WC 2019 / બે જર્સી સાથે રમશે ટીમ ઇન્ડિયા, એક જર્સીનો રંગ પાછળથી ઓરેન્જ હશે

સૂત્રોના જણાવ્યા અનુસાર 'આ અવે જર્સી નથી, આ એક જાતની ઓલ્ટરનેટ જરસી છે અને ICCના નિયમો પર આધારિત છે.'

સૂત્રોએ જણાવ્યું, ''લોકો આ જર્સીને લઈ ઘણી જાતની વાતો કહી રહ્યા છે. આને અવે જર્સી બતાવવામાં આવી રહી છે, પરંતુ એવું નથી. આ એક ઓલ્ટરનેટ જર્સી  છે, જે ટીમ ઇન્ડિયા ૩૦ જૂને ઈંગ્લેન્ડ સામેની મેચમાં પહેરશે. ICCના નિયમો અનુસાર યજમાનને ICC ઇવેન્ટમાં રમતાં પોતાની જર્સી ના રંગને જાળવી રાખવાનો હોય છે, કારણ કે ભારતની જર્સી પણ બ્લૂ રંગની છે. આ સ્થિતિમાં ભારતની જર્સીમાં આ ફેરફાર કરવામાં આવ્યો છે.''

ઈંગ્લેન્ડની બ્લૂ જર્સીનો રંગ થોડો આછો છે, જ્યારે ટીમ ઇન્ડિયાની બ્લૂ જર્સીનો રંગ થોડો ડાર્ક છે. આ પહેલાં ટીમ ઇન્ડિયાએ ક્યારેય પણ એકથી વધુ કલરવાળી જર્સીનો ઉપયોગ કર્યો નથી. એવું પહેલી વાર બનશે કે ટીમ બે કલરની જર્સી સાથે મેદાનમાં જોવા મળશે.

આ વર્લ્ડકપમાં રમી રહેલી ઈંગ્લેન્ડ, ભારત, શ્રીલંકા અને અફઘાનિસ્તાનની ટીમની જરસીનો કલર બ્લૂ છે. આથી જ ટીમ ઇન્ડિયાએ ઈંગ્લેન્ડ અને અફઘાનિસ્તાન સામેની મેચમાં આગળથી બ્લૂ અને પાછળથી ઓરેન્જ રંગની જર્સી સાથે મેદાનમાં ઊતરવું પડશે, કારણ આ બંને મેચમાં ટીમ ઇન્ડિયાને મહેમાન ટીમનો દરજ્જો મળ્યો છે. યજમાન ટીમને પોતાની જરસીનો કલર જાળવી રાખવાનો વિશેષ અધિકાર છે.