ભારત પાકિસ્તાનની પઠાનકોટ સરહદ પાસે સુરક્ષા દળોને ફરી એક વખત ફુગ્ગો મળી આવ્યો છે. જેથી સુરક્ષા એજન્સીઓ અને સ્થાનિક પોલીસે સાથે મળી આ મામલે સર્ચ ઓપરેશન હાથ ધર્યું છે
પઠાનકોટ સરહદ પાસે પાકિસ્તાની ફુગ્ગો મળી આવ્યો
સુરક્ષાદળોએ સર્ચ ઓપરેશન શરૂ કર્યું
અગાઉ પણ અહીયાથી પાકિસ્તાની ફુગ્ગા મળ્યા છે
ભારત પાકિસ્તાનની સરહદ પર પઠાનકોટના બમિયાલ સેક્ટર પાસે સુરક્ષાદળોને એક પાકિસ્તાની ફુગ્ગો મળી આવ્યો છે. જેને લઈને પોલીસ તેમજ સુરક્ષાદળો દ્વારા સર્ચ ઓપરેશન શરૂ કરવામાં આવ્યું છે. જોકે અત્યાર સુધી કોઈ પણ પ્રકારની શંકાસ્પદ વસ્તુ કે કોઈ પણ ખાસ માહિતી સામે નથી આવી.
અગાઉ 2 ફુગ્ગા મળી આવ્યા છે
અગાઉ એપ્રિલ 2021 અને ઓગસ્ટ 2020માં પણ પાકિસ્તાની ફુગ્ગાઓ ભારતીય સીમમાંથી મળ્યા હતા. જેમા પાકિસ્તાની ઝંડા અને પાકિસ્તાની સ્લોગનો લખ્યા હતા. આ બંન્ને ફુગ્ગાઓને બીએસએફના જવાનો દ્વારા પાડવામાં આવ્યા હતા.
સ્થાનિક પોલીસે સંયુક્ત ઓપરેશન હાથ ધર્યુ
હાલ જવાનોને જે ફુગ્ગો મળી આવ્યો છે, તેનો આકાર ઘોડા જેવો છે. પરંતુ તે ફુગ્ગા પર કશું લખ્યું નથી. તેમ છતા સુરક્ષા એજન્સીઓ એલર્ટ થઈ ગઈ છે, અને તેમણે સ્થાનિક પોલીસની મદદ લઈને સમગ્ર મામલે તપાસ આરંભી છે. જવાનોએ સવારના સમયે જેવો ફુગ્ગો જોયો કે તેમણે સમગ્ર મામલે પોલીસને સૌથી પહેલા જાણ કરી હતી.
સુરક્ષા એજન્સીઓની ચાંપતી નજર
પોલીસ જ્યારે સ્થળ પર પહોચી ત્યારે તેમણે ફુગ્ગાની તપાસ હાથ ધરી. હાલ તેઓ તે તપાસ કરી રહ્યા છે કે ફુગ્ગો ક્યાથી આવ્યો છે. આપને જણાવી દઈએ કે પઠાનકોટ એક સંવેદનશીલ ક્ષેત્ર છે.આ ક્ષેત્ર હંમેશા વિરોધી તત્વોના નિશાના પર રહે છે. અને વારંવાર અહીયાથી ફુગ્ગા આવતા હોય છે. જેથી સુરક્ષા એજન્સીઓ દ્વારા અહીયા ચાપતી નજર રાખવામાં આવી રહી છે.
જમ્મૂ એરફોર્સ હુમલો
ઉલ્લેખનીય છે કે થોડાક દિવસો પહેલાજ જમ્મૂ એરફોર્સ સ્ટેશન પર ડ્રોન દ્વારા એલઈડી ફેકીને હુમલો કરવામાં આવ્યો હતો. જે મામલે તપાસ એજન્સીઓ હજુ પણ તપાસ કરી રહી છે. તેવામાં આ ફુગ્ગો પઠાનકોટ સરહદ પાસેથી મળી આવ્યો છે. જેથી સુરક્ષા એજન્સીઓ હવે વધું સચેત થઈને સમગ્ર મામલે તપાસ કરી રહી છે.