આગાહી / હવામાન વિભાગનું એલર્ટ, આ રાજ્યોમાં પડી શકે છે ધોધમાર વરસાદ, સાથે કરા અને હિમવર્ષાની પણ ચેતવણી 

• હવામાન વિભાગે કરી મોટી આગાહી 
• આગામી દિવસોમાં ઉત્તરના પર્વતીય રાજ્યોમાં પડી શકે છે વરસાદ 
• દક્ષિણ ભારતના અમુક રાજ્યોમાં કરા પડવાની સંભાવના દર્શાવી

હાલમાં રાષ્ટ્રીય રાજધાની વિસ્તાર દિલ્હીમાં ઠંડી ઘટવાથી લોકોને તત્પૂરતી રાહત તો મળી છે, પણ જ્યારે દિવસ દરમિયાન જેમ જેમ સૂરજ માથે ચડે છે તેમ તેમ લોકોને હળવા તાપનો અનુભવ થાય છે. જો કે કેટલાક સ્થળોએ હળવા ધુમ્મસ પણ જોવા મળ્યા હતા. દરમિયાન, સોમવારે સવારે દિલ્હીનું એર ક્વોલિટી ઈન્ડેક્સ ખતરનાક કેટેગરીમાં પહોંચી ગયું હતું.

ઉત્તરના પર્વતીય રાજ્યોમાં હિમવર્ષાની આગાહી છે 

સોમવારે સવારે દિલ્હીમાં તાપમાન 15 ડિગ્રી નોંધાયું હતું. ઉપરાંત, મહત્તમ તાપમાન 28 ડિગ્રી હોવાનો અંદાજ છે. હવામાન વિભાગના જણાવ્યા અનુસાર હિમાલયથી પશ્ચિમી વિક્ષોભના કારણે દેશના ઘણા રાજ્યોમાં વરસાદ ઉપરાંત પર્વતીય વિસ્તારોમાં હિમવર્ષાની સંભાવના વ્યક્ત કરવામાં આવી છે.

હવામાન નિષ્ણાતોના મંતવ્ય અનુસાર કહે છે કે 23 થી 24 ફેબ્રુઆરી સુધી ઉત્તરાખંડના ઘણા વિસ્તારોમાં વરસાદની સંભાવના છે, અને આ પછી પશ્ચિમી વિક્ષોભને કારણે 26 ફેબ્રુઆરીથી વરસાદ અને બરફવર્ષા થઈ શકે છે. તે જ સમયે, 26 થી 28 ફેબ્રુઆરી વચ્ચે વાવાઝોડા સાથે વરસાદ પડી શકે છે.

જમ્મુ-કાશ્મીર અને લદાખ માટે ચેતવણી

ભારતીય હવામાન વિભાગએ પણ જમ્મુ-કાશ્મીર અને લદ્દાખમાં હવામાન વધુ ખરાબ થવાની આગાહી કરી છે. તેને ધ્યાનમાં રાખીને સોમવારે આ રાજ્યોમાં એલર્ટ જારી કરવામાં આવ્યું છે. આ ઉપરાંત પશ્ચિમી વિક્ષોભને કારણે મંગળવારથી શુક્રવાર સુધી હિમાચલ પ્રદેશમાં છૂટાછવાયા વરસાદની ચેતવણી સાથે ભારે હિમવર્ષા અને વાવાઝોડાનું એલર્ટ જાહેર કર્યું છે. હવામાન વિભાગે સોમવારે કહ્યું કે, આગામી દિવસોમાં જમ્મુ-કાશ્મીર અને લદ્દાખમાં વાવાઝોડું અને બરફવર્ષા થઈ શકે છે.

દક્ષિણ ભારતના અમુક રાજ્યોમાં કરા પડી શકે છે

હવામાન નિષ્ણાતોએ આગાહી કરી છે કે, બંગાળની ખાડીમાંથી આવતા પવનને કારણે દક્ષિણ ભારતના કેટલાક ભાગોમાં કરા પડી શકે છે, દક્ષિણ ભારતના ઘણા રાજ્યોમાં સોમવાર અને મંગળવારે વાવાઝોડાની શક્યતા પણ છે. હવામાન વિભાગ અનુસાર, આગામી 24 કલાક દરમિયાન આંધ્ર પ્રદેશ, કર્ણાટક, તામિલનાડુ, પુડ્ડુચેરી, કરૈકલ, કેરળના ભાગોમાં હળવાથી મધ્યમ વરસાદ પડી શકે છે.