ભારત અને વેસ્ટ ઈન્ડિઝ વચ્ચે ત્રણ મેચની વનડે સીરીઝની પહેલી મેચ ચેન્નઈની એમ.એ. ચિદંબરમ સ્ટેડિયમ ખાતે રમાવાની છે. આ મેચ આજે બપોરે 1:30 વાગ્યે શરૂ થશે. વેસ્ટ ઈન્ડીઝ સામેની આ વનડે સીરીઝમાં ભારતીય ટીમે આકરો પડકાર આપશે. હવે ટીમ ઈન્ડિયાની નજર કેરેબિયન ટીમ સામે સતત 10મી દ્વિપક્ષીય વનડે સીરિઝ જીતવા પર છે.
ભારત અને વેસ્ટ ઈન્ડિઝ વચ્ચે વનડે સીરીઝની પહેલી મેચ આજે રમાશે
બપોરે 1:30 વાગ્યે શરૂ થશે મેચ
ઓપનિંગની જવાબદારી રોહિત શર્મા અને કેએલ રાહુલને મળી શકે છે
ઓપનર: ધવનની ગેરહાજરીમાં વનડે સીરીઝમાં ઇનિંગ્સ ઓપનિંગની જવાબદારી રોહિત શર્મા અને કેએલ રાહુલને સોંપવામાં આવી શકે છે. ધવનને હજી સૈયદ મુસ્તાક અલી ટ્રોફી ટૂર્નામેન્ટ દરમિયાન થયેલી ઈજા ઠીક થઈ નથી. ધવનના વિકલ્પ તરીકે મયંક અગ્રવાલને ટીમમાં સામેલ કરવામાં આવ્યો છે જોકે, હવે એ જોવાનું રહ્યું કે, તેને વનડે ક્રિકેટમાં ડેબ્યૂ કરવાની તક મળશે કે નહીં. કર્ણાટકનો આ બેટ્સમેને ટેસ્ટ ક્રિકેટમાં શાનદાર પર્ફોમન્સ આપ્યું હતું અને તે ડિંડીગુલમાં તમિળનાડુ સામે રણજી ટ્રોફી મેચ રમ્યા બાદ ટીમથી જોડાયો હતો.
નંબર 3: કેપ્ટન વિરાટ કોહલી પોતે 3 નંબર પર ઉતરશે. વનડે પહેલા રમવામાં આવેલી ટી-20 સીરિઝની છેલ્લી મેચમાં વિરાટ કોહલીએ 29 બોલમાં અણનમ 70 રન બનાવ્યા હતા. કોહલીના ચાહકોને વન ડે સીરીઝમાં પણ આવી જ તોફાની બેટિંગની આશા છે.
નંબર 4: શ્રેયસ અય્યર તકોનો લાભ લેવામાં સફળ રહ્યો છે અને અપેક્ષા છે કે તેને ચોથા નંબર પર રાખવામાં આવશે. આ સ્થાન થોડા સમયથી ચર્ચાનું કેન્દ્ર રહ્યું છે. અંબતી રાયડુ અને વિજય શંકર સહિત ઘણા ખેલાડીઓએ આ સ્થાને ટ્રાય કરી ચૂક્યા છે. જે બાદ હવે અય્યર આ ક્રમ પર તેની જગ્યા બનાવવાના પ્રયાસમાં લાગેલો છે.
નંબર 5: છેલ્લા ઘણાં સમયથી સારું પ્રદર્શન ન દેખાડી શકનાર વિકેટકીપર બેટ્સમેન ઋષભ પંત પર બધાંની નજર રહેશે. આ વખતે ફરી પંતને કોહલી અને ટીમ મેનેજમેન્ટનો વિશ્વાસ જીવવાની તક મળશે. ઋષભ પંતને વિકેટ કીપિંગ અને નંબર 5 પર બેટિંગની જવાબદારી હશે.
ઓલરાઉન્ડર: કેદાર જાધવને નીચલા ક્રમમાં 6 નંબર પર તક મળી શકે છે. કેદાર જાધવ ટીમ ઈન્ડિયા માટે વધારાના સ્પિન બોલરનો વિકલ્પ પણ છે. મુંબઈના 26 વર્ષીય ઓલરાઉન્ડર શિવમ દુબેને ટી 20 સીરિઝમાં સારા પ્રદર્શન બાદ વનડેમાં ડેબ્યૂ કરવાની તક મળી શકે છે. શિવમ દુબે 7મા ક્રમે આવી શકે છે.
સ્પિન ડિપાર્ટમેન્ટ: આ મેચમાં રવિન્દ્ર જાડેજાને સ્પિન ડિપાર્ટમેન્ટમાં તક આપવામાં આવી છે. કુલદીપ યાદવ રવિન્દ્ર જાડેજા સાથે રમતા જોવા મળી શકે છે.
યુઝવેન્દ્ર ચહલ અને કુલદીપ યાદવની સ્પિન જોડીને ચેપાકની સ્પિન-ફ્રેન્ડલી પિચ પર એક સાથે રમવાનો મોકો મળે છે કે નહીં તે પણ જોવાનું રહેશે. આ બંને છેલ્લી વખત વર્લ્ડ કપમાં સાથે રમ્યા હતા.
ફાસ્ટ બોલર: અનુભવી મોહમ્મદ શમી અને દિપક ચહર ફાસ્ટ બોલર તરીકે સામેલ થઈ શકે છે. તેમને વેસ્ટ ઈન્ડીઝના આક્રમક બેટ્સમેનના પડકારનો સામનો કરવો પડશે.