પ્રધાનમંત્રી મોદીના ઇન્ડોનેશિયા પ્રવાસે પાડોશી દેશ ચીનની ચિંતા વધારી દીધી છે. હંમેશા વર્ચસ્વ જમાવવાની નીતિ ધરાવતા ચીનને ભારત અને ઇન્ડોનેશિયાના નવા સંબંધોએ મોટો ફટકો આપ્યો છે. ઇન્ડોનેશિયાએ ચીનની નજીક આવેલા તેના સબાંગ બંદરનો ઉપયોગ કરવાની ભારતને પરવાનગી આપી દીધી. એટલે હવે ભારત વેપાર અને સૈન્યબળ એમ બે મોરચે ચીનને આપશે મ્હાત.
જકાર્તામાં પ્રધાનમંત્રી મોદી અને ઇન્ડોનેશિયાના રાષ્ટ્રપતિ જોકો વિદોદોના હાથ મળ્યા અને ધ્રાસ્કો ચીનને પડયો. આ બે દેશોની એકતા ચીનને ભારે પડે તેમ છે. ઇન્ડોનેશિયાએ તેના સબાંગ બંદરનો ઉપયોગ કરવાની ભારતને પરવાનગી આપી દિધી છે. સબાંગ બંદર મારફતે ભારત આમ તો વેપાર કરશે. પરંતુ આંતરરાષ્ટ્રીય કુટનીતિની દ્રષ્ટીએ સબાંગ બંદર ઘણો ઉપયોગી સાબિત થશે. કારણકે સબાંગ ટાપુ અંદમાન નિકોબાર ટાપુથી માત્ર 710 કિલોમીટર દૂર છે. અહીંના સમુદ્રની ઊંડાઇ 40 મીટર કરતા વધુ છે જેના કારણે સબમરીન અને મોટા જહાજો લંગારી શકાશે.
બીજા વિશ્વયુદ્ધ સમયે પણ જાપાને આ જ જગ્યાએ સેન્ય ઠેકાણું બનાવ્યું હતું એટલે હવે ઇન્ડિયન એરફોર્સ અને નેવી માટે પણ સબાંગ ટાપુ એક મહત્વનું સ્થળ બની રહેશે. કારણકે જો ભારતીય નેવી તેમજ એરફોર્સની આ વિસ્તારમાં હલચલ વધશે તો આડકરતી રીતે ચીનના સાઉથ ચાઇના સીમાં વધતા વ્યાપ પર અકુંશ આવશે અને લાંબા ગાળે કાશ્મીર અને ડોકલામ સહિત અરૂણાચલ પ્રદેશના વિસ્તારમાં પોતાની ધોંસ જમાવતા પહેલા ચીન વિચાર કરશે.
ચીને પણ સબાંગ બંદરને પેતાના હસ્તક લેવા માટે ઘણા પ્રયાસો કર્યો. પરંતુ ઇન્ડોનેશિયા અને ચીન વચ્ચે હાલમાં પણ ટાપુને લઇને વિવાદ છે. એટલે ઇન્ડોનેશિયા જો સબાંગ બંદર ભારતને આપે તો તેને પણ ફાયદો થઇ શકે તેમ છે. ભારત અને ઇન્ડોનેશિયા વચ્ચે સબાંગના પ્રસ્તાવ પર વર્ષ 2014-2015થી મંથન થઇ રહ્યું હતું. જેને પ્રધાનમંત્રી મોદીના ઇન્ડોનેશિયા પ્રવાસના થોડા દિવસો પૂર્વે જ મંજુરી આપી દેવામાં આવી.
સબાંગ ટાપુ મલક્કા સ્ટ્રેટ વિસ્તારમાં આવેલું છે. આ જ રસ્તેથી હાલમાં પણ ભારત 40 ટકા સમુદ્રી વેપાર કરે છે. સબાંગમાં ભારત સ્પેશિયલ ઇકોનોમિક ઝોન એટલે કે સેઝની નીતિ પ્રમાણે રોકાણ પણ કરશે અને એક હોસ્પિટલ બનાવવાની પણ યોજના છે ત્યારે આગામી સમયમાં તમામ મોરચે સબાંગ ટાપુ ભારતને ફાયદો પહોંચાડશે તે નક્કી છે.