ઓસ્ટ્રેલિયા સામેની બીજી T20માં ભારતનો 6 વિકેટે વિજય થયો છે. ભારતે 194 રનનો ટાર્ગેટ ચેઝ કરીને શ્રેણીમાં 2-0ની અજેય લીડ મેળવી લીધી હતી.
ટીમ ઇન્ડિયાએ ઓસ્ટ્રેલિયાને સિડની રમાયેલ T-20 મેચમાં 6 વિકેટથી પરાજય આપીને 3 મેચોની સીરિઝ પર કબજો મેળવી લીધો હતો. ઉલ્લેખનીય છે કે, પ્રથમ બેટિંગ કરવા ઉતરેલી ઓસ્ટ્રેલિયન ટીમે 20 ઓવરમાં 5 વિકેટ ગુમાવીને 194 રન બનાવીને ભારતને 195 રન બનાવવાનો ટાર્ગેટ આપ્યો હતો. જો કે, જવાબમાં ભારતે 19.4 ઓવરમાં માત્ર 4 વિકેટ હુમાવીને 195 રન કરી શ્રેણી વિજય પ્રાપ્ત કર્યો હતો.
ઓસ્ટ્રેલિયા તરફથી મેથ્યુ વેડ (58) અને સ્ટીવ સ્મિથ(46)ના પ્રદર્શનથી ઓસ્ટ્રેલિયાએ ભારતને 195 રનનો ભારેખમ ટાર્ગેટ આપ્યો હતો. જો કે બીજી તરફ શિખર ધવને અને વિરાટ કોહલીએ અનુક્રમે 52 અને 40 રન બનાવીને ભારતને મજબૂત સ્થિતિ આપી હતી અને છેલ્લી ઓવરમાં હાર્દિકે મેચ ભારતના નામે કરી આપી હતી.
ભારે રસાકસીમાં છેલ્લી ઓવરમાં જીત્યું ભારત
કાંગારુંઓ સામેની આ મેચ ખૂબ રોમાંચક પણ હતી જેમાં છેલ્લી ઓવરમાં 14 રનની જરૂર હતી અને હાર્દિક પંડ્યાએ ચોથા બોલે સિક્સ ફટકારીને મેચ જીતાડી. હાર્દિકએ પંડ્યાએ મેચમાં ધુઆંધાર 2 ચોગ્ગા અને 3 સિક્સની મદદથી 44 રન ફટકાર્યા.
શિખર ધવને પણ જોરદાર પ્રદર્શન
મેચમાં ભારતીય ટીમના ગબ્બર શિખર ધવને પણ જોરદાર પ્રદર્શન કર્યું. T-20 કરિયરમાં શિખર ધવને પોતાની 11મી અડધી સદી ફટકારી અને 52 રન કર્યા. એડમ ઝામ્પાની બોલ પર ધવન કેચ આઉટ થયો.
મેથ્યુ વેડ થયો વિચિત્ર રીતે આઉટ
આ મેચમાં ફિન્ચની ગેરહાજરીમાં ઓસ્ટ્રેલિયાના કેપ્ટન મેથ્યુ વેડ 58 રન સાથે ભારત માટે મોટો ખતરો બની રહ્યો હતો. એવામાં વોશિંગ્ટન સુંદરની 8મી ઓવરના છેલ્લા બોલમાં વેડ લેગ સાઈડમાં ફ્લિક શોટ મારવા જઈ રહ્યો હતો. એવામાં બોલ બેટની ધારને અથડાઈને હવામાં ઉછળ્યો હતો જે સીધો કોહલી તરફ આવ્યો હતો.
જો કે આ સાવ સહેલો કેચ કોહલીના હાથથી છૂટી ગયો હતો. જો કે વેડને લાગ્યું કે તે આઉટ થઇ ગયો છે અને તેણે હતાશામાં કેચ થયો છે કે નહીં તે જોવાની તસ્દી પણ ન લીધી. એટલામાં કોહલીએ K L રાહુલને બોલ થ્રો કર્યો હતો જેનાથી રાહુલે આરામથી ક્રીઝની બહાર ઉભેલા વેડને રન આઉટ કરી દીધો હતો.