ક્રિકેટ / વર્લ્ડકપ ટ્રોફી જીત્યા પહેલાં જ ટીમ ઇન્ડિયા બની ગઈ 'શહેનશાહ'

હવે ટીમ ઇન્ડિયા દુનિયાની નંબર વન ટીમ બની ગઈ છે. તેણે ઈંગ્લેન્ડને પાછળ છોડીને વન ડે રેન્કિંગમાં ટોચનું સ્થાન હાંસલ કરી લીધું છે.  ભારત હાલ 123 પોઇન્ટ સાથે નંબર વન છે. વર્લ્ડકપમાં ઈંગ્લેન્ડની ટીમ સાતમાંથી ત્રણ મેચ હારી ચૂકી છે અને તેનું નુકસાન તેણે રેન્કિંગમાં ભોગવવું પડ્યું છે. વર્લ્ડકપ શરૂ થતાં પહેલાં ઈંગ્લેન્ડના 124 પોઇન્ટ હતા, પરંતુ પાકિસ્તાન, શ્રીલંકા અને ઓસ્ટ્રેલિયા સામેના પરાજયને કારણે અંગ્રેજોને ઝટકો લાગ્યો છે. ઈંગ્લેન્ડને બે પોઇન્ટનું નુકસાન થતાં હવે તે 122 પોઇન્ટ સાથે બીજા સ્થાને ધકેલાઈ ગઈ છે. જોકે આઇસીસીનું રેન્કિંગ હજુ અપડેટ થયું નથી. ICC કોઈ પણ સીરિઝ કે ટૂર્નામેન્ટની સમાપ્તિ બાદ જ રેન્કિંગ અપડેટ કરે છે.

After three defeats at #CWC19, England have fallen from the number one spot in the ICC men's ODI team rankings that they've held since May 2018.

India take their place as the top-ranked side!

Full rankings 👉 https://t.co/LN491yybaS pic.twitter.com/NZP065gQuD

— ESPNcricinfo (@ESPNcricinfo) June 26, 2019

ઈયોન મોર્ગનના નેતૃત્વવાળી ઈંગ્લેન્ડની વન ડે ક્રિકેટ ટીમ ગત મે-2018થી નંબર વનના સ્થાને હતી. ભારતને હટાવીને જ ઈંગ્લેન્ડની ટોચના સ્થાને પહોંચી હતી. ન્યૂઝીલેન્ડની ટીમ 116 પોઇન્ટ સાથે ત્રીજા સ્થાન પર છે. ઓસ્ટ્રેલિયા (112) ચોથા અને દક્ષિણ આફ્રિકા (109) પાંચમા સ્થાન પર છે. પાકિસ્તાન (94) છઠ્ઠા, બાંગ્લાદેશ (92) સાતમા, શ્રીલંકા (78) આઠમા, વિન્ડીઝ (78) નવમા અને અફઘાનિસ્તાન (60) દસમા સ્થાને છે.

ભારતીય ટીમનું મનોબળ વધશે:
ભારતીય ટીમને નંબર વનનો તાજ મળવાથી ટીમના ખેલાડીઓનું મનોબળ વધશે. આજે ટીમ ઇન્ડિયાનો મુકાબલો વિન્ડીઝ સામે છે. આજની મેચ જીતીને ભારત સેમિફાઇનલની સફર વધુ મજબૂત કરી લેશે. ભારતે આજની મેચ ઉપરાંત અન્ય ત્રણ મેચ- ઈંગ્લેન્ડ, બાંગ્લાદેશ અને શ્રીલંકા સામે પણ રમવાની છે.