એક ચોંકાવનારા સર્વેક્ષણમાં બહાર આવ્યું છે કે જે ઘરની કુલ આવકનો 40% કે તેથી વધુ હિસ્સો જો ઘરની સ્ત્રી કમાતી હોય તો તે ઘરમાં પુરુષો દુઃખી અને ગભરાયેલા હોય છે. જે ઘરમાં માત્ર પુરુષ જ કમાતો હોય તો તે પણ દુઃખી રહે છે પણ તે સ્ત્રી વધારે કમાતી હોય તેવા ઘરના પુરુષો કરતા ઓછા તણાવમાં રહે છે.
સારા લગ્નજીવન માટે પતિ પત્ની બંનેના સાથ સહકારની સાથે સાથે વ્યક્તિગત રીતે આવકમાં કેટલું પ્રદાન કરે છે તે પણ મહત્વનું છે. 'My Research' પરીક્ષણ પ્રમાણે પતિ પત્નીમાં પતિ ઘરમાં આવકના મુખ્ય સ્ત્રોત તરીકે રહેવાનું વધુ પસંદ કરે છે.
આવકના મુખ્ય સ્ત્રોત રહેવા સાથે ઘરની કુલ આવકમાં 40% થી ઓછું કમાતી પત્ની હોય ત્યારે પતિ રિલેક્સ રહે છે. આ આંકડાથી વધુ પત્નીની આવક રહેવાથી પતિ તણાવગ્રસ્ત થઇ જાય છે અને જયારે તે સંપૂર્ણપણે તેમના પાર્ટનર ઉપર આર્થિક રીતે નિર્ભર થઇ જાય ત્યારે તે ખૂબ સ્ટ્રેસમાં આવી જાય છે.
આ નિરીક્ષણ 6000 યુગલો ઉપર કરવામાં આવ્યું હતું જે 15 વર્ષથી લગ્નજીવનમાં હોય. પરીક્ષણમાં એમ પણ બહાર આવ્યું કે જે ઘરમાં માત્ર પુરુષ જ કમાતો હોય તો તે પણ દુઃખી રહે છે પણ તે સ્ત્રી વધારે કમાતી હોય તેવા ઘરના પુરુષો કરતા ઓછા તણાવમાં રહે છે.
આ તારણ પરથી એમ પણ કહી શકાય કે સ્ત્રી ખૂબ વધુ કમાતી હોય અને સ્ત્રી બિલકુલ ન કમાતી હોય આ બંને પરિસ્થિતિમાં પુરુષ દબાણમાં રહે છે.
જે પુરુષ પહેલેથી જ પૈસાદાર સ્ત્રીને પરણ્યું હોય અર્થાત લગ્ન પહેલા જ બંને વચ્ચેની આવકમાં તફાવત હોય તેવા પુરુષો આ પરિસ્થિતિમાં દબાણ અનુભવતા નથી.
નિર્ણયોનું સંતુલન જોખમાય છે
પરીક્ષણના મતે જયારે પતિ પત્નીની આવકમાં મોટો તફાવત હોય ત્યારે ઓછું કમાનાર પાત્ર પોતાની જાતને આર્થિક રીતે વધુ નિર્બળ અનુભવે છે. આ ઉપરાંત છૂટાછેડા કે બ્રેક અપની પણ તેને વધુ ચિંતા સતાવે છે.
બીજી એક સમસ્યા એ આવે છે કે જુદી જુદી આવક ધરાવતા પતિ પત્નીઓના બચત, ખર્ચ, મનોરંજન વગેરે માટેના વિચારો જુદા જુદા હોય છે જેથી આખરે નિર્ણય લેવામાં ઝગડા થવાની સંભાવના રહે છે.
સામાજિક પરંપરાઓ મહત્વનો ભાગ ભજવે છે
ભારત જેવા સમાજમાં પુરુષપ્રધાનપણું વર્ષોથી રહ્યું છે જ્યાં પતિ ઘરની આવકનો મુખ્ય સ્ત્રોત રહે છે. પુરુષોની મર્દાનગીને તેના પરિવારનું ભરણપોષણ કરવા સાથે જોડી દેવામાં આવી છે. આવી વિચારધારામાં ઘરમાં આવકના મુખ્ય સ્ત્રોત તરીકે જો સ્ત્રી તેનું સ્થાન લઇ લે તો પુરુષ દબાણમાં મુકાય છે.
બહારના દેશોમાં પવન બદલાયો છે
USAમાં 1980માં 13% મહિલાઓ તેમના પતિ જેટલું અથવા તેમનાથી વધારે કમાતી હતી. 2000માં આ આંકડો વધીને 25% થયો જયારે 2017માં આ આંકડો અત્યારે 31% છે. ભવિષ્યમાં પણ બીજા દેશોમાં આ આંકડો વધશે તેવું અવલોકન કરવામાં આવ્યું છે.
એકલા આવકના સ્ત્રોત તરીકે પણ પુરુષ તણાવ અનુભવે છે
પુરુષો તેમની પત્ની કુલ આવકના 40% થી ઓછી આવક કમાતી હોય ત્યારે ખુશ રહે છે પરંતુ જયારે પત્ની બિલકુલ નથી કમાતી ત્યારે પણ તેઓ તણાવમાં રહે છે કારણ કે આખા પરિવારના ભરણપોષણ અને તેમની અપેક્ષાઓ પુરી કરવાની જવાબદારી પુરુષના ખભે આવી જાય છે.
હાલમાં પત્ની પણ આવકમાં પોતાનો ભાગ ભજવતી હોય તેવી પરિસ્થિતિ વધી રહી છે આથી આવા પુરુષો પોતાની જવાબદારીઓ સંતુલિત કરી શકશે.