બિઝનેસ પ્રોડક્ટ્સ અને સર્વિસીઝ માટે ઓનલાઇન માર્કેટ પ્લેસ ઉપલબ્ધ કરાવનાર કંપની ઇન્ડિયા માર્ટ ઇન્ટરમેશન પોતાનો ઇનિશિયલ પબ્લિક ઓફરિંગ (આઇપીઓ) ઇશ્યૂ લઇને આવી રહી છે.
ઇન્ડિયા માર્ટનો આઇપીઓ ર૪ જૂનના રોજ ખૂલશે અને ર૬ જૂનના રોજ સબસ્ક્રિપ્શન બંધ થશે. કંપનીના જણાવ્યા અનુસાર આઇપીઓ માટે પ્રાઇસ બેન્ડ રૂ.૯૭૦-૯૭૩ પ્રતિશેર રાખવામાં આવી છે. મોદી સરકારના બીજા કાર્યકાળ દરમ્યાન શેરબજારમાં આવનાર આ પ્રથમ આઇપીઓ છે.
કંપની દ્વારા જારી કરાયેલ નિવેદન અનુસાર કંપની રૂ.૧૦ની ફેસ વેલ્યૂ ધરાવતા ૪૮,૮૭,૮૬ર ઈક્વિટી શેર ઓફર કરશે, તેમાં પ્રાઇસ બેન્ડ એટલે કે પ્રત્યેક શેરની કિંમત રૂ.૯૭૦-૯૭૩ વચ્ચે હશે. કંપની પોતાના હિસ્સાના ૧૪,૩૦,૧૦૯ શેર વેચશે.
ઇશ્યૂની અપર પ્રાઇસ બેન્ડ પર કંપની આઇપીઓ દ્વારા રૂ.૪૭પ કરોડ એકત્ર કરી શકે છે. આ ઉપરાંત કંપની અન્ય શેરધારકો તરફથી ૧,૩૭,૦૦૦ ઇક્વિટી શેર વેચશે.