નવી દિલ્હી: ભારતીય મહિલા ક્રિકેટ ટીમની કેપ્ટન મિતાલી રાજે વર્લ્ડ રેકોર્ડ બનાવ્યો છે. મિતાલી રાજે એકદિવસીય ક્રિકેટમાં સૌથી વધારે રન બનાવનારી બેટ્સમેન બની ગઇ છે. બુધવારે આઇસીસી મહિલા વર્લ્ડ કપમાં ઓસ્ટ્રેલિયા સામે રમાઇ રહેલી મેચમાં મિતાલીએ ઇતિહાસ રચ્યો.
પુરા કર્યા 6 હજાર રન
ભારતીય ખેલાડી મિતાલી રાજે વનડે કારકિર્દીમાં પોતાના 6 હજાર રન પુરા કર્યા છે. પહેલા વનડે મેચમાં સૌથી વધુ રન બનાવવાનો રેકોર્ડ ઇંગ્લેન્ડની સેર્લોટ એડવર્ડ્સના નામે હતો. તેમણે્ 191 મેચોમાં 5992 રન બનાવ્યા હતા. જ્યારે મિતાલીએ પોતાના 182માં મેચમાં જ આ સિદ્ધિ પ્રાપ્ત કરી લીધી છે.
1999માં કર્યું હતું ડેબ્યૂ
મિતાલી રાજે 26 જૂન 1999ના રોજ આયરલેન્ડ વિરૂદ્ધ વનડે મેચમાં પોતાના ઇન્ટરનેશનલ કરિયરમાં પદાર્પણ કર્યું હતું. મિતાલીએ પોતાની પહેલી મેચમાં જ શાનદાર સદી ફટકારી હતી. તેમણે 114 રનોની અણનમ ઇનિંગ્સ રમી હતી. વનડે કરિયરમાં મિતાલી 51.81ના એવરેજથી 6 હજાર રન બનાવી ચૂકી છે.
વનડે સિવાય મિતાલીએ 10 ટેસ્ટ મેચમાં 663 રન અને 63 ટી-20 મેચોમાં 1 708 રન બનાવ્યા છે. વનડે ઇન્ટરનેશનલમાં સતત સાત અડધી સદી બનાવવાનો રેકોર્ડ પણ મિતાલીના નામે છે. આ સિવાય ઘણા રેકોર્ટ મિતાલીએ પોતાના નામે કરેલા છે.