આપણા દેશમાં ક્રિકેટ અને બોલિવૂડનું એક ખાસ કનેક્શન રહ્યું છે. તાજેતરનું જ ઉદાહરણ છે વિરાટ કોહલી અને અનુષ્કા શર્મા. લાંબા સમય સુધી એકબીજાને ડેટ કર્યા બાદ તેઓ લગ્નના બંધનમાં બંધાઇ ગયા. અગાઉ પણ અનેક જોડીઓ રહી ચુકી છે જેનું ક્રિકેટ અને બોલિવૂડ સાથે કનેક્શન હોય. જોકે હવે આ ચર્ચામાં વધુ એક નામ જોડાઇ ગયું છે.
રિપોર્ટ્સ અનુસાર પૂર્વ ક્રિકેટર અને હાલના ટીમ ઇન્ડિયાના હેડ કોચ રવિ શાસ્ત્રી એક્ટ્રેસ નિમરત કૌરને ડેટ કરી રહ્યો છે. તેઓ ગત બે વર્ષથી એકબીજા સાથે છે. વર્ષ 2015માં એક કાર લૉન્ચિંગ દરમિયાન રવિ શાસ્ત્રી અને નિમરત કૌરની મુલાકાત થઇ હતી. કહેવામાં આવી રહ્યું છે કે તેમના અફેરની શરૂઆત અહીથી જ થઇ.
વર્ષ 1990માં રવિ શાસ્ત્રીએ રિતુ સિંહ સાથે લગ્ન કર્યા હતા. લગ્નના 22 વર્ષ બાદ તેમણે વર્ષ 2012માં છૂટાછેડા માટે અરજી કરી હતી. રવિ શાસ્ત્રી અને રિતુ વચ્ચે અણબનાવ ચાલી રહ્યો હતો જે પછી તેમણે અલગ થવાનો નિર્ણય લીધો. તેમની એક પુત્રી પણ છે.
રિતુ સિંહ સાથે લગ્ન કરતાં પહેલાં રવિ શાસ્ત્રી અને એક્ટ્રેસ અમૃતા સિંહનું લાંબા સમય સુધી અફેર રહ્યું હતું. તે સમયે અમૃતા સિંહ સ્ટેડિયમમાં રવિ શાસ્ત્રીને ચિયર કરતા જોવા મળતી હતી જો કે તેમના લગ્ન ન થઇ શક્યાં અને તેઓ અલગ થઇ ગયા.
ઉલ્લેખનીય છે કે રવિ શાસ્ત્રી હાલ ટીમ ઇન્ડિયાની સાથે ઇંગ્લેન્ડમાં છે. સાથે જ નિમરત કૌર છેલ્લે ALT બાલાજીની વેબ સીરિઝમાં જોવા મળી હતી. નિમરત કૌર પ્રથમ વાર ઇરફાન ખાન સાથે ‘લંચ બૉક્સ’માં જોવા મળી હતી. આ ઉપરાંત ફિલ્મ 'એરલિફ્ટ' માં તેણે અક્ષય કુમાર સાથે કામ કર્યુ છે.