મંદીની આંચ / ટીમ ઈન્ડિયા સુધી પહોંચ્યો મંદીનો રેલો! આ કંપનીઓ BCCI સાથે છેડો ફાડવાની તૈયારીમાં, કરોડો રૂપિયાનું દેવું

• ભારતીય ક્રિકેટ સુધી પહોંચી મંદીની આંચ
• બાયજૂસ પર BCCIના 86 કરોડનુ દેવુ
• પેટીએમ પણ ખેંચી રહી છે હાથ 

બાયજૂસ પર બોર્ડના 86.21 કરોડ રૂપિયાનુ દેવુ 

વિશ્વભરમાં મંદીની આશંકાઓ વચ્ચે કંપનીઓ છટણી અને ખર્ચમાં ઘટાડો કરી રહી છે. એવામાં અત્યાર સુધી વિશ્વમાં જાહેરાતદાતાઓના માનીતા રહેલા ભારતીય ક્રિકેટ સુધી મંદીની આંચ પહોંચી રહી છે. એપ્રિલમાં એડટેક કંપની બાયજૂસ અને બીસીસીઆઈએ 2023ના અંત સુધીમાં ભારતમાં યોજાનારા વન-ડે વિશ્વ કપના અંત સુધી પોતાની ભાગીદારી વધારવા પર સહમતિ દર્શાવી હતી. આ સાથે પ્રાઈસમાં 10 ટકાનો વધારો કરવામાં આવ્યો હતો. બીસીસીઆઈ અપેક્સ કાઉન્સિલમાં ગુરૂવારે આ મુદ્દે ચર્ચા કરવામાં આવી. બીસીસીઆઈના એક સુત્રએ બેઠક બાદ પીટીઆઈ સાથેની વાતચીતમાં કહ્યું, અત્યાર સુધી બાયજૂસ પર બોર્ડના 86.21 કરોડ રૂપિયાનુ દેવુ છે.  

ગયા મહિને બાયજૂસે કર્યા છે છૂટા

બાયજૂસ 2019માં બોર્ડ સાથે જોડાઈ હતી, જ્યારે મોબાઈલ મેન્યુફેક્ચરર ઓપ્પોએ પોતાના સ્પોન્સરશિપ રાઇટ ઑનલાઈન ટ્યુટોરિયલ ફર્મને ટ્રાન્સફર કરી દીધા હતા. બાયજૂસે ગયા મહિને જણાવ્યું હતુ કે તેણે 500 લોકોને છૂટા કરી દીધા છે. તેણે 1000 લોકોને કાઢવાની ખબર પર સ્પષ્ટતા આપતા આ વાત કહી હતી. 

પેટીએમે કર્યો આ અનુરોધ

એક અન્ય ઘટનાક્રમમાં ફિનટેક કંપની પેટીએમે બીસીસીઆઈ સાથે પોતાના ઈન્ડિયા હોમ ક્રિકેટ ટાઈટલ અધિકાર માસ્ટરકાર્ડને આપવાની વિનંતી કરી છે. પેટીએમ અને બીસીસીઆઈની વચ્ચે વર્તમાન કરાર સપ્ટેમ્બર 2019થી લઇને 31 માર્ચ 2023 સુધીનો છે. એક સુત્રએ કહ્યું, પેટીએમે બીસીસીઆઈ પાસેથી સ્પોન્સરશિપ કોઈ અન્ય કંપનીને સોંપવાની વિનંતી કરી છે અને બોર્ડ તેની પર વિચાર કરી રહ્યું છે.