આતુરતાનો અંત / વરરાજા હતાં તૈયાર પરંતુ 45 દિવસ બાદ હવે જાન જોડાઇ, હકીકત રસપ્રદ

પુલવામામાં થયેલાં આતંકવાદી હુમલા બાદ ભારત અને પાકિસ્તાન વચ્ચે વધેલાં તણાવ વચ્ચે છેલ્લાં 45 દિવસથી અટકેલી ગયેલી જાન આજે ભારતથી પાકિસ્તાનનાં સિંધ પ્રાંત તરફ રવાના થઈ શકી. વરરાજાનાં ચહેરા પરની આ ચમક પરણવાનું નવું મૂહુર્ત નીકળતા જ ઔર નીખરી ગઈ. 45 દિવસનાં લાંબી વાટ જોયાં બાદ આખરે જાન રવાના થઈ તો વરરાજાનાં ચહેરા પર સ્પષ્ટ રીતે ખુશી તરી આવી. કેમ કે સરહદ પાર બેઠેલી તેની વાગ્દત્તાને પરણવાનું આપેલું વચન સાકાર થવાંને હવે બહુ વાર નથી.

 

પશ્ચિમ રાજસ્થાનનાં બાડમેરની આ જાન થાર એક્સપ્રેસ દ્વારા પાકિસ્તાન જઈ રહી છે. જાનૈયાઓમાં અને વરરાજાનાં પિતાનાં હૈયામાં આનંદ સમાતો નથી. તમને જણાવી દઈએ કે, ગયા મહિને આઠ માર્ચનાં દિવસે આ જાન પાકિસ્તાન જવાની હતી. જેની સંપૂર્ણ તૈયારી પણ થઈ ગઈ હતી. બાડમેરનાં ગિરાબ ગામનાં મહેન્દ્ર સિંહે પોતાનાં લગ્ન માટે મહિનાઓ સુધી તૈયારી કરી હતી. કન્યા માટે કપડાંની પણ ખરીદી કરી લીધી હતી. પરંતુ પુલવામામાં થયેલાં આતંકવાદી હુમલા અને ભારત તરફતી કરાયેલી એર સ્ટ્રાઈક બાદ હવે બન્ને દેશો વચ્ચે તંગ બનેલાં સંબંધોનાં કારણે લગ્ન લેવાનું મુલતવી રાખવામાં આવ્યું અને જાન જઈ ન શકી.

જો કે હવે એક તરફ બન્ને દેશો વચ્ચે સંબંધોમાં શાંતિનો માહોલ ઉભો થયો છે તો આ તરફ લગ્નું નવું મુહૂર્ત પણ નીકળ્યું છે. પછી વાટ કોની હોય. સરહદી બાડમેર જિલ્લાનાં ગિરાબ ગામનાં મહેન્દ્રસિંહ નામનાં વરરાજાનાં લગ્ન પાકિસ્તાન સ્થિત અમરકોટ પ્રાંતનાં એક ગામમાં નક્કી થયાં છે. વરરાજાને 45 દિવસ સુધી રાહ જોવી પડી તેનો રંજ તો મનમાં છે જ પરંતુ હવે બધું જ્યારે ઠીકઠાક છે ત્યારે પરણવા માટે પાકિસ્તાન જવાની તેને અનહદ ખુશી અનુભવાઈ રહી છે. તે ઈચ્છે છે કે બન્ને દેશો વચ્ચે શાંતિપૂર્ણ સંબંધો કાયમ જળવાઈ રહે અને તંગદિલી સમાપ્ત થાય. આ ભાવના સાથે મહેન્દ્રસિંહ થાર એક્સપ્રેસ દ્વારા પોતાની વાગ્દત્તાને પરણવા માટે રવાના થયાં છે.

મહેન્દ્રની જાનમાં 15 લોકો જોડાયાં છે જેમાં કેટલીક મહિલાઓ પણ શામેલ છે. ભારત અને પાકિસ્તાનાં સિંધપ્રાંત વચ્ચે રોટી અને બેટીનો વ્યવહાર હંમેશાં જળવાઈ રહે તેવું તેઓ ઈચ્છી રહ્યાં છે. પરંતુ સૌથી પહેલાં શાંતિ જળવાવી જરૂરી છે. જો કે હાલ તો જ્યાં એક તરફ દેશમાં લોકશાહીનાં સૌથી મોટા પર્વમાં પાકિસ્તાને મુદ્દો બનાવીને રાજનેતાઓ માહોલને ગરમ બનાવી રહ્યાં છે. ત્યારે આ ગરમ માહોલમાં જ 45 દિવસની લાંબી રાહ જોયાં બાદ એક હિંદુસ્તાની વરરાજા પાકિસ્તાની વધૂને લેવા માટે રવાના થયો છે.