અર્થતંત્ર / ભારતનું 20 લાખ કરોડનું આર્થિક પેકેજ આ દેશો કરતાં પણ મોટું, આ રીતે કરાયું તૈયાર

• કોરોના સામે અર્થતંત્રને દોડતું કરવા સરકારનું વિશેષ આર્થિક પેકેજ 
• વિશ્વના સૌથી મોટા આર્થિક પેકેજોમાં હશે ભારતનું નામ 
• સરકારના આર્થિક પેકેજમાં બ્રિટનના પ્રોત્સાહન પેકેજ જેવી ભલામણો હોઈ શકે 

વિભિન્ન દેશોના સૌથી મોટા આર્થિક પેકેજમાં ભારતનું નામ 

વડાપ્રધાન નરેન્દ્ર મોદીએ દેશને આત્મનિર્ભર બનાવવા સૌથી વધુ ભાર આપ્યો. નોંધનીય છે કે અમેરિકાએ પોતાની જીડીપીનાં 13 ટકા જેટલું આર્થિક પેકેજ જાહેર કર્યું હતું. જ્યારે જાપાનની સરકારે જીડીપીના 21 ટકાથી પણ વધુનું આર્થિક પેકેજ જાહેર કર્યું છે જ્યારે ગતરાત્રે વડાપ્રધાન નરેન્દ્ર મોદીએ સંબોધન દરમિયાન આ આર્થિક પેકેજ ભારતના જીડીપીના 10 ટકા હોવાનું કબુલ્યું હતું. જે બાદ ભારતનું કોરોના સામે લડવા માટેનું આર્થિક પેકેજ વિશ્વના ઘણા દેશો કરતા મોટું છે. 

આ દેશો કરતા મોટું આર્થિક પેકેજ : 

કોરોના સામે લડવા માટે અનેક દેશોએ આર્થિક પેકેજની જાહેરાત કરી છે જેમાં ફ્રાન્સે જીડીપીના 9.3%, ઈટાલીએ 5.7%, બ્રિટને 5% જ્યારે ચીને 3.8% જેટલું આર્થિક પેકેજ જાહેર કર્યું. આમ ભારતનું આર્થિક પેકેજ આ વિકસિત દેશો કરતા પણ મોટું છે.  

અર્થતંત્રને વેગ આપવા સરકાર અબજો રૂપિયા લગાવશે 

આ પેકેજમાં રોકાણ માટે મોટી જાહેરાત થઇ શકે છે. ચીનને છોડી અન્ય દેશોમાં રોકાણ કરવા ઈચ્છુક કંપનીઓ માટે વિશેષ જાહેરાત કરવામાં આવી શકે છે. ભારતના આ 20 લાખ કરોડના આર્થિક પેકેજમાં આ પહેલાં જ જાહેર કરવામાં આવેલ 1.7 લાખ કરોડ રૂપિયાનું પ્રધાનમંત્રી ગરીબ કલ્યાણ પેકેજ પણ સામેલ કરવામાં આવશે. જોકે વડાપ્રધાન નરેન્દ્ર મોદીએ પેકેજને વિસ્તારમાં માહિતી આપી નથી પરંતુ નાણામંત્રી નિર્મલા સીતારમણ આજે સાંજે 4 વાગ્યે પ્રેસ કોન્ફ્રેન્સ કરીને પેકેજમાં કઈ કઈ જાહેરાત કરવામાં આવી રહી છે તેની વિસ્તારથી માહિતી આપશે. સરકારના અંક્ડાઓ અનુસાર કોરોના સામે લડવા માટે સરકાર 13 થી 14 લાખ કરોડ વધારાના રૂપિયા અર્થતંત્રમાં નાખશે.  

ભારતમાં બ્રિટન જેવું પ્રોત્સાહન પેકેજ ! 

સૂત્રોનું માનવું છે કે સરકારનું આર્થિક પેકેજ બ્રિટન જેવું હોઈ શકે છે. બ્રિટને 30 અબજ પાઉન્ડના પ્રોત્સાહન પેકેજની જાહેરાત કરી હતી જેમાં મજૂરો અને કર્મચારીઓ તથા સ્વાસ્થ્ય સેવા પ્રણાલીને વધુ મહત્વ આપવામાં આવ્યું હતું. આ પેકેજમાં શ્રમ, સ્વાસ્થ્યસેવા અને કારોબાર પર વધુ ધ્યાન આપવામાં આવ્યું હતું. સૂત્રો અનુસાર પીએમ મોદીનું આર્થિક પેકેજ પણ આ જ પ્રકારનું હોઈ શકે છે જેમાં શ્રમિકોના વેતન પ્રોત્સાહન જેવી લોભામણી જાહેરાત કરવામાં આવી શકે છે. આ સિવાય મોટા ભાગના સેકટર માટે આ પેકેજમાં વ્યાપક સ્થાન આપવામાં આવશે.