નવી દિલ્હી: આગામી તા. 6 ડિસેમ્બરથી ભારત અને વિન્ડીઝ વચ્ચે ટી-20 શ્રેણી શરૂ થઈ રહી છે. આ શ્રેણી પહેલાં જ ભારત અને વિન્ડીઝની ટીમને ઝટકા લાગ્યા છે. ભારતનો ઓપનિંગ બેટ્સમેન શિખર ધવન ઈજાને કારણે વિન્ડીઝ સામેની ટી-20 શ્રેણીમાંથી બહાર થઈ ગયો છે, જ્યારે ખરાબ ફોર્મને કારણે વિન્ડીઝના વિસ્ફોટક બેટ્સમેન ક્રિસ ગેઈલે આંતરરાષ્ટ્રીય ક્રિકેટમાંથી બ્રેક લેવાનો નિર્ણય કરતા તે પણ ભારતના પ્રવાસે નહીં આવે. ભારતીય ટીમમાં શિખરના સ્થાને સંજુ સેમસનને ટીમમાં સામેલ કરવામાં આવે તેવી શક્યતા છે.
6 ડિસેમ્બરથી ભારત અને વિન્ડીઝ વચ્ચે ટી-20 શ્રેણી શરૂ થશે
ભારતનો ઓપનિંગ બેટ્સમેન શિખર ધવન ઈજાને કારણે નહીં રમી શકે
વિન્ડીઝના બેટ્સમેન ક્રિસ ગેઈલે ક્રિકેટમાંથી બ્રેક લેવાનો કર્યો નિર્ણય
શિખર ધવનને સૈયદ મુસ્તાક અલી ટ્રોફીમાં મહારાષ્ટ્ર સામે લીગ મેચમાં ઘૂંટણમાં ઈજા થતાં ટાંકા લેવા પડ્યા હતા. એ સમયે ધવને જણાવ્યું હતું કે તે ચાર-પાંચ દિવસમાં સાજો થઈ જશે. ધવનની ઈજા બાદ પસંદગી સમિતિના અધ્યક્ષ એમ. એસ. કે. પ્રસાદે ગત સોમવારે સૂરતમાં નેશનલ ક્રિકેટ એકેડેમીના ફિઝિયો આશિષ કૌશિક સાથે ચર્ચા કરી હતી.
કૌશિકે ધવન સમયસર ફિટ નહીં થાય તેવી જાણકારી પ્રસાદને આપી હતી
નિરાશ ક્રિસ ગેઈલે આંતરરાષ્ટ્રીય ક્રિકેટમાંથી બ્રેક લીધો
જોહાનિસબર્ગઃ વિન્ડીઝના ઓપનિંગ બેટ્સમેન ક્રિસ ગેઈલે આંતરરાષ્ટ્રીય ક્રિકેટમાંથી બ્રેક લેવાની જાહેરાત કરી છે. આ નિર્ણય બાદ ગેઈલ આગામી મહિને ભારત સામેની વન ડે અને ટી-20 શ્રેણીમાં નહીં રમે. ક્રિકેટમાંથી બ્રેક લઈને ગેઈલ પોતાની 2020ની યોજનાઓ પર ધ્યાન કેન્દ્રિત કરવા ઇચ્છે છે. ગેઈલે જણાવ્યું, ''વિન્ડીઝ બોર્ડે મને વન ડેમાં રમવા માટે બોલાવ્યો છે, પરંતુ હું રમી નહીં શકું. પસંદગીકારો ઇચ્છે છે કે હું યુવાઓ સાથે રમું, પરંતુ હવે હું બ્રેક લેવા જઈ રહ્યો છું.'' આ ઉપરાંત ગેઈલ ઓસ્ટ્રેલિયાની બિગ બેશ લીગમાં પણ નહીં રમે. તેણે જણાવ્યું, ''હું બિગ બેશમાં રમવાનો નથી. હું નથી જાણતો કે હવે હું ક્યારે રમીશ.''
ક્રિસ ગેઇલનું દર્દ છલકાયુંઃ બધી ફ્રેંચાઇઝી મને બોજ સમજી રહી છે
ક્રિસ ગેઈલે પોતાના ટીકાકારો પર નિરાશા વ્યક્ત કરતાં કહ્યું, ''હું હંમેશાં એ ટીમ પર બોજ બની જાઉં છું, જેના તરફથી હું રમ્યો છું. આમાં બધા ફોર્મેટની દુનિયાભરની ટીમના ખેલાડીઓ, મેનેજમેન્ટ અને બોર્ડના સભ્યો સામેલ છે.'' તાજેતરમાં ગેઈલે દક્ષિણ આફ્રિકામાં રમાઈ રહેલી મજાન્સી સુપર લીગની જોજી સ્ટાર્સ ટીમ તરફથી રમી રહ્યો હતો. આ ટૂર્નામેન્ટ દરમિયાન જ તેણે પોતાનું દર્દ વ્યક્ત કર્યું. ગેઈલે કહ્યું, ''હું ફક્ત આ ટીમ માટે વાત નથી કરી રહ્યો. હું હંમેશાં બોજ બની જાઉં છું, જ્યારે મેં બે-ત્રણ કે ચાર રન બનાવ્યા હોય. એવું લાગે છે કે એક ખાસ વ્યક્તિ ટીમ પર બોજ છે. હું કોઈ પણ જાતનું સન્માન મેળવી શકતો નથી. લોકો એ યાદ નથી રાખતા કે તેમના માટે મેં શું કર્યું છે. હું ફોર્મમાં નથી રમતો ત્યારે મને કોઈ જાતનું સન્માન મળતું નથી.'' આ ટૂર્નામેન્ટમાં પણ ગેઈલનું કંગાળ ફોર્મ ચાલુ જ રહ્યું છે. તે આ ટૂર્નામેન્ટની છ ઇનિંગ્સમાં માત્ર 101 રન બનાવી શક્યો છે.