T20 Worldcup / આજે તો જીતવું જ પડશે, માત્ર ખેલાડીઓ અને ક્રિકેટફેન્સ જ નહીં આ લોકોનાં પણ જીવ અધ્ધર 

ભારત અને ન્યુઝીલેન્ડ વચ્ચે મહામુકાબલો

મેચ જીતવી જ પડે તેવી સ્થિતિ

સ્પોન્સર્સનાં જીવ અધ્ધર 

ટ્વેન્ટી ટ્વેન્ટી વર્લ્ડકપમાં આજે ભારત અને ન્યુઝીલેન્ડ વચ્ચે મહામુકાબલો છે. આજે ભારતને કોઈ પણ હિસાબે મેચ જીતવી જ પડે તેવી સ્થિતિ છે. એક રીતે હવે આ મેચ ક્વાર્ટર ફાઇનલ જેવી જ થઈ ગઈ છે. અહીંથી હરનારી ટીમ માટે સેમિફાયનલ સુધીની સફર અઘરી થઈ જશે તે પાક્કું છે માટે બંને ટીમો આજે પૂરું જોર લગાવીને રમવા ઉતરશે તે નિશ્ચિત થઈ ગયું છે. 

ભારત પોતાની પ્રથમ મેચમાં પાકિસ્તાન સામે દસ વિકેટે હારી ગયું હતું. આ મેચમાં કેપ્ટન કોહલીની કેપ્ટન્સીની અગ્નિપરીક્ષા થશે.  સાથે સાથે ભારતીય ખેલાડીઓ પર પણ સારું પ્રદર્શન કરવાનું દબાણ સર્જાયું હતું. 

ક્વાર્ટર ફાઇનલ જેવી મેચ 
આજે ક્વાર્ટર ફાઇનલ જેવી મેચ અગાઉ ભારતીય બેટ્સમેનો ટ્રેન્ટ બોલ્ટની સામે રમવાની તૈયારી કરીને જ મેદાનમાં ઉતરશે કારણ કે ભારતીય બેટ્સમેનો અગાઉ તેની સામે કાચા પડતાં દેખાયા હતા. કેપ્ટન કેન વિલિયમસન 100% ફિટ ન હોવાનું બહાર આવ્યું હતું પરંતુ હવે તે પણ ફિટ થઈ ગયો હોવાના સમાચાર આવ્યા છે. 

બોલરો પર જવાબદારી 
આખરી મેચમાં ભારતીય બોલરો પાકિસ્તાનનાં ઓપનર્સને આઉટ કરવામાં નિષ્ફળ ગયા હતા. પાકિસ્તાનના એક પણ બેટ્સમેનની વિકેટ ખેરવી ન શકવાને કારણે મોટી નિષ્ફળતા મળી હતી. ભારતીય ધુરંધર ઓલરાઉન્ડર હાર્દિક પંડયા કમરના દુખાવાનાં કારણે બોલિંગ કરી શકતો નથી તો મિસ્ટ્રી સ્પિનર વરુણ ચક્રવર્તી કોઈ મિસ્ટ્રી બતાવી શક્યો નહોતો. 

ભારતને લેવાનો બદલો 
અગાઉ વર્લ્ડ કપ સેમિફાઇનલમાં ન્યુઝીલેન્ડ ભારતને લો સ્કોરિંગ મેચમાં હરાવી ગયું હતું. વર્લ્ડ ટેસ્ટ ચેમ્પિયનશીપની ફાયનલ ટેસ્ટ મેચમાં પણ ભારત ન્યુઝીલેન્ડ સામે જ હાર્યું હતું. આખરે હવે આ મેચમાં ભારત પર આ બંને વખતનો બદલો લેવાનું પ્રેશર છે. 

સ્પોન્સર્સનાં જીવ અધ્ધર 
ભારત અને ન્યુઝીલેન્ડ વચ્ચેની આ મેચ સ્પોન્સર્સ માટે પણ અતિ મહત્વની છે કારણ કે આઇસીસી ટ્વેન્ટી ટ્વેન્ટી વર્લ્ડ કપનાં આયોજક તરીકે ભારતીય ક્રિકેટ કંટ્રોલ બોર્ડ છે અને અગાઉ ભારતમાં જ રમવાનો હતો પરંતુ કોવિડનાં કારણે વર્લ્ડકપ યુએઇમાં શિફ્ટ કરવામાં આવ્યો હતો. જો કે ભતીય ટીમ વર્લ્ડ કપમાંથી બહાર નીકળી જાય તો ભારતીય દર્શકોને નજરમાં રાખતા સૌથી વધુ નુકસાન પણ બીસીસીઆઈનું જ છે. સ્પોન્સરશીપ જો કે મેચ નહીં પણ ટુર્નામેંટ માટે હોય છે એટલે કંપનીઓએ તો પૈસા આપવા જ પડે છે માટે આ કંપનીઓ અને જેમની એડ ટીશર્ટ્સ પર નાખવામાં આવે છે તેઓને પણ લોસ જવાની સંભાવના છે. 

1200 કરોડ રૂપિયાની ડીલ

એડવર્ટાઈઝ માટે ડિઝની પ્લસ હોટસ્ટાર દ્વારા 1200 કરોડ રૂપિયાની ડીલ કરવામાં આવી છે. 2016 માં ભારતમાં થયેલ ટી-ટ્વેન્ટી વર્લ્ડ કપની તુલનામાં ત્રણ ગણો વધારો છે. જો દર્શકોની સંખ્યામાં ઘટાડો થાય તો સ્ટારને પણ નુકસાન જશે અને સાથે તેમણે 250-270 કરોડ રૂપિયાની ડીલ કરી હોવાથી તેઓને પણ મોટાં પાયે નુકસાન જવાની સંભાવનાને પગલે તેઓના જીવ પણ અધ્ધર થઈ ગયા છે.