મોટું આશ્વાસન / BIG NEWS: ખાદ્ય તેલના ભાવ નહીં વધે તેવા સંકેત, કેન્દ્ર સરકારે કહ્યું- દેશમાં તેલનો પુરતો સ્ટોક

• તેલની અછત વચ્ચે સરકારનો મોટો દાવો
• દેશમાં તેલનો પુરતો સ્ટોક
• મેમાં 12 લાખ મેટ્રિક ટન ખાદ્ય તેલની થશે આવક

કેન્દ્ર સરકારે કહ્યું છે કે દેશમાં ખાદ્ય તેલનો પૂરતો સ્ટોક છે. ગ્રાહક બાબતોના મંત્રાલયે જણાવ્યું છે કે દેશમાં તમામ ખાદ્યતેલોનો વર્તમાન સ્ટોક લગભગ 21 લાખ મેટ્રિક ટન છે, અને ચાલુ મહિનાના અંત સુધીમાં વધુ 12 લાખ મેટ્રિક ટન ખાદ્ય તેલ ઉપલબ્ધ થશે. આ ઉપરાંત સરકારે એ પણ જાણકારી આપી કે ચાલુ વર્ષે સરસવનું ઉત્પાદન કરતાં વધુ થવાની ધારણા છે. ગયા વર્ષની સરખામણીમાં સરસવનું 37 ટકા વધુ વાવેતર થવાને કારણે 2021-22ની સિઝનમાં સરસવનું ઉત્પાદન વધીને 114 લાખ મેટ્રિક ટન થઈ શકે છે.

દેશમાં આયાત થતા કુલ ખાદ્ય તેલોમાં પામ તેલનો હિસ્સો 62 ટકા છે. મુખ્યત્વે ઈન્ડોનેશિયા અને મલેશિયા પામ ઓઈલના મુખ્ય નિકાસકારો છે. તે જ સમયે, આયાત કરાયેલા ખાદ્ય તેલોમાં 22 ટકા સોયાબીન તેલ છે, જે આર્જેન્ટિના અને બ્રાઝિલમાંથી આયાત કરવામાં આવે છે. કુલ ખાદ્ય તેલોમાં, સૂર્યમુખી તેલ મુખ્યત્વે યુક્રેન અને રશિયામાંથી આયાત કરવામાં આવે છે. તે કુલ ખાદ્ય તેલોમાં 15 ટકા હિસ્સો ધરાવે છે.