ભારતીય ઑલરાઉન્ડર હાર્દિક પંડ્યાએ ઈંગ્લેન્ડ સામે બેટીંગ અને બોલિંગથી ધૂમ મચાવી હતી. ત્યારબાદ ચોતરફ તેની રમતની ચર્ચા થઇ રહી છે.
હાર્દિક પંડ્યાએ ઈંગ્લેન્ડ સામે બેટીંગ અને બોલિંગથી ધમાલ મચાવી
હાર્દિક પંડ્યાના પરાક્રમની પાકિસ્તાનમાં પણ થઇ રહી છે ચર્ચા
પાકિસ્તાનના ફાસ્ટ બોલર શોએબ અખ્તરે હાર્દિકના કર્યા વખાણ
હાર્દિક પંડ્યાએ ભારતીય ટીમમાં આક્રમક રીતે વાપસી કરી
હાર્દિક પંડ્યાએ આયરલેન્ડમાં ટીમની કેપ્ટનશિપ બાદ અહીં તેમણે પોતાને એક ઑલરાઉન્ડર તરીકે પણ સાબિત કર્યા. લાંબા સમયથી ક્રિકેટ મેદાનથી બહાર રહીને હાર્દિક પંડ્યાએ ટીમમાં આક્રમક રીતે વાપસી કરી છે. વન-ડે અને ટી-20 શ્રેણીમાં માત્ર બેટીંગ જ નહીં, પરંતુ બોલિંગથી પણ જમાવટ કરી છે. તેમની પ્રશંસાપૂર્ણ રમત જોઇને પાકિસ્તાનના ફાસ્ટ બોલર શોએબ અખ્તર ખૂબ પ્રભાવિત દેખાયા. તેમણે પોતાની યુટ્યુબ ચેનલ પર આ સ્ટાર ખેલાડીના ભરપૂર વખાણ કર્યા અને મહત્વપૂર્ણ સલાહ આપી.
શોએબ અખ્તર હાર્દિકની બોલિંગથી પ્રભાવિત
શોએબ અખ્તરે હાર્દિક અંગે વાત કરતા કહ્યું, તેઓ ટીમનુ બેલેન્સ પૂરુ કરે છે. તે બે વર્ષ સુધી ફિટનેસને કારણે ટીમમાંથી બહાર રહ્યો છે. મને આ વાતનો આનંદ છે કે હાર્દિક પોતાની ફિટનેસને લઇને ગંભીર છે. તેઓ એક સમયમાં ખૂબ બેદરકાર હતા પરંતુ હવે તેમનુ ધ્યાન વધ્યું છે. તેઓ મેદાનમાં રમતની મજા લઇ રહ્યા છે. તેમણે મેદાનની બહાર વધુ મજા ના લેવી જોઈએ. કારણકે તેમના જેવા ખેલાડી ખૂબ ઓછા છે. પાકિસ્તાનના આ ફાસ્ટ બોલરે કહ્યું, હાર્દિક પંડ્યાને એક બોલર તરીકે સારું પ્રદર્શન કરતા જોઇને હું ખૂબ ખુશ થયો હતો. તેઓ એક મહાન ફીલ્ડર અને બોલર છે. હકીકતમાં તેઓ એક ફાસ્ટ બોલર તરીકે મોટો વિકલ્પ છે. તેમણે બાકીના બોલરને પાછળ ધકેલી દીધા છે અને હું તેમને તેમની રમત પર ધ્યાન કેન્દ્રીત કરવાની સલાહ આપીશ.
ઈંગ્લેન્ડ પ્રવાસમાં ચમક્યા હાર્દિક પંડ્યા
ઈંગ્લેન્ડ સામે ત્રણ વન-ડે મેચની શ્રેણીમાં ભારતીય ટીમની જીતમાં હાર્દિકનો ફાળો મહત્વનો રહ્યો છે. હાર્દિકે બોલ અને બેટીંગ દ્વારા ઈંગ્લેન્ડને ચિત્ત કરી દીધુ. આ શ્રેણીમાં તેમણે 3 મેચમાં 100 રન બનાવ્યાં અને 6 વિકેટ પણ લીધી. સીરીઝની અંતિમ અને નિર્ણાયક મેચમાં તેમણે 55 બોલમાં મહત્વની 71 રનની ઈનિંગ રમી. જેનાથી ટીમની જીત લગભગ નક્કી થઇ ગઇ હતી.