ક્રિકેટ / વિદેશી પીચ પર છેલ્લા બે વર્ષમાં ભારત અને ન્યુઝીલેન્ડમાંથી કોનું પલડું રહ્યું છે ભારે

• ભારત અને ન્યૂઝીલેન્ડની ટીમ ૧૮ જૂનથી ફાઇનલમાં ટકરાશે 
• વિદેશી ધરતી પર બે વર્ષમાં ભારતે ૫૦%, ન્યૂઝીલેન્ડે ૧૭% મેચ જીતી છે
• WTC ફાઈનલઃ મદદ પીચમાં નહીં, આકાશમાં હાજર છે

ભારત અને ન્યૂઝીલેન્ડની ટીમ ૧૮ જૂનથી ફાઇનલમાં ટકરાશે 
ભારત અને ન્યૂઝીલેન્ડની ટીમ ૧૮ જૂનથી સાઉથમ્પ્ટનમાં વર્લ્ડ ટેસ્ટ ચેમ્પિયનશિપની ફાઇનલમાં ટકરાવાની છે. મેચ ન્યૂટ્રલ વેન્યૂ પર છે એટલે કે બંને ટીમ ઘરની બહાર રમી રહી છે. આ સ્થિતિમાં એ ટીમને એડવાન્ટેજ રહેશે, જેનું પ્રદર્શન વિદેશી ધરતી પર વધુ સારું રહ્યું હોય. આજે આપણે છેલ્લાં બે વર્ષ એટલે કે ૨૦૧૯થી અત્યાર સુધીમાં બંને ટીમે વિદેશી ધરતી પર કેવું પ્રદર્શન કર્યું છે તેના પર એક નજર કરીએ.

વિદેશી ધરતી પર બે વર્ષમાં ભારતે ૫૦%, ન્યૂઝીલેન્ડે ૧૭% મેચ જીતી છે
ટીમ ઇન્ડિયા ૨૦૧૯ની શરૂઆતથી અત્યાર સુધી વિદેશમાં ત્રણ ટીમ સામે ટેસ્ટ શ્રેણી  રમી ચૂકી છે. આ ત્રણ શ્રેણીમાં કુલ આઠ ટેસ્ટ મેચ રમાઈ, જેમાંથી ટીમ ઇન્ડિયાનો ચાર ટેસ્ટમાં વિજય થયો છે અને ત્રણ ટેસ્ટમાં હારનો સામનો કરવો   પડ્યો છે, જ્યારે એક ટેસ્ટ ડ્રોમાં પરિણમી છે. ઓસ્ટ્રેલિયા સામે ઓસ્ટ્રેલિયાની ધરતી પર ચાર મેચમાં ભારતને બેમાં જીત મળી, એકમાં હારનો સામનો કરવો   પડ્યો અને એક ટેસ્ટ ડ્રો રહી. વિન્ડીઝ સામે બંને ટેસ્ટમાં જીત અને ન્યૂઝીલેન્ડ સામેની બંને ટેસ્ટમાં ટીમ ઇન્ડિયાનો પરાજય થયો હતો.

બીજી તરફ તા. ૧ જૂન, ૨૦૧૯થી ન્યૂઝીલેન્ડની ટીમ વિદેશી ધરતી પર સાત ટેસ્ટ રમી છે, જેમાં શ્રીલંકા સામે બે, ઓસ્ટ્રેલિયા સામે ત્રણ અને ઈંગ્લેન્ડ સામેની બે ટેસ્ટ સામેલ છે. કિવી ટીમ આમાંથી બે ટેસ્ટ જીતી છે, જેમાં શ્રીલંકા સામે કોલંબોમાં રમાયેલી ટેસ્ટ અને ગઈ કાલે ઈંગ્લેન્ડની ધરતી પર ઇંગ્લિશ ટીમને માત આપી છે. ઓસ્ટ્રેલિયાની ધરતી પર રમાયેલી ત્રણેય ટેસ્ટમાં ન્યૂઝીલેન્ડનો પરાજય થયો હતો અને ઈંગ્લેન્ડ સામેની વર્તમાન શ્રેણીની પ્રથમ ડ્રો રહી હતી અને બીજી ટેસ્ટમાં કિવી ટીમનો વિજય થયો હતો.

WTC ફાઈનલઃ મદદ પીચમાં નહીં, આકાશમાં હાજર છે
પેટ કમિન્સ, યુવરાજસિંહ જેવા ઘણા વર્તમાન અને ભૂતપૂર્વ ખેલાડીઓનું માનવું છે કે સાઉથમ્પ્ટનની પીચ અને કન્ડિશન્સ ન્યૂઝીલેન્ડ સામે મદદરૂપ થઈ શકે છે. જોકે એ વાત અગત્યની છે કે મેચની પીચ કોઈ હોમ એસોસિયેશન નહીં, પરંતુ ખુદ આઇસીસીએ તૈયાર કરાવી છે. આથી આ પીચ કોઈ એક ટીમ માટે બહુ ફાયદાકારક રહેવાની શક્યતા બહુ જ ઓછી છે. બંને ટીમને પીચ કરતાં વધુ મદદ આકાશમાંથી મળી શકે છે. જો પાંચેય દિવસ હવામાન સ્વચ્છ રહ્યું તો કન્ડિશન્સ ભારતીય ટીમને અનુકૂળ રહેશે, જો વાદળો છવાયેલાં રહેશે તો ન્યૂઝીલેન્ડની ટીમનું પલડું ભારે થઈ શકે છે. એટલે કે બધો આધાર હવામાન પર રહેશે.