સ્પોર્ટ્સ / IPL બાદ આ લીગમાં રમતા દેખાશે માહી ? મોટા ખેલાડીઓને સાઈન કરવા તલપાપડ થઇ રહી છે ફ્રેન્ચાઇઝીઓ

• ઓસ્ટ્રેલિયામાં યોજાનાર BBLની તૈયારીઓ પૂરજોશમાં
• બિગ બેશ લીગ ક્લબ્સ રૈના, ધોની અને યુવરાજસિંહને સામેલ કરી શકે છે
• યુવરાજે ગત વર્ષે આંતરરાષ્ટ્રીય ક્રિકેટમાંથી નિવૃત્તિ જાહેર કરી હતી

ઓસ્ટ્રેલિયામાં યોજાનાર આગામી બિગ બેશ લીગ (BBL)ની તૈયારીઓ જોરશોરથી ચાલી રહી છે. નવા નિયમો અનુસાર ત્રણ આંતરરાષ્ટ્રીય ખેલાડીઓને ટીમમાં રાખી શકાશે. આથી આ લિગમાં વિદેશના ઘણા મોટા ખેલાડીઓ જોડાય તેવી શક્યતા છે. આવા ખેલાડીઓમાં ભારતના મહેન્દ્રસિંહ ધોની, સુરેશ રૈના અને યુવરાજસિંહનાં નામ સામે આવ્યાં છે.

બિગ બેશ લીગની ૧૦મી સિઝનની શરૂઆત તા. ૩ ડિસેમ્બરથી એડિલેડ ઓવેલમાં થશે. બિગ બેશની ફ્રેંચાઇઝીઓ આંતરરાષ્ટ્રીય ખેલાડીઓની શોધમાં છે. જોકે આવનારા સમયમાં જ જાણવા મળશે કે કઈ ટીમ કયા મોટા ખેલાડીને પોતાની ટીમમાં સામેલ કરે છે, પરંતુ ક્રિકેટ ઓસ્ટ્રેલિયાની સત્તાવાર વેબસાઇટે ત્રણ અનુભવી ભારતીય ખેલાડીને નોમિનેટ કર્યા છે, જે BBL ક્લબ્સ તરફથી રમવા જોવા મળી શકે છે.

ક્રિકેટ ઓસ્ટ્રેલિયાની સત્તાવાર વેબસાઇટના જણાવ્યા અનુસાર બિગ બેશ લીગ ક્લબ્સ સુરેશ રૈના, મહેન્દ્રસિંહ ધોની અને યુવરાજસિંહને સામેલ કરી શકે છે. આંતરરાષ્ટ્રીય ક્રિકેટમાંથી નિવૃત્તિ જાહેર કરી ચૂકેલા આ ત્રણેય ખેલાડીઓને BBLમાં ભાગ લેવા માટે કોઈ પ્રકારની પ્રતિબદ્ધતા નહીં હોય.

યુવરાજે ગત વર્ષે આંતરરાષ્ટ્રીય ક્રિકેટમાંથી નિવૃત્તિ જાહેર કરી હતી, જ્યારે ધોની અને રૈનાએ ગત ૧૫ ઓગસ્ટે આંતરરાષ્ટ્રીય ક્રિકેટને અલવિદા કહી દીધું હતું. અહીં મહત્ત્વની વાત એ છે કે આ ત્રણેય ક્રિકેટરોએ ઘરેલુ ક્રિકેટમાંથી નિવૃત્તિ નથી લીધી. આ સ્થિતિમાં વિદેશ લીગમાં રમવા માટે તેમણે ક્રિકેટનાં બધાં ફોર્મેટમાંથી નિવૃત્તિ પહેલાં BBLમાં રમવા માટે BCCI પાસેથી NOC લેવું પડશે.

આ વર્ષની શરૂઆતમાં સુરેશ રૈનાએ BCCIને વિનંતી કરી હતી કે વિદેશી ટી-૨૦ લીગ્સમાં રમવા માટે કડક નિયમો થોડા હળવા કરવામાં આવે. ભારતની મહિલા ક્રિકેટરોને બિગ બેશમાં રમવાની મંજૂરી આપવામાં આવી હતી, જ્યારે પુરુષ ક્રિકેટરોને હજુ સુધી BCCI તરફથી આવી મંજૂરી મળતી નથી.

રૈનાએ એ સમયે કહ્યું હતું, ''મને આશા છે કે BCCI આઇસીસી સાથે અથવા ફ્રેંચાઇઝી સાથે હાથ મિલાવી શકે છે અને એ ખેલાડીઓને મંજૂરી આપી શકે છે, જેમની પાસે વિદેશી લીગમાં રમવા માટે BCCIનો કરાર નથી. યુસુફ પઠાણ, ખુદ હું (રૈના), રોબિન ઉથપ્પા જેવા ઘણા ખેલાડી વિદેશી લીગમાં રમવા ઇચ્છે છે. આવા ખેલાડીઓ BCCIની કરાર યાદીમાં નથી. આમાંના કેટલાક ખેલાડી પાસે તો આઇપીએલનો કરાર પણ નથી.''

BBLમાં મોટો ફેરફાર, હવે ત્રણ વિદેશી ખેલાડી મેદાનમાં ઊતરી શકશેઃ 

બિગ બેશ (BBL)ની આગામી સિઝન શરૂ થાય તે પહેલાં એક મોટો ફેરફાર જોવા મળશે. BBLની આગામી સિઝનથી અંતિમ ઈલેવનમાં બેના બદલે હવે ત્રણ વિદેશી ખેલાડીને સામેલ કરી શકાશે. BBLના આયોજકોએ આ અંગેની સત્તાવાર જાહેરાત કરી દીધી છે. ઉલ્લેખનીય છે કે IPLની અંતિમ ઈલેવનમાં ચાર વિદેશી ખેલાડીને સામેલ કરી શકાય છે. BBLએ પોતાના સત્તાવાર ટ્વિટર એકાઉન્ટ પર પ્લેઇંગ ઈલેવનમાં ત્રણ વિદેશી ખેલાડીને સામેલ કરવાની વાતની પુષ્ટિ કરતાં જણાવ્યું, ''આ વર્ષથી ટીમમાં કુલ ખેલાડીઓની સસંખ્યા વધારીને ૧૯ કરી દેવામાં આવી છે. ત્રીજા વિદેશી ખેલાડીના સ્લોટની શરૂઆત BBLના વિકાસમાં એક માઇલસ્ટોન બની રહેશે.''