હીથી રાજસ્થાન જતી કોરોના સ્પેશ્યલ લોકલ ટ્રેનને ફરી શરૂ કરાઈ છે જેથી યાત્રીઓને ઓછી મુશ્કેલી રહે. આ ટ્રેનનું ભાડું પહેલાંની સરખામણીએ 9 ગણું વધારાયું છે. એવામાં યાત્રીઓએ વધારે રૂપિયા ખર્ચ કરવા પડશે.
ભાડામાં થયો 9 ગણો વધારો
ભારતીય રેલ્વેએ સ્પેશ્યલ લોકલ ટ્રેન 04727/04728 શરૂ કરી છે. આ લોકલ પેસેન્જર ટ્રેન દિલ્હીથી રાજસ્થાનના શ્રીગંગાનગર સુધી જાય છે. મીડિયા રિપોર્ટ અનુસાર કોરોનાથી પહેલા આ ટ્રેનનું ન્યૂનતમ ભાડુ 5 રૂ. હતું હવે તેને વધારીને 45 રૂપિયા કરાયું છે. એટલે કે યાત્રીઓએ વધારે રૂપિયા ખર્ચ કરવા પડશે. આ ટ્રેનમાં માસિક પાસ પણ માન્ય નથી.
દરેક સ્ટેશન પર રોકાશે આ સ્પેશ્યલ ટ્રેન
આ લોકલ ટ્રેન દરેક સ્ટેશન પર હોલ્ટ પણ લેશે. મળતી માહિતી અનુસાર આ ટ્રેનમાં જૂની પેસેન્જર ટ્રેન 54767/68ના સ્ટાફને મૂકવામાં આવ્યો છે. આ પેસેન્જર ટ્રેન શ્રીગંગાનગરથી તિલક બ્રિજની વચ્ચે ચાલતી હતી. કોરોના કાળમાં નવા પેસેન્જર ટ્રેન શરૂ થવાથી લોકોને રાહત મળી અને તેનું ભાડું જાણીને તેઓમાં મુશ્કેલી પણ અનુભવાઈ. આ સ્પેશ્યલ ટ્રેન માટે ઓનલાઈન બુકિંગ પણ કરી શકાય છે. રેલ્વેએ કોરોના કાળમાં યાત્રીઓની સુવિધા ધ્યાનમાં રાખીને અનેક રૂટ પર સ્પેશ્યલ ટ્રેન ચલાવી છે. આ કારણે અનેક ચીજોમાં થયેલા ફેરફારની સાથે ભાડું પણ એક ફેરફાર બન્યું છે.