દાવો / અત્યાર સુધીની સૌથી મોંઘી સાબિત થઇ 17મી લોકસભાની ચૂંટણી

સીએમએસના રીપોર્ટના દાવા મુજબ 17મી લોકસભા ચૂંટણી માટે ઉમેદવારો તરફથી અંદાજે 60,000 કરોડ ખર્ચ થયા છે જ્યારે ચૂંટણી આયોગે પણ આ રકમના 15-20 ટકા ખર્ચ કર્યો છે. આમ અંદાજે કુલ 70,000 હજાર કરોડની આસપાસ ખર્ચ થયો હોવાનો દાવો કરવામાં આવ્યો છે. 
 

લોકસભા 2019ની ચૂંટણી સમાપ્ત થઈ ગઈ છે. પરંતુ આ ચૂંટણી સાથે સંકળાયેલા કેટલાંક આંકડા તમને ચોંકાવી શકે છે. આ વખતે યોજાયેલી લોકસભા ચૂંટણી સૌથી મોંઘી ચૂંટણી સાબિત થઈ છે. સાત તબક્કા અને 75 દિવસ ચાલેલી ચૂંટણીમાં અંદાજે 60 હજાર કરોડથી વધુ રૂપિયાનો ખર્ચ થયો હોવાનું સામે આવ્યું છે.

આ રિપોર્ટ ખાનગી કંપની થિંક ટેન્ક સેન્ટર ફોર મીડિયા સ્ટડીઝમાં સામે આવ્યો છે. સેન્ટર ફોર મીડિયા સ્ટડીઝના રિપોર્ટ મુજબ, આ ચૂંટણીમાં એક વોટ પર એવરેજ રૂપિયા 700નો ખર્ચ કરવામાં આવ્યો. જો લોકસભાની વાત કરવામાં આવે તો આ ચૂંટણીમાં દરેક લોકસભા વિસ્તારમાં રૂપિયા 100 કરોડનો ખર્ચ થયો છે. જ્યારે વર્ષ 2014માં યોજાયેલી ચૂંટણીમાં 30 હજાર કરોડ રૂપિયાનો ખર્ચ નોંધાયો હતો. જે આ વખતે વધીને બે ગણો થઈ ગયો છે.
 

રિપોર્ટમાં એવો પણ દાવો કરવામાં આવ્યો છે કે 2019ની લોકસભા ચૂંટણી માત્ર ભારતની જ નહીં પણ વિશ્વની સૌથી મોંઘી ચૂંટણી સાબિત થઈ છે. આ રિપોર્ટને ઈન્ડિયા ઈન્ટરનેશનલ સેન્ટર દિલ્લીમાં જાહેર કરવામાં આવ્યો છે. રિપોર્ટ મુજબ 12થી 15 હજાર કરોડ રૂપિયા માત્ર મતદાતાઓ પર ખર્ચ કરવામાં આવ્યો છે, જ્યારે 20-25 હજાર કરોડ રૂપિયાનો ખર્ચ જાહેરાત પાછળ, 5-6 હજાર કરોડ રૂપિયાનો ખર્ચ લોજીસ્ટીક પર થયો.

જ્યારે 10-12 હજાર કરોડનો ઔપચારિક ખર્ચ થયો છે. જ્યારે 3-6 હજાર કરોડનો ખર્ચ અન્ય મુદ્દાઓ પર થયો છે. આ રિપોર્ટમાં એવો પણ દાવો કરવામાં આવ્યો કે 1998થી લઈને 2019 સુધીમાં લગભગ 20 વર્ષના સમયગાળામાં ચૂંટણી ખર્ચમાં 6થી 7 ગણો વધારો થયો છે. 1998માં ચૂંટણી ખર્ચ રૂપિયા 9 હજાર કરોડ હતો.