સાઉથ આફ્રિકા સામેની આગામી ટેસ્ટ સીરિઝ માટે ટીમ ઇન્ડિયાની જાહેરાત થઈ ચૂકી છે. આ સીરિઝ તા. ૨ ઓક્ટોબરથી શરૂ થઈ રહી છે. વિન્ડીઝ સામેની સીરિઝ જીતીને આવેલી ટીમમાં એક મોટા ફેરફાર તરીકે કે. એલ. રાહુલની ટેસ્ટ ટીમમાંથી હકાલપટ્ટી કરી દેવામાં આવી છે અને તેના સ્થાને વન ડે ટીમના નંબર વન બેટ્સમેન રોહિત શર્માનો સમાવેશ કરવામાં આવ્યો છે.
રોહિત મોટી મોટી ઇનિંગ્સ રમવા માટે દુનિયાભરમાં જાણીતો છે. સિલેક્ટર્સે હવે તેને ટેસ્ટ ટીમમાં પણ ઓપનર તરીકે સામેલ કર્યો છે, કારણ કે ટેસ્ટ ક્રિકેટમાં ઓપનિંગ જોડીની સમસ્યા ઘણા સમયથી ટીમ ઇન્ડિયાને પરેશાન કરી રહી છે.
રોહિત શર્મા અત્યાર સુધીમાં 27 ટેસ્ટ મેચ રમ્યો છે. આ દરમિયાન તેણે 39.62 ની એવરેજથી 1585 રન બનાવ્યા છે, જેમાં 3 સેન્ચુરી અને 10 હાફ સેન્ચુરી સામેલ છે. રોહિતે અત્યાર સુધી ત્રીજા ક્રમથી લઈને છઠ્ઠા ક્રમે બેટિંગ કરી છે. છઠ્ઠા ક્રમે રોહિતનો રેકોર્ડ સૌથી સારો છે. તેણે છઠ્ઠા નંબર પર 16 મેચમાં 54.57 ની સરેરાશથી 1037 રન બનાવ્યા છે. આ જ રીતે ત્રીજા ક્રમે બેટિંગ કરીને ચાર મેચમાં 107 રન, ચોથા ક્રમે એક મેચમાં ચાર રન અને પાંચમા ક્રમે નવ મેચમાં 437 રન બનાવ્યા છે.
આ આંકડા જોતાં રોહિતની જગ્યા છઠ્ઠા ક્રમે જ બને છે, પરંતુ તેનો આ નંબર હનુમા વિહારીએ છીનવી લીધો છે. હનુમાએ વિન્ડીઝ પ્રવાસ દરમિયાન શાનદાર પ્રદર્શન કરતાં એક સેન્ચુરી અને બે હાફ સેન્ચુરી પણ ફટકારી દીધી.
લગભગ બે દાયકા પહેલાં સૌરવ ગાંગુલીના નેતૃત્વ હેઠળની ટીમ સામે આવી જ સમસ્યા સર્જાઈ હતી. એ સમયે વીરેન્દ્ર સેહવાગ નવો નવો ટીમમાં આવ્યો હતો. તેણે ટેસ્ટ કરિયરની શરૂઆત છઠ્ઠા નંબર પર સેન્ચુરી ફટકારી કરી હતી. એ મેચમાં રાહુલ દ્રવિડે શિવસુંદર દાસ સાથે ઇનિંગ્સની શરૂઆત કરી હતી. રાહુલ દ્રવિડે એ ભૂમિકા મજબૂરીમાં નિભાવી હતી, જોકે દ્રવિડ ત્રીજા નંબર પર બેટિંગ કરવા લાગ્યો ત્યારે વીરેન્દ્ર સેહવાગનું અંતિમ ઈલેવનમાં સ્થાન મુશ્કેલ બની ગયું. એ સમયે સૌરવ ગાંગુલીએ નવો રસ્તો કાઢ્યો. તેણે વીરુને ઇનિંગ્સની શરૂઆત કરવા માટે મનાવી લીધો. પછીનો ઇતિહાસ આખી દુનિયા જાણે છે.
હવે આજે ફરી એક વાર ટીમ ઇન્ડિયામાં ઓપનિંગની સમસ્યા સર્જાઈ છે. આથી જ ટીમ ઇન્ડિયા 'હિટમેન'માં નવો વીરુ શોધી રહી છે કે જે વીરુની જેમ ટીમને શાનદાર શરૂઆત અપાવી શકે. રોહિત શર્મા પણ વીરુની જેમ વિસ્ફોટક બેટિંગ માટે દુનિયાભરમાં જાણીતો છે. હવે જોવાનું એ રહે છે કે ટીમ ઇન્ડિયા અને ભારતીય ક્રિકેટ ચાહકોની આશામાં રોહિત શર્મા ખરો ઊતરશે કે નહીં.